କୋଲକାତା,୧୬ା୧୧: ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ନେତୃତ୍ୱାଧୀନ କେନ୍ଦ୍ରର ଭାଜପା ସରକାର ପଶ୍ଚିମବଙ୍ଗକୁ ସାମଗ୍ରୀ ଓ ସେବା ଟିକସ (ଜିଏସ୍ଟି) ବାବଦ ବକେୟା ଅର୍ଥ ଦେଉନାହାନ୍ତି। କେବଳ ଏତିକି ନୁହେଁ, ରାଜ୍ୟକୁ ଅନେକ କେନ୍ଦ୍ରୀୟ ଯୋଜନାର ପାଣ୍ଠି ମିଳୁନାହିଁ ବୋଲି ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ ଅଭିଯୋଗ ଆଣିଛନ୍ତି। ବକେୟା ଅର୍ଥ ପାଇବା ପାଇଁ ପ୍ରଧାନମନ୍ତ୍ରୀଙ୍କ ଗୋଡ଼ ତଳେ ପଡ଼ିବି କି ବୋଲି ସେ ପ୍ରଶ୍ନ କରିଛନ୍ତି।
ଝାରଗ୍ରାମରେ ଆଦିବାସୀମାନଙ୍କ ଉଦ୍ଦେଶ୍ୟରେ ଆୟୋଜିତ ଏକ କାର୍ଯ୍ୟକ୍ରମରେ ସ୍ବାଧୀନତା ସଂଗ୍ରାମୀ ବିର୍ସା ମୁଣ୍ଡାଙ୍କ ପ୍ରତିମୂର୍ତ୍ତିରେ ପୁଷ୍ପମାଲ୍ୟ ଅର୍ପଣ କରି ମମତା କହିଥିଲେ, କେନ୍ଦ୍ର ୧୦୦ ଦିନର କର୍ମନିଯୁକ୍ତି ସୁନିଶ୍ଚିତ କରୁଥିବା ଯୋଜନାର ପାଣ୍ଠି ଦେବାକୁ ବାଧ୍ୟ। ବର୍ଷକ ପୂର୍ବେ ସେ ପ୍ରଧାନମନ୍ତ୍ରୀଙ୍କୁ ଭେଟି ଏହି ବିଷୟରେ ଅବଗତ କରାଇଥିଲେ। ତଥାପି ଅର୍ଥ ମିଳିନାହିଁ। ତେଣୁ ସେ ମୋଦିଙ୍କ ଗୋଡ଼ ତଳେ ପଡ଼ି ମାଗିବେ କି ବୋଲି କଟାକ୍ଷ କରିଛନ୍ତି। ଭାଜପାକୁ ଟାର୍ଗେଟ କରି ମମତା ଆହୁରି କହିଛନ୍ତି, ଆମେ ଏକ ଗଣତାନ୍ତ୍ରିକ ରାଷ୍ଟ୍ରରେ ବସବାସ କରୁଛେ ନା ଭାରତ ଏକ ‘ଓ୍ବାନ୍-ପାର୍ଟି କଣ୍ଟ୍ରି’ (ଗୋଟିଏ ଦଳ ଦ୍ୱାରା ପରିଚାଳିତ ଦେଶ)ରେ ପରିଣତ ହୋଇଗଲାଣି। ଆମକୁ ଆମର ପ୍ରାପ୍ୟ ଦିଆଯାଉ। ଏହା ହେଉଛି ଆମ ଟଙ୍କା। ଯଦି ଦେଇପାରୁ ନାହାନ୍ତି ତେବେ ଜିଏସ୍ଟି ଉଚ୍ଛେଦ କରନ୍ତୁ ବୋଲି ମମତା ଦାବି କରିଛନ୍ତି।
