କଟକ ଅଫିସ,୩୧ା୩: ଠିକ୍ ଦାମ୍, ଉଚିତ୍ ମାନର ଖାଦ୍ୟସାମଗ୍ରୀ କିଣିବା ନିମନ୍ତେ ଲୋକମାନେ ଶପିଂ ମଲ୍ ଯାଉଛନ୍ତି। ଶୀତତାପ ନିୟନ୍ତ୍ରିତ ମଲ୍ରେ କିନ୍ତୁ ଗ୍ରାହକଙ୍କୁ ଏକ୍ସପାଏରି ଖାଦ୍ୟ ସାମଗ୍ରୀ ବିକ୍ରି କରାଯାଉଛି। ବାଦାମବାଡ଼ିସ୍ଥିତ ଭି-ବଜାର ନାମକ ଶପିଂ ମଲ୍ରେ ଗୁରୁବାର ଏଭଳି କାରନାମା ଧରାପଡ଼ିଛି। ବାଦାମବାଡ଼ି ପୋଲିସ ସେଠାରେ ଚଢ଼ାଉ କରି ବିପୁଳ ପରିମାଣର ଏକ୍ସପାଏରି ଖାଦ୍ୟ ସାମଗ୍ରୀ ଜବତ କରିଛି। ଚଢ଼ାଉବେଳେ ଠକେଇର ତରିକା ସମ୍ପର୍କରେ ଚାଞ୍ଚଲ୍ୟକର ତଥ୍ୟ ପୋଲିସର ହସ୍ତଗତ ହୋଇଛି। ତଦନ୍ତ ଜାରି ରହିଥିବା ଆଇଆଇସି ସୂର୍ଯ୍ୟାଂଶୁ ଶେଖର ପାଢ଼ୀ ସୂଚନା ଦେଇଛନ୍ତି।
ଏସିପି ଅମରେନ୍ଦ୍ର ପଣ୍ଡାଙ୍କ ସୂଚନା ଅନୁସାରେ, ଉକ୍ତ ଶପିଂ ମଲ୍ରେ ଏକ୍ସପାଏରି ଖାଦ୍ୟ ସାମଗ୍ରୀ ବିକ୍ରି କରାଯାଉଥିବା ନେଇ ବାଦାମବାଡ଼ି ପୋଲିସକୁ ବିଶେଷ ସୂତ୍ରରୁ ଖବର ମିଳିଥିଲା। ତୁରନ୍ତ ସେଠାରେ ଚଢ଼ାଉ କରାଯିବା ପରେ ଘଟଣା ସମ୍ପର୍କରେ ଜଣାପଡିଥିଲା। ଏହି ଶପିଂ ମଲ୍ରେ ବିକ୍ରି ପାଇଁ ରଖାଯାଇଥିବା ନାମୀଦାମୀ କମ୍ପାନୀର ଖାଦ୍ୟ ପ୍ୟାକେଟ୍ରେ ଏକ୍ସପାଏରି ତାରିଖ ଲେଖା ନ ଥିଲା। ବରଂ ପ୍ୟାକେଟଗୁଡ଼ିକରୁ ମାନୁଫାକ୍ଚରିଂ ଓ ଏକ୍ସପାଏରି ତାରିଖକୁ ଏକ ରାସାୟନିକ ତରଳ ପଦାର୍ଥ ବ୍ୟବହାର କରି ଲିଭାଇ ଦିଆଯାଇଥିଲା। ମଲ୍କୁ ଆସୁଥିବା ସବୁ ଲୋକ ଖାଦ୍ୟପଦାର୍ଥର ମାନୁଫାକଚରିଂ ଓ ଏକ୍ସପାଏରି ତାରିଖ ବାବଦରେ ସଚେତନ ନୁହନ୍ତି। ତେଣୁ ଏଭଳି କାରନାମା ବିଷୟରେ ସାଧାରଣ ଲୋକେ ଜାଣିବା ମୁସ୍କିଲ। ଖାଦ୍ୟର ଏକ୍ସପାଏରି ତାରିଖ ଶେଷ ହୋଇଯାଇଥିବାରୁ ଗୁଣାତ୍ମକ ମାନ ନଷ୍ଟ ହୋଇଯାଇଛି। ଏଭଳି ଖରାପ ଖାଦ୍ୟ ଲୋକଙ୍କ ଶରୀର ଉପରେ କୁପ୍ରଭାବ ପକାଇବ। ଏ ସମ୍ପର୍କରେ ଆଇଆଇସି ପାଢ଼ୀ କହିଛନ୍ତି, ଉକ୍ତ ମଲ୍ରୁ ୨୦ ପ୍ରକାରରୁ ଅଧିକ ଶୁଖିଲା ଖାଦ୍ୟ ସାମଗ୍ରୀ ଜବତ କରାଯାଇଛି। ସେଗୁଡ଼ିକର ମୂଲ୍ୟ ଆକଳନ କରାଯାଇନାହିଁ। ଖାଦ୍ୟଗୁଡ଼ିକର ମାନ ପରଖିବା ନିମନ୍ତେ ଖାଦ୍ୟ ସୁରକ୍ଷା ଅଧିକାରୀଙ୍କୁ ଅବଗତ କରାଯାଇଛି। ଶୁକ୍ରବାର ଖାଦ୍ୟର ମାନ ଯାଞ୍ଚ ପରେ ପରବର୍ତ୍ତୀ ପଦକ୍ଷେପ ନିଆଯିବ ବୋଲି ସୂଚନା ଦିଆଯାଇଛି।
