ନୂଆଦିଲ୍ଲୀ,୨୦।୧୨: ଦେଶର ଶିଳ୍ପ ଓ ବାଣିଜ୍ୟ ନୀତି ନିର୍ଦ୍ଧାରଣ କ୍ଷେତ୍ରରେ ଅଗ୍ରଣୀ ଭୂମିକା ନେଉଥିବା ସଂସ୍ଥା ଫେଡେରେଶନ ଅଫ ଇଣ୍ଡିଆନ୍ ଚ୍ୟାମ୍ବର ଅଫ କମର୍ସ ଆଣ୍ଡ ଇଣ୍ଡଷ୍ଟ୍ରି (ଫିକି ଇଣ୍ଡିଆ)ର ୯୪ତମ ବାର୍ଷିକ ଅଧିବେଶନ ଦିଲ୍ଲୀଠାରେ ଅନୁଷ୍ଠିତ ହୋଇଯାଇଛି। ୨ ଦିନ ଧରି ଆୟୋଜିତ ହୋଇଥିବା ଫିକିର ବାର୍ଷିକ ଅଧିବେଶନରେ କେନ୍ଦ୍ରମନ୍ତ୍ରୀ ଅମିତ ଶାହା ମୁଖ୍ୟ ଅତିଥି ଭାବେ ଯୋଗ ଦେଇଥିଲେ। ଏହି ପରିପ୍ରେକ୍ଷୀରେ ‘ଫିକି’ର ସଭାପତି ଭାବେ ହିନ୍ଦୁସ୍ତାନ ୟୁନିଲିଭର ଲିମିଟେଡର ଅଧ୍ୟକ୍ଷ ତଥା ପରିଚାଳନା ନିର୍ଦ୍ଦେଶକ ସଞ୍ଜୀବ ମେହେଟ୍ଟା ମନୋନୀତ ହୋଇଛନ୍ତି। ସେହିଭଳି ଫିକି ଇଣ୍ଡିଆର ବରିଷ୍ଠ ଉପସଭାପତି ଭାବେ ଓଡ଼ିଆ ଶିଳ୍ପପତି ତଥା ଇମ୍ଫା ପରିଚାଳନା ନିର୍ଦ୍ଦେଶକ ଶୁଭ୍ରକାନ୍ତ ପଣ୍ଡା ନିର୍ବାଚିତ ହୋଇଛନ୍ତି। ଏହି ପରିପ୍ରେକ୍ଷୀରେ ସେ କହିଛନ୍ତି, ଆଗାମୀ ଦିନରେ ଭାରତୀୟ ଉଦ୍ୟୋଗଜଗତର ବିକାଶ ପାଇଁ କାର୍ଯ୍ୟ କରିବେ। ବିଶେଷକରି ଓଡ଼ିଶା ଶିଳ୍ପାୟନରେ ରହିଥିବା ସମ୍ଭାବନାର ସଫଳ ରୂପାୟନରେ ତାଙ୍କର ଯୋଗଦାନ ରହିବ। ୧୯୯୩ରେ ପଣ୍ଡା ଇଣ୍ଡିଆନ୍ ମେଟାଲ ଆଣ୍ଡ ଫେରୋ ଆଲାୟଜ୍ (ଇମ୍ଫା)ରେ ଯୋଗଦାନ କରିଥିବା ବେଳେ ବର୍ତ୍ତମାନ ସେ ଇମ୍ଫାର ପରିଚାଳନା ନିର୍ଦ୍ଦେଶକ ଦାୟିତ୍ୱ ତୁଲାଉଛନ୍ତି। ତୃତୀୟ ଭାରତୀୟ ଭାବେ ଆନ୍ତର୍ଜାତିକ ଚାମ୍ବର ଅଫ କମର୍ସର ଭାରତୀୟ ଚାପ୍ଟର ସଭାପତି (୨୦୧୭-୧୮) ଏବଂ ପ୍ୟାରିସସ୍ଥିତ ଇଣ୍ଟରନ୍ୟାଶନାଲ କ୍ରୋମିଅମ ଡେଭଲପ୍ମେଣ୍ଟ ଆସୋସିଏଶନ (ଆଇସିଡିଏ)ର ସଭାପତି (୨୦୧୩-୧୫) ଭାବେ କାର୍ଯ୍ୟ କରିଛନ୍ତି। ଆମେରିକାସ୍ଥିତ ବୋଷ୍ଟନ ବିଶ୍ବବିଦ୍ୟାଳୟ କ୍ୱେଷ୍ଟ୍ରମ ସ୍କୁଲ ଅଫ ବିଜ୍ନେସ୍ରୁ ଫାଇନାନ୍ସ ଏବଂ ଅପରେଶନ ମ୍ୟାନେଜ୍ମେଣ୍ଟରେ ଶୁଭ୍ରକାନ୍ତ ସମ୍ମାନଜନକ ଡିଗ୍ରୀ ହାସଲ କରିଛନ୍ତି। ସେହିପରି ଡ. ଅନୀଶ ଶାହ ସଂଘର ଉପସଭାପତି ହୋଇଛନ୍ତି।
