ନୂଆଦିଲ୍ଲୀ, ୨୦ା୭: ନ୍ୟାସନାଲ ଟେଷ୍ଟିଂ ଏଜେନ୍ସି (ଏନଟିଏ) ଅନଲାଇନରେ ସହର ଏବଂ ପରୀକ୍ଷା କେନ୍ଦ୍ର ଅନୁଯାୟୀ ନିଟ୍ ୟୁଜି ୨୦୨୪ ଫଳାଫଳ ଅପଲୋଡ୍ କରିବା ପରେ ଆଶ୍ଚର୍ଯ୍ୟକର ସଂଖ୍ୟା ପ୍ରକାଶ ପାଇଛି। ରାଜକୋଟ ପରୀକ୍ଷା କେନ୍ଦ୍ରରେ ୧୨ ଜଣ ଛାତ୍ରଙ୍କ ମାର୍କ ୭୦୦ ରୁ ଅଧିକ ଏବଂ ସିକର କେନ୍ଦ୍ରର ୮ ଜଣ ଛାତ୍ରଙ୍କ ମାର୍କ ୭୦୦ ରୁ ଅଧିକ ରହିଛି।
ଗୁଜୁରାଟର ରାଜକୋଟରେ ୟୁନିଟ୍ -୧ ସ୍କୁଲ୍ ଅଫ ଇଞ୍ଜିନିୟରିଂ ଆର. ବିଶ୍ୱବିଦ୍ୟାଳୟ ପରୀକ୍ଷା କେନ୍ଦ୍ର (କେନ୍ଦ୍ର ନମ୍ବର ୨୨୭୦୧) ରେ ପରୀକ୍ଷା ପାଇଁ ଆସିଥିବା ଅଧିକାଂଶ ଛାତ୍ର ନିଟ୍ ୟୁଜି ପରୀକ୍ଷାରେ ଉତ୍ତୀର୍ଣ୍ଣ ହୋଇଛନ୍ତି। ଏହି ସଂଖ୍ୟା ପ୍ରାୟ ୮୫% ଅଟେ।
ରାଜକୋଟରେ ଥିବା ଏହି ପରୀକ୍ଷା କେନ୍ଦ୍ରରେ ୧୨ ଜଣ ଛାତ୍ରଙ୍କର ୭୦୦ ରୁ ଅଧିକ ମାର୍କ, ୧୧୫ ଜଣ ଛାତ୍ରଙ୍କର ୬୫୦ ରୁ ଅଧିକ ମାର୍କ, ୨୫୯ ଜଣ ଛାତ୍ରଛାତ୍ରୀଙ୍କ ୬୦୦ ରୁ ଅଧିକ ମାର୍କ ଏବଂ ୪୦୩ ଜଣ ଛାତ୍ରଙ୍କର ୫୫୦ ରୁ ଅଧିକ ମାର୍କ ରହିଛି। ମୋଟ ୧୯୬୮ ପ୍ରାର୍ଥୀ ଏହି ପରୀକ୍ଷା କେନ୍ଦ୍ରରେ ନିଟ୍ ପରୀକ୍ଷା ଦେଇଥିଲେ।
ସେହିଭଳି ରାଜସ୍ଥାନର ସିକରର ବିଦ୍ୟା ଭାରତ ପବ୍ଲିକ ସ୍କୁଲ ପରୀକ୍ଷା କେନ୍ଦ୍ର ନମ୍ବର -୨୩୨୩୪୯ ରେ ମଧ୍ୟ ଦେଖିବାକୁ ମିଳିଛି। ଏହି ପରୀକ୍ଷା କେନ୍ଦ୍ରରେ ମେ ୫ ରେ ମୋଟ ୧୦୦୧ ଜଣ ପ୍ରାର୍ଥୀ ନିଟ୍ ୟୁଜି ପରୀକ୍ଷା ଦେଇଥିଲେ। ଏଠାରେ ୮ ଜଣ ଛାତ୍ରଙ୍କର ୭୦୦ ରୁ ଅଧିକ ମାର୍କ ଅଛି, ୬୯ ଜଣ ଛାତ୍ରଙ୍କର ୬୫୦ ରୁ ଅଧିକ ମାର୍କ ଅଛି, ୧୫୫ ଜଣ ଛାତ୍ରଙ୍କର ୬୦୦ ରୁ ଅଧିକ ମାର୍କ ଅଛି ଏବଂ ୨୪୧ ଜଣ ଛାତ୍ରଙ୍କର ୫୦୦ ରୁ ଅଧିକ ମାର୍କ ଅଛି।
ତେବେ ଜୁଲାଇ ୧୮ ରେ ଉଚ୍ଚତମ ନ୍ୟାୟାଳୟରେ ୪ ଘଣ୍ଟିଆ ଶୁଣାଣି ପରେ ମଧ୍ୟ ଖଣ୍ଡପୀଠ କୌଣସି ଚୂଡ଼ାନ୍ତ ନିଷ୍ପତ୍ତିରେ ପହଞ୍ଚି ପାରି ନାହିଁ। ପ୍ରଶ୍ନପତ୍ର ପ୍ରଘଟ, ସିବିଆଇ ରିପୋର୍ଟ, ଆଇଆଇଟି ରିପୋର୍ଟ, ପରୀକ୍ଷାରେ ଅନିୟମିତତାର ସମୟ ସୀମା, କେତେ ଅଭିଯୁକ୍ତ ଧରାପଡିଛି ସେନେଇ ବିତର୍କ ହୋଇଥିଲା। ଏହା ସତ୍ତ୍ୱେ ନିଟ୍ ପରୀକ୍ଷା ବାତିଲ ହେବ କି ନାହିଁ? ଏହା ସ୍ଥିର ହୋଇପାରିଲା ନାହିଁ। ଶେଷରେ, ପ୍ରଧାନ ବିଚାରପତି ଡି.ୱାୟୀ ଚନ୍ଦ୍ରଚୂଡ଼ଙ୍କ ନେତୃତ୍ୱରେ ଏକ ତିନିଜଣିଆ ଖଣ୍ଡପୀଠ ସମସ୍ତ ନିଟ୍ ପ୍ରାର୍ଥୀଙ୍କ ସହର ଏବଂ ପରୀକ୍ଷା କେନ୍ଦ୍ର ଅନୁଯାୟୀ ମାର୍କ ଅପଲୋଡ୍ କରିବାକୁ ଏନଟିଏକୁ ନିର୍ଦ୍ଦେଶ ଦେଇଥିଲେ। ଡାଟା ଅପଲୋଡ୍ କରିବାକୁ ଶନିବାର ମଧ୍ୟାହ୍ନ ୧୨ ଟା ପର୍ଯ୍ୟନ୍ତ ସମୟ ଦିଆଯାଇଥିଲା।
ଉଚ୍ଚତମ ନ୍ୟାୟାଳୟଙ୍କ ନିର୍ଦ୍ଦେଶ ଅନୁଯାୟୀ ଏନଟିଏ ଛାତ୍ରଙ୍କ ଗୋପନୀୟତାକୁ ଧ୍ୟାନ ଦେଇ ଏହାର ଅଫିସିଆଲ ୱେବସାଇଟ https://exams.nta.ac.in/NEET/ ରେ ଶନିବାର ମଧ୍ୟାହ୍ନ ସୁଦ୍ଧା ତଥ୍ୟ ପ୍ରକାଶ କରିଛି।
