ନୂଆଦିଲ୍ଲୀ,୮।୮ : କଂଗ୍ରେସ ଏମପି ଗୌରବ ଗୋଗୋଇ ମଙ୍ଗଳବାର ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଏବଂ ଲୋକସଭା ବାଚସ୍ପତି ଓମ ବିର୍ଲାଙ୍କ ମଧ୍ୟରେ ଗୁପ୍ତ ବାର୍ତ୍ତାଳାପ ହୋଇଥିବା ବିଷୟରେ ସେ ଜାଣିଥିବା ନେଇ ଦାବି କରିଛନ୍ତି। ଏହାକୁ ନେଇ ଶାସକ ଏବଂ ବିରୋଧୀଙ୍କ ମଧ୍ୟରେ ବିବାଦ ଉପୁଜିଛି। ବିର୍ଲାଙ୍କୁ ସମ୍ବୋଧିତ କରି ସେ କହିଛନ୍ତି ଓମ ବିର୍ଲା କୌଣସି ପ୍ରକାରେ କଂଗ୍ରେସ ଏମପିଙ୍କ ଦ୍ୱାରା କରାଯାଇଥିବା ବ୍ୟକ୍ତିଗତ ବାର୍ତ୍ତାଳାପ / ଅନୁରୋଧକୁ ସଂସଦରେ ଲିକ କରିଛନ୍ତି। ପିଏମ ମୋଦି ଏବଂ ଓମ ବିର୍ଲାଙ୍କ ମଧ୍ୟରେ ହୋଇଥିବା ଗୁପ୍ତ ବାର୍ତ୍ତାଳାପ ପ୍ରକାଶ କରିବାକୁ ଗୋଗୋଇ ଧମକ ଦେଇ କହିଛନ୍ତି ଆପଣ ଲୋକସଭାର ସଂରକ୍ଷକ। ଏଭଳି କାର୍ଯ୍ୟ କିଭଳି କରାଗଲା।
କଂଗ୍ରେସ ଏମପି ଦାବି କରିଛନ୍ତି, ଆପଣଙ୍କ କାର୍ଯ୍ୟାଳୟ ଭିତରେ ପ୍ରଧାନମନ୍ତ୍ରୀ ମୋଦି ଯାହା କହିଛନ୍ତି ମୁଁ ସମସ୍ତଙ୍କୁ କହିବି କି? କିନ୍ତୁ ମୁଁ ଏହା କରିବାକୁ ଚାହେଁ ନାହିଁ।
ଗୋଗୋଇ ଏହା କହିବା ପରେ କେନ୍ଦ୍ର ସ୍ବରାଷ୍ଟ୍ରମନ୍ତ୍ରୀ ଅମିତ ଶାହା ତାଙ୍କ ମନ୍ତବ୍ୟକୁ ବିରୋଧ କରି ପ୍ରଧାନମନ୍ତ୍ରୀ ମୋଦି ଏବଂ ଲୋକସଭା ବାଚସ୍ପତିଙ୍କ ମଧ୍ୟରେ ହୋଇଥିବା ଗୁପ୍ତ ବାର୍ତ୍ତାଳାପକୁ ପ୍ରକାଶ କରିବାକୁ ଚ୍ୟାଲେଞ୍ଜ କରିଥିଲେ। ଶାହା କହିଛନ୍ତି, ହଁ, ଆମକୁ ଏସମ୍ପର୍କରେ କୁହନ୍ତୁ, ଏଗୁଡ଼ିକ ଗୁରୁତର ଅଭିଯୋଗ। ଅନ୍ୟ ଜଣେ ଭାଜପା ଏମପି ପ୍ରହ୍ଲାଦ ଯୋଶୀ କହିଛନ୍ତି ପ୍ରଧାନମନ୍ତ୍ରୀ ଏବଂ ଲୋକସଭା ବାଚସ୍ପତିଙ୍କ ବିଷୟରେ ଗୌରବ ଗୋଗୋଇ ନିରର୍ଥକ ମନ୍ତବ୍ୟ ଦେଇ ପାରିବେ ନାହିଁ। ଗୌରବ ଗୋଗୋଇ ଓମ ବିର୍ଲାଙ୍କୁ କହିଛନ୍ତି ଆମେ ଆପଣଙ୍କ ସହ ଆମର ବ୍ୟକ୍ତିଗତ ବାର୍ତ୍ତାଳାପକୁ ବ୍ୟକ୍ତିଗତ ରଖିବାକୁ ଚେଷ୍ଟା କରୁଛୁ। ଓମ ବିର୍ଲା ଏହି ଘଟଣାରେ ହସ୍ତକ୍ଷେପ କରି କହିଛନ୍ତି ଆମେ ଏପରି ମନ୍ତବ୍ୟ ଦେବା ଉଚିତ ନୁହେଁ ଯାହା ତଥ୍ୟ ଏବଂ ସତ୍ୟ ଉପରେ ଆଧାରିତ ନୁହେଁ। ଯେତେବେଳେ ପ୍ରହ୍ଲାଦ ଯୋଶୀ ଲୋକସଭାରେ ମୋଦି ସରକାରଙ୍କ ବିରୋଧରେ ଅନାସ୍ଥା ପ୍ରସ୍ତାବର ବିକଳ୍ପ ଆଣିବାକୁ ନେଇ ରାହୁଲ ଗାନ୍ଧୀଙ୍କୁ ଉପହାସ କରିଥିଲେ ସେତେବେଳେ ଗୋଗୋଇ ଏହି ବିବାଦୀୟ ମନ୍ତବ୍ୟ ଦେଇଥିଲେ।
ବାସ୍ତବରେ ପ୍ରହ୍ଲାଦ ଯୋଶୀ କହିଥିଲେ, ଆମକୁ ସୂଚନା ମିଳିଛି ଗୌରବ ଗୋଗୋଇଙ୍କ ସ୍ଥାନରେ ରାହୁଲ ଗାନ୍ଧୀ କହିବେ। କଣ ହେଲା ସାର୍!? ତାଙ୍କଠାରୁ ଶୁଣିବାକୁ ଆମେ ଉତ୍ସାହିତ ଥିଲୁ। ସେ ଏଠାରେ କାହିଁକି ନାହାଁନ୍ତି? ଏହା ପରେ ଗୌରବ ଗୋଗୋଇ ଅନୁମାନ କରିଥିଲେ ଓମ ବିର୍ଲା ପ୍ରହ୍ଲାଦ ଯୋଶୀଙ୍କୁ ଏନେଇ ସୂଚନା ଦେଇଛନ୍ତି। କେନ୍ଦ୍ର ସଂସଦୀୟ ବ୍ୟାପାର ମନ୍ତ୍ରୀ ଦର୍ଶାଇଥିଲେ ଏହି ମାମଲା ସର୍ବସାଧାରଣ ଡୋମେନରେ ଅଛି ଏବଂ ଏହା ଏକ ବିଶେଷ ବାର୍ତ୍ତାଳାପ ନୁହେଁ। ତେବେ କଂଗ୍ରେସ ଏମପି ଅମିତ ଶାହାଙ୍କ ଚ୍ୟାଲେଞ୍ଜର ଉତ୍ତର ଦେବାକୁ ଚତୁରତାର ସହ ଏଡ଼ାଇ ଯାଇ ଅନାସ୍ଥା ପ୍ରସ୍ତାବ ଉପରେ ଆଲୋଚନା ଆରମ୍ଭ କରିଥିଲେ।
