ଦୁବାଇ, ୧।୭(ପି.ଟି.)- ଅନ୍ତର୍ଜାତୀୟ କ୍ରିକେଟ କାଉନସିଲ(ଆଇସିସି)ର ପ୍ରଥମ ସ୍ବାଧୀନ ଅଧ୍ୟକ୍ଷଭାବେ ଶଶାଙ୍କ ମନୋହରଙ୍କ କାର୍ଯ୍ୟକାଳ ଶେଷ ହୋଇଛି। ବୁଧବାର ସେ ନିଜ ପଦରୁ ଓହରି ଯାଇଛନ୍ତି। ଆଇସିସି ଅଧ୍ୟକ୍ଷଭାବେ ସେ ୨୦୧୫ ନଭେମ୍ବରରେ ଦାୟିତ୍ୱ ଗ୍ରହଣ କରିଥିଲେ। ”ଦୁଇଥର ୨ ବର୍ଷିଆ କାର୍ଯ୍ୟକାଳ ପରେ ଆଇସିସି ଅଧ୍ୟକ୍ଷ ପଦରୁ ଶଶାଙ୍କ ମନୋହର ଓହରି ଯାଇଛନ୍ତି। ବୁଧବାର ଆଇସିସି ବୋର୍ଡ ବୈଠକ ବସି ତାଙ୍କ ଡେପୁଟି ହଂକଂର ଇମ୍ରାନ ଖ୍ବାଜାଙ୍କୁ ଆନ୍ତରୀଣ ଅଧ୍ୟକ୍ଷ ଦାୟିତ୍ୱ ଅର୍ପଣ କରାଯାଇଛି। ନୂଆ ଅଧ୍ୟକ୍ଷ ନିର୍ବାଚିତ ହେବା ପର୍ଯ୍ୟନ୍ତ ଖ୍ବାଜା ଏହି ଦାୟିତ୍ୱ ସମ୍ଭାଳିବେ“ ବୋଲି ଆଇସିସି ପକ୍ଷରୁ ଏକ ବିବୃତିରେ ପ୍ରକାଶ କରାଯାଇଛି। ଆଇସିସି ନିୟମ ଅନୁସାରେ ମନୋହର ଆଉ ୨ ବର୍ଷ ପାଇଁ ଅଧ୍ୟକ୍ଷ ପଦରେ ରହି ପାରିଥାନ୍ତେ। କାରଣ ଜଣେ ବ୍ୟକ୍ତି ସର୍ବାଧିକ ୩ ଥର ୨ ବର୍ଷିଆ କାର୍ଯ୍ୟକାଳରେ ରହିପାରିବା ନେଇ ନିୟମ ରହିଛି। ୬୨ ବର୍ଷୀୟ ମନୋହର ପୂର୍ବରୁ ୨୦୦୮ରୁ ୨୦୧୧ ପର୍ଯ୍ୟନ୍ତ ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ(ବିସିସିଆଇ)ର ସଭାପତିଭାବେ କାର୍ଯ୍ୟ କରିଥିଲେ। ମନୋହରଙ୍କ ଉତ୍ତରାଧିକାରୀ ପାଇଁ ନିର୍ବାଚନ ସମ୍ପର୍କିତ ନିଷ୍ପତ୍ତି ଆସନ୍ତା ସପ୍ତାହରେ ହେବା ସମ୍ଭାବନା ରହିଛି। ନେତୃତ୍ୱ ନେବାଠାରୁ ଆରମ୍ଭ କରି ଆଇସିସି ଅଧ୍ୟକ୍ଷ ଭାବେ ଏହି କ୍ରୀଡ଼ା ପାଇଁ ମନୋହର ସବୁକିଛି କରିଛନ୍ତି। ତେଣୁ ତାଙ୍କୁ ଧନ୍ୟବାଦ ଜଣାଇଛନ୍ତି ଆଇସିସି ମୁଖ୍ୟ କାର୍ଯ୍ୟନିର୍ବାହୀ ମନୁ ଶାଓ୍ବନେ। ପ୍ରକାଶ ଯୋଗ୍ୟ ଯେ, ଆଇସିସିର ପରବର୍ତ୍ତୀ ଅଧ୍ୟକ୍ଷ ଦୌଡ଼ରେ ପୂର୍ବତନ ଇଂଲଣ୍ଡ ଆଣ୍ଡ ଓ୍ବେଲ୍ସ କ୍ରିକେଟ ବୋର୍ଡ(ଇସିବି) ଅଧ୍ୟକ୍ଷ କଲିନ ଗ୍ରେଭ୍ସ ଓ ଭାରତର ସୌରଭ ଗାଙ୍ଗୁଲି ସର୍ବାଗ୍ରେ ରହିଛନ୍ତି। ତେବେ ସୁପ୍ରିମକୋର୍ଟଙ୍କ ନିଷ୍ପତ୍ତି ଉପରେ ଗାଙ୍ଗୁଲିଙ୍କ ପ୍ରାର୍ଥିତ୍ୱ ନିର୍ଭର କରିବ। ସମ୍ବିଧାନ ଅନୁସାରେ ରାଜ୍ୟ ଓ ବିସିସିଆଇର କର୍ମକର୍ତ୍ତାଭାବେ ଗାଙ୍ଗୁଲିଙ୍କ ୬ ବର୍ଷିଆ କାର୍ଯ୍ୟକାଳ ଜୁଲାଇ ୩୧ରେ ପୂରିବାକୁ ଯାଉଛି। ତେଣୁ ଲୋଧା ପ୍ରଶାସନିକ ସଂସ୍କାର ଅନୁସାରେ ହୋଇଥିବା ନିୟମରେ କୋହଳ କରି ସୁପ୍ରିମକୋର୍ଟ ଗାଙ୍ଗୁଲିଙ୍କୁ ବିସିସିଆଇ ସଭାପତି ଭାବେ କାର୍ଯ୍ୟ ଜାରି ରଖିବାକୁ ଅନୁମତି ଦେଉଛନ୍ତି କି ନାହିଁ ତା’ ଉପରେ ସମସ୍ତଙ୍କ ନଜର ରହିଛି। ଏହା ନ ହୋଇ ପାରିଲେ ଗାଙ୍ଗୁଲି ଆଇସିସି ଅଧ୍ୟକ୍ଷ ପଦପାଇଁ ପ୍ରମୁଖ ଦାବିଦାର ହେବେ। ପୂର୍ବତନ କ୍ରିକେଟ ଓ୍ବେଷ୍ଟଇଣ୍ଡିଜ ମୁଖ୍ୟ ଡେଭିଡ କାମେରନ, ନ୍ୟୁଜିଲାଣ୍ଡର ଗ୍ରେଗର ବାରକ୍ଲେ ଓ ଦକ୍ଷିଣ ଅଫ୍ରିକାର କ୍ରିସ ନେନ୍ଜାନି ମଧ୍ୟ ଏହି ପଦପାଇଁ ଆଗ୍ରହ ଦେଖାଇଛନ୍ତି।
