ଭାରତୀୟ ମହିଳା କ୍ରିକେଟ ଦଳର ସବୁଠାରୁ କନିଷ୍ଠ ବ୍ୟାଟ୍ସମ୍ୟାନ ଶେଫାଲୀ ବର୍ମା ଜାନୁୟାରୀ ୧୮ରେ ନିଜର ଜନ୍ମଦିନ ପାଳନ କରୁଛନ୍ତି। ହରିୟାଣାର ରୋହତକ ଜିଲାର ଏହି ଖେଳାଳିଙ୍କୁ ଏକଦା କୌଣସି କ୍ରିକେଟ ଏକାଡେମୀରେ ଆଡ୍ମିଶନ ମିଳୁ ନ ଥିଲା। ତେଣୁ ତାଙ୍କ ବାପା ଝିଅର କେଶ କାଟି ପୁଅ ବେଶରେ ତାଙ୍କର ଏକାଡେମୀରେ ଆଡମିଶନ କରାଇଥିଲେ। ଏକ ଛୋଟିଆ ଗାଁରୁ ଆସିଥିବା ଏହି ଯୁବ ଖେଳାଳି ମାତ୍ର ୨ ବର୍ଷରେ ୧୯ ଟି୨୦ ମ୍ୟାଚ୍ ଖେଳିଛନ୍ତି। ଏପରିକି କ୍ରିକେଟର ଭଗବାନ କୁହାଯାଉଥିବା ସଚିନ୍ ତେନ୍ଦୁଲକରଙ୍କର ୨ଟି ରେକର୍ଡ ମଧ୍ୟ ସେ ଭାଙ୍ଗସାରିଛନ୍ତି।
୨୮ ଜାନୁୟାରୀ, ୨୦୦୪ରେ ହରିୟାଣାର ରୋହତକରେ ଜନ୍ମଗ୍ରହଣ କରିଥିବା ଶେଫାଳୀଙ୍କ ପାଇଁ ପରିଚୟର କୌଣସି ଆବଶ୍ୟକତା ନାହିଁ। ଟମ୍ ବୟ ଲୁକ୍ ବିଶିଷ୍ଟ ଶେଫାଳୀ ଦେଖିବାକୁ ସମସ୍ତଙ୍କଠାରୁ ଭିନ୍ନ। ୨୪ ସେପ୍ଟେମ୍ବର ୨୦୧୯ରେ ଦକ୍ଷିଣ ଆଫ୍ରିକା ବିପକ୍ଷରେ ଭାରତ ପାଇଁ ଡେବ୍ୟୁ କରିଥିବା ଶେଫାଳୀ ହେଉଛନ୍ତି ସବୁଠାରୁ କମ୍ ବୟସ୍କା ମହିଳା କ୍ରିକେଟର। ସେ କମ୍ ବୟସରେ କ୍ରିକେଟରେ ଡେବ୍ୟୁକରି ମାଷ୍ଟର ବ୍ଲାଷ୍ଟର ସଚିନ୍ଙ୍କ ରେକର୍ଡ ଭାଙ୍ଗି ଦେଇଥିଲେ।
ଯେତେବେଳେ ଶେଫାଳୀ ଭାରତୀୟ ଦଳରେ ଡେବ୍ୟୁ କରିଥିଲେ ସେତେବେଳେ ତାଙ୍କୁ ୧୫ ବର୍ଷ, ୭ ମାସ ୨୭ ଦିନ ହୋଇଥିଲା। ମାତ୍ର ସଚିନ ଯେତେବେଳେ ଡେବ୍ୟୁ କରିଥିଲେ ସେତେବେଳେ ତାଙ୍କୁ ୧୬ ବର୍ଷ ହୋଇଥିଲା। ତେଣୁ ଅନ୍ତର୍ଜାତୀୟ କ୍ରିକେଟ ଖେଳିଥିବା ସର୍ବକନିଷ୍ଠ ଖେଳାଳି ହେଉଛନ୍ତି ଶେଫାଲୀ।
ଶେଫାଳୀ ସଚିନଙ୍କ ଆଉ ଏକ ରେକର୍ଡ ମଧ୍ୟ ଭାଙ୍ଗିସାରିଛନ୍ତି। ଯେତେବେଳେ ସେ ୧୫ ବର୍ଷ ୨୮୫ ଦିନର ହୋଇଥିଲେ ଓ୍ବେଷ୍ଟଇଣ୍ଡିଜ୍ ବିପକ୍ଷରେ ୪୯ ବଲରେ ୭୩ ରନ୍ କରିଥିଲେ। ସେହିପରି ସଚିନ୍ ଯେତେବେଳେ କ୍ୟାରିୟରର ପ୍ରଥମ ୫୦ ମାରିଥିଲେ ସେତେବେଳେ ତାଙ୍କୁ ୧୬ ବର୍ଷ ୨୧୪ ଦିନ ହୋଇଥିଲା। ଏଭଳି ପରିସ୍ଥିତିରେ ସେ ୫୦+ ରନ୍ କରିଥିବା ସର୍ବକନିଷ୍ଠ ଖେଳାଳି ହୋଇପାରିଛନ୍ତି।
Posted inଖେଳ