ବରଗଡ଼ ଅଫିସ୍,୫।୩: ଜନ୍ମ ପରେ ଦିନେ ମୃତ୍ୟୁ ନିଶ୍ଚିତ। କିନ୍ତୁ ଶତାୟୁ ସଭିଙ୍କ ଭାଗ୍ୟରେ ନ ଥାଏ । ସେହିପରି ମୃତ୍ୟୁ ପରେ ଶବ ସତ୍କାର କରାଯାଏ। ଗାଁ, ପରିବାରରେ ଗଭୀର ଶୋକ ପ୍ରକାଶ ପାଇଥାଏ । ତେବେ ବରଗଡ଼ ଜିଲା ତବଡ଼ା ପଞ୍ଚାୟତ କଲଙ୍ଗାପାଲ ଗ୍ରାମରେ ଜଣେ ଶତାୟୁ କୁଶ ମେହେର(୧୦୫)ଙ୍କ ଦେହାନ୍ତ ପରେ ଗାଁ ଲୋକେ ନିଆରା ଭାବେ ଶବ ସତ୍କାର କରିଛନ୍ତି । ଶନିବାର କୁଶଙ୍କ ମୃତ୍ୟୁ ହୋଇଥିଲା। ତାଙ୍କ ମୃତ୍ୟୁ ପରେ ଗ୍ରାମରେ ଶୋକ ପ୍ରକାଶ ପାଇଛି ସତ, ହେଲେ ଗ୍ରାମରେ ଜଣେ ଶତାୟୁଙ୍କ ପାଇଁ ଗ୍ରାମବାସୀ ଗର୍ବ ଅନୁଭବ କରୁଥିଲେ। ତାଙ୍କୁ ନିଆରା ଭାବେ ବିଦାୟ ଦେବା ପାଇଁ ନିଷ୍ପତ୍ତି ନେଇଥିଲେ। ଡିଜେ, ବାଜା ସହିତ ନାଚି ନାଚି ମୃତଦେହକୁ ଗାଁ ମଶାଣି ପର୍ଯ୍ୟନ୍ତ ନେଇଥିଲେ । ସେଠାରେ ରୀତିନୀତି ଅନୁଯାୟୀ ଅନ୍ତିମ ସତ୍କାର କରାଯାଇଥିଲା। ବଡ଼ପୁଅ ଯୋଗେନ୍ଦ୍ର ମୁଖାଗ୍ନି ଦେଇଥିଲେ। ଘଟଣାଟି ଅଞ୍ଚଳରେ ଚର୍ଚ୍ଚାର ବିଷୟ ହୋଇଛି।
