ନୂଆଦିଲ୍ଲୀ,୨୧।୧୧: ସୁପ୍ରିମ୍କୋର୍ଟଙ୍କ ପକ୍ଷରୁ ଏକ ଗୁରୁତ୍ୱପୂର୍ଣ୍ଣ ରାୟ ପ୍ରଦାନ କରାଯାଇଛି। ମୋଟର ଦୁର୍ଘଟଣାରେ ଯେକୌଣସି ମତେ କ୍ଷତିପୂରଣ ଦେବାକୁ ବୀମା କମ୍ପାନୀଗୁଡ଼ିକୁ କୁହାଯାଇଛି। ଏହାଦ୍ୱାର ବୀମା କମ୍ପାନୀଙ୍କୁ ବଡ଼ ଝଟ୍କା ଲାଗିଛି। ବିଚାରପତି ଏମ୍.ଆର୍. ଶାହା ଏବଂ ଜଷ୍ଟିସ ସଞ୍ଜୀବ ଖାନ୍ନାଙ୍କ ନେତୃତ୍ୱରେ ଗଠିତ ଖଣ୍ଡପୀଠ ଏକ ମାମଲାର ବିଚାର କରି ଏଭଳି କହିଛନ୍ତି।
ପ୍ରାପ୍ତ ସୂଚନା ଅନୁଯାୟୀ, ୧୨ ସେପ୍ଟେମ୍ବର ୨୦୧୨ ରେ, ଇଞ୍ଜିନିୟରିଂର ତୃତୀୟ ବର୍ଷରେ ପଢୁଥିବା ଜଣେ ୨୧ ବର୍ଷ ବୟସ୍କ ଛାତ୍ରଙ୍କର ସଡ଼କ ଦୁର୍ଘଟଣାରେ ମୃତ୍ୟୁ ଘଟିଥିଲା। ସେ ଦାବିଦାରଙ୍କ ପୁତ୍ର ଥିଲେ। ମୋଟର ଦୁର୍ଘଟଣା ଦାବି ଟ୍ରିବ୍ୟୁନାଲ ଦେଇଥିବା କ୍ଷତିପୂରଣକୁ ହାଇକୋର୍ଟ ୧୨,୮୫,୦୦୦ରୁ ୬,୧୦,୦୦୦ ଟଙ୍କାକୁ ହ୍ରାସ କରଥିଲେ। କେବଳ ଏତିକି ନୁହେଁ, ଟ୍ରିବ୍ୟୁନାଲ ପକ୍ଷରୁ ଦିଆଯାଇଥିବା ମାସିକ ୧୫,୦୦୦ ଟଙ୍କା କ୍ଷତିପୂରଣ ଦାବିକୁ ୫୦୦୦ ଟଙ୍କା ଧାର୍ଯ୍ୟ କରାଯାଇଥିଲା। ଏକ ଆବେଦନ ମାଧ୍ୟମରେ ସୁପ୍ରିମକୋର୍ଟରେ ଏହି ମାମଲା ରୁଜୁ ହୋଇଥିଲା।
ଆବେଦନରେ କୁହାଯାଇଥିଲା ଯେ, ମୃତ ଯୁବକ ସିଭିଲ ଇଞ୍ଜିନିୟରିଂର ତୃତୀୟ ବର୍ଷରେ ପଢୁଥିଲେ। ଏଭଳି ପରିସ୍ଥିତିରେ ମୃତକଙ୍କ ଆୟ ମାସକୁ ଅତି କମରେ ୧୦,୦୦୦ ଟଙ୍କା ହେବା ଉଚିତ। ବିଶେଷକରି ୨୦୧୨ ମସିହାରେ, ସର୍ବନିମ୍ନ ମଜୁରୀ ଅଧିନିୟମ ଅନୁଯାୟୀ, ଶ୍ରମିକ / କୁଶଳୀ ଶ୍ରମିକମାନେ ମାସକୁ ପାଞ୍ଚ ହଜାର ଟଙ୍କା ପାଉଥିଲେ। ୟୁନିଅନ ଅଫ ଇଣ୍ଡିଆ ଦ୍ୱାରା ଉଠାଯାଇଥିବା ବିବାଦକୁ କୋର୍ଟ ପ୍ରତ୍ୟାଖ୍ୟାନ କରିଛନ୍ତି ଯେ ଦୁର୍ଘଟଣା ସମୟରେ ଯୁବକ କୌଣସି ଚାକିରି କରୁ ନ ଥିଲେ। ଭବିଷ୍ୟତର ତାଙ୍କର ଆୟ ସମ୍ଭାବନା ଅବା ଆୟ ବୃଦ୍ଧି ପାଇଁ ଅନ୍ୟ କୌଣସି କ୍ଷତି ପୂରଣ ଦିଆଯିବ ନାହିଁ।
ସୁପ୍ରିମ୍କୋର୍ଟ ବୀମା କମ୍ପାନୀର ଏହି ଦାବିକୁ ପ୍ରତ୍ୟାଖ୍ୟାନ କରିଛନ୍ତି। ବୀମା କମ୍ପାନୀ ଦାବି କରିଥିଲେ ଯେ ପରିସ୍ଥିତିକୁ ଦୃଷ୍ଟିରେ ରଖି ମୃତକଙ୍କ ଆୟ ନିର୍ଣ୍ଣୟ କରାଯିବା ଆବଶ୍ୟକ। କୌଣସି ବିବାଦ ହୋଇପାରିବ ନାହିଁ ଯେ ଜୀବନଧାରଣର ମୂଲ୍ୟ ବୃଦ୍ଧି ଏପରି ବ୍ୟକ୍ତିଙ୍କୁ ମଧ୍ୟ ପ୍ରଭାବିତ କରିବ। ଏହାସହିତ କୁହାଯାଇଛି ଯେ କ୍ଷତିପୂରଣ ଉଦ୍ଦେଶ୍ୟରେ ଭବିଷ୍ୟତର ଆଶା ଲାଭ ପାଇବାକୁ ମୃତକ ହକ୍ଦାର ହୋଇ ନ ପାରନ୍ତି। ୟୁନିଅନ ଅଫ ଇଣ୍ଡିଆ ଉଠାଇଥିବା ଏହି ଯୁକ୍ତିକୁ ମଧ୍ୟ ସୁପ୍ରିମକୋର୍ଟ ପ୍ରତ୍ୟାଖ୍ୟାନ କରିଛନ୍ତି। ଅଧିକନ୍ତୁ, ଆବେଦନକାରୀ ଆବେଦନ ତାରିଖ ଠାରୁ ଅସୁଲି ତାରିଖ ପର୍ଯ୍ୟନ୍ତ ସାତ ପ୍ରତିଶତ ହାରରେ ମୋଟ ୧୫,୮୨,୦୦୦ ଟଙ୍କାର ହକଦାର ହେବେ।