ଇସ୍ଲାମାବାଦ,୧୫ ।୨: ପାକିସ୍ତାନର ଗୃହମନ୍ତ୍ରୀ ଶେଖ ରସିଦ ଅହମ୍ମଦ ଅଧିକାଂଶ ସମୟରେ କିଛି ନା କିଛି ବେକାବୁ ବୟାନକୁ ନେଇ ଆସିଥାଆନ୍ତି ଚର୍ଚ୍ଚାକୁ । ଏବେ ପୁଣିଥରେ ସେ ଆସିଛନ୍ତି ଚର୍ଚ୍ଚାକୁ । ଦେଶରେ ଦରମା ବୃଦ୍ଧିକୁ ନେଇ କର୍ମଚାରୀମାନେ ବିରୋଧ ପ୍ରଦର୍ଶନ କରୁଥିବା େବେଳ ସେମାନଙ୍କ ଉପରକୁ ଲୁହବୁହା ଗ୍ୟାସ ଛାଡିଥିଲା ପୋଲିସ । ଏବେ ଏହାକୁ ନେଇ ରସିଦ କହିଛନ୍ତି ବେଶ୍ କିଛିଦିନ ହେବ ଲୁହବୁହା ଗ୍ୟାସ ରଖାଯାଇଥିଲା । ସେଥିପାଇଁ ଏହାର ପରୀକ୍ଷା କରିବା ଜରୁରୀ ଥିଲା । ରାୱଲପିଣ୍ଡିରେ ଏକ କାର୍ଯ୍ୟକ୍ରମରେ ଯୋଗ ଦେଇ ରସିଦ କହିଛନ୍ତି ଇସଲାମାବାଦ ପୋଲିସ ଅଳ୍ପ ଲୁହବୁହା ଗ୍ୟାସ ପ୍ରୟୋଗ କରିଛି ଯାହା ନିହାତି ଜରୁରୀ ଥିଲା । କାରଣ ଏହା ବେଶୀଦିନ ହେବ ପଡି ରହିଥିଲା ଏହାର ବ୍ୟବହାର ହେଉ ନ ଥିଲା । ସେ ଆହୁରି ମଧ୍ୟ କହିଛନ୍ତି ଅସଲ ସମସ୍ୟା ଲୁହବୁହା ଗ୍ୟାସ ନୁହେଁ, ବରଂ ଦରମା ବଢାଇବା, ଯାହା ଏହି ମହଙ୍ଗା ମାଡ ସମୟରେ ରାଜକୋଷରେ ଅରବ ଟଙ୍କାର ବୋଝ ବଢିବ । ସୂଚନାଯୋଗ୍ୟ, ପାକିସ୍ତାନ ପୋଲିସ ୧୦ ଫେବୃୟାରୀରେ ବେତନ ଓ ପେନଶନ ବୃଦ୍ଧିକୁ ନେଇ ବିରୋଧ ପ୍ରଦର୍ଶନ କରୁଥିବା କର୍ମଚାରୀଙ୍କ ଉପରେ ଲୁହବୁହା ଗ୍ୟାସ ପ୍ରୟୋଗ କରିଥିଲା । ତେବେ ଏହାକୁ ନେଇ ପାକିସ୍ତାନ ମନ୍ତ୍ରୀଙ୍କ ଏଭଳି ବୟାନ ଆଲୋଚନାର ବିଷୟ ପାଲଟିଛି । କେବଳ ସେତିକି ନୁହେଁ ମନ୍ତ୍ରୀ ଭୁଲ ମାଗନ୍ତୁ ବୋଲି ମଧ୍ୟ ଲୋକେ ଦାବି କରିଛନ୍ତି ।
