ବାରିପଦା,୨୧।୬(ନୀଳାଦ୍ରି ବିହାରୀ ଦଣ୍ଡପାଟ): ଶିକାରୀଙ୍କ ଗୁଳିରେ ମାସକ ମଧ୍ୟରେ ଦୁଇ ବନ କର୍ମଚାରୀ ନିହତ ହେବା ପରେ ସୁରକ୍ଷା ଦାବି ନେଇ ବନ କର୍ମଚାରୀମାନେ ଆନ୍ଦୋଳନକୁ ଓହ୍ଲାଇଛନ୍ତି। ସେମାନେ ପାଟ୍ରୋଲିଂ କରୁ ନ ଥିବାରୁ ମୟୂରଭଞ୍ଜ ଜିଲା ଶିମିଳିପାଳ ଅଭୟାରଣ୍ୟ ମୁକୁଳା ହୋଇପଡ଼ିଛି। ଏହାର ଫାଇଦା ଉଠାଇ ଶିକାରୀମାନେ ନିର୍ଭୟରେ ଅଭୟାରଣ୍ୟ ମଧ୍ୟକୁ ପ୍ରବେଶ କରୁଥିବା ବେଳେ କର୍ମଚାରୀଙ୍କ ଦାବି ପୂରଣ ନେଇ କୌଣସି ବାଟ ଫିଟି ନାହିଁ ା ଡେପୁଟି ରେଞ୍ଜର ମାଥି ହଁାସଦାଙ୍କ ମୃତ୍ୟୁ ଘଟଣାରେ ପୋଲିସର କାର୍ଯ୍ୟାନୁଷ୍ଠାନକୁ ନେଇ କର୍ମଚାରୀମାନେ କ୍ଷୋଭ ପ୍ରକାଶ କରିଛନ୍ତି। ବିଭାଗୀୟ ଉଚ୍ଚ ପଦସ୍ଥ ଅଧିକାରୀମାନେ ଅଭୟାରଣ୍ୟକୁ ସୁରକ୍ଷା ଦେବା ନିମନ୍ତେ ହରଡ଼ଘଣାରେ ପଡ଼ିଛନ୍ତି। ଅନ୍ୟପକ୍ଷରେ ରାଜ୍ୟ ସଂଘର କର୍ମକର୍ତ୍ତାମାନେ ମଙ୍ଗଳବାର ସନ୍ଧ୍ୟାରେ ଆରସିସିଏଫ୍ ପ୍ରକାଶ ଚାନ୍ଦ ଗୋଗିନେନିଙ୍କ ସହ ସଂଘ କର୍ମକର୍ତ୍ତାମାନେ ଆଲୋଚନା କରିଛନ୍ତି।
ରେଞ୍ଜର ମାଥି ହଁାସଦାଙ୍କ ମୃତ୍ୟୁ ଘଟଣାରେ ପୋଲିସ କେତେଜଣଙ୍କୁ ଅଟକ ରଖି ପଚରାଉଚୁରା ଚଳାଇଛି। ଅପରାଧିମାନେ ପୋଲିସ ଆଖିରେ ଧୂଳି ଦେଇ ଖସି ଯିବାକୁ ଉଦ୍ୟମ ଜାରି ରଖିଛନ୍ତି। ଶିକାରୀଙ୍କ ପଛରେ କାମ କରୁଥିବା ଆନ୍ତଃରାଜ୍ୟ ର଼୍ୟାକେଟକୁ ଧରିବାରେ ଉଭୟ ବନ ବିଭାଗ ଓ ପୋଲିସ ଫେଲ୍ ମାରିଛି। ଫଳରେ ଶିକାରୀଙ୍କ ଦୌରାତ୍ମ୍ୟରେ ଶିମିଳିପାଳ ସୁରକ୍ଷା ସହାୟକମାନେ ଭୟଭୀତ ହୋଇ ପଡ଼ିଛନ୍ତି। ଠେଙ୍ଗା ବାଡ଼ିରେ ସଶସ୍ତ୍ର ଶିକାରୀଙ୍କୁ ଅଟକାଇବା ସମ୍ଭବ ନୁହେଁ ବୋଲି ଜଣେ ସୁରକ୍ଷା ସହାୟକ କହିଛନ୍ତି। ଏ ସଂକ୍ରାନ୍ତରେ ପ୍ରାକ୍ତନ ଅବୈତନିକ ବନ୍ୟପ୍ରାଣୀ ତତ୍ତ୍ୱାବଧାରକ ଭାନୁମିତ୍ର ଆଚାର୍ଯ୍ୟ କୁହନ୍ତି, ଶିମିଳିପାଳକୁ ସୁରକ୍ଷା ଦେବା ପାଇଁ ଅଭିଜ୍ଞ ଅଧିକାରୀଙ୍କ ଆବଶ୍ୟକତା ରହିଛି। ନୂତନ ଉପାୟ ଓ କୌଶଳ ମାଧ୍ୟମରେ ଅଭୟାରଣ୍ୟକୁ ସୁରକ୍ଷା ଯୋଗାଇ ଦିଆଯାଇ ପାରିବ ବୋଲି ସେ ଦୃଢୋକ୍ତି ପ୍ରକାଶ କରିଛନ୍ତି।
