ନବରଙ୍ଗପୁର, ୯।୬(ସଦାଶିବ ପ୍ରହରାଜ): ସ୍ଥାନୀୟ ମହାରାଣୀ କ୍ଳବ ଜମିରେ ବହୁ ବର୍ଷ ହେବ ସ୍ଥାନୀୟ ୧୩ ଜଣ ଦୋକାନ କରି ଆସୁଛନ୍ତି । ସେମାନଙ୍କୁ କ୍ଳବ ପକ୍ଷରୁ ଉଠିଯିବାକୁ କୁହାଯାଇଥିଲା। ତେବେ ଦୋକାନୀମାନେ କ୍ଳବକୁ ଭଡା ମଧ୍ୟ ଦେଇ ଆସୁଛନ୍ତି। ଏନେଇ ୧୩ ଜଣ ଦୋକାନୀ ହାଇକୋର୍ଟରୁ ସ୍ଥଗିତାଦେଶ ୪ ତାରିଖରେ ଆଣିଥିଲେ ମଧ୍ୟ ଜବରଦସ୍ତ ଭାବେ ଉଚ୍ଛେଦ କରିବାକୁ ସୋମବାର ମେସିନ ଲଗାଯାଇଥିବା ପ୍ରତିବାଦରେ ଦୋକାନୀ ଓ ସ୍ଥାନୀୟ ଲୋକେ ସରକାରୀ ବସ ଷ୍ଟାଣ୍ଡ ଛକରେ ୨୬ ନମ୍ବର ଜାତୀୟ ରାଜପଥ ଉପରେ ଧାରଣାରେ ବସି ରାସ୍ତାରୋକୋ କରିଛନ୍ତି ।
ନବରଙ୍ଗପୁର ଥାନା ଅଧିକାରୀ ସମ୍ବିତ ବେହେରା ଆନ୍ଦୋଳନକାରୀଙ୍କ ସହିତ ଆଲୋଚନା କରିବା ସହିତ ରାସ୍ତାରୋକୋରୁ ହଟାଇବା ପାଇଁ ବୁଝାସୁଝା କରୁଛନ୍ତି। ସାମାଜିକ କର୍ମୀ ଶିତେଶ ପଟ୍ଟନାୟକଙ୍କ ନେତୃତ୍ୱରେ ୧୩ ଜଣ ଦୋକାନୀ ରାସ୍ତାରୋକୋ କରି ଉପଜିଲାପାଳ ଓ ଅତିରିକ୍ତ ଜିଲାପାଳ ଆସି ସମସ୍ୟାର ସମାଧାନ କରନ୍ତୁ । ତାହା ନ ହେଲେ କେହି ଆନ୍ଦୋଳନରୁ ହଟିବେ ନାହିଁ ବୋଲି ଜିଦରେ ଅଟଳ ରହିଛନ୍ତି । ତେବେ ପୋଲିସ ଆନ୍ଦୋଳନର ଏକ ଘଣ୍ଟା ପରେ ପହଁଛି ରାସ୍ତାରେ ଗାଡି ଚଳାଚଳ ସ୍ବାଭାବିକ କରିଥିଲା। ଏଯାଏ ପୋଲିସ ଓ ଆନ୍ଦୋଳନ କାରୀଙ୍କ ମଧ୍ୟରେ ଆଲୋଚନା ଜାରି ରହିଛି।
