କୋରାପୁଟ,୩୧।୭(ସ୍ବ.ପ୍ର.): କୋରାପୁଟ ଜିଲାରେ କରୋନା କାୟା ବିସ୍ତାର କରି ଚାଲିଥିବା ବେଳେ ଶୁକ୍ରବାରଠାରୁ ୫ ଦିନ ପର୍ଯ୍ୟନ୍ତ ସହରରେ ଥିବା ସହିଦ ଲକ୍ଷ୍ମଣ ନାୟକ ମେଡିକାଲ କଲେଜ ଓ ହସ୍ପିଟାଲକୁ ବନ୍ଦ କରାଯାଇଛି। ଏ ନେଇ କୋରାପୁଟ ଜିଲାପାଳ ମଧୁସୂଦନ ମିଶ୍ର ଶୁକ୍ରବାର ସୂଚନା ଦେଇଛନ୍ତି। ମେଡିକାଲରେ କିଛି ଦିନ ଧରି ବହୁ ସ୍ବାସ୍ଥ୍ୟକର୍ମଚାରୀ କରୋନାରେ ଆଙ୍କ୍ରାନ୍ତ ହେବା ପରେ ମେଡିକାଲ କର୍ତ୍ତୃପକ୍ଷ ଜିଲାପାଳଙ୍କ ସହ ଆଲୋଚନା ହୋଇ ଏହି ଘୋଷଣା କରାଯାଇଛି । ମେଡିକାଲରେ ଜରୁରୀ ଚିକିତ୍ସା ବାଦ୍ ଦେଇ ସମସ୍ତ ଓପିଡିକୁ ବନ୍ଦ କରାଯାଇଛି । ମେଡିକାଲର ମାସ୍କକୁ ବାଧ୍ୟତାମୂଳକ କରାଯାଇଛି।
ସେହିପରି ମେଡିକାଲ ପରିସରରେ ବାହାର ଲୋକଙ୍କ, ଗାଡ଼ି ପାର୍କିଂ ବନ୍ଦ କରାଯାଇଛି । ତଦାରଖ ଲାଗି ବହୁ ପୋଲିସ ମୁତୟନ କରାଯାଇଛି । ମେଡିକାଲ କଲେଜ ଓ ହସ୍ପିଟାଲର ସମସ୍ତ ସ୍ବାସ୍ଥ୍ୟ କର୍ମଚାରୀଙ୍କ ଛୁଟି ବାତିଲ କରାଯାଇଛି ।
ସୂଚନାଯୋଗ୍ୟ, ଗତ ୩ ଦିନ ମଧ୍ୟରେ ଜିଲାରେ ୨୦୫ ଜଣ କୋରନା ପଜିଟିଭ୍ଭ ଚିହ୍ନଟ ହୋଇଥିବାବେଳେ ଶୁକ୍ରବାର ପୁଣି ୮୧ ଚିହ୍ନଟ ହୋଇଛନ୍ତି । ଏହାକୁ ମିଶାଇ ଜିଲାର ମୋଟ ଆଙ୍କ୍ରାନ୍ତଙ୍କ ସଂଖ୍ୟା ୭୬୮କୁ ବୃଦ୍ଧି ପାଇଛି ।
