ବ୍ରହ୍ମପୁର ଅଫିସ,୧୭ା୨: ତ୍ରିସ୍ତରୀୟ ପଞ୍ଚାୟତ ନିର୍ବାଚନ ପ୍ରଥମ ପର୍ଯ୍ୟାୟ ଭୋଟଦାନ ବୁଧବାର ସରିଛି। ଗଞ୍ଜାମ ଜିଲା ସଦର ଥାନା ଅନ୍ତର୍ଗତ ରୋହିଗାଁରେ ବୁଧବାର ବିଳମ୍ବିତ ରାତିରେ ଏକ ନିର୍ବାଚନ ପରବର୍ତ୍ତୀ ହିଂସା ଦେଖିବାକୁ ମିଳିଛି। କିଛି ଦୁର୍ବୃତ୍ତ ଗାଁରେ ଥିବା ଏକ ମୋଟର ସାଇକେଲ ମରାମତି ଗ୍ୟାରେଜରେ ନିଆଁ ଲଗାଇ ଦେଇଛନ୍ତି। ଫଳରେ ଗ୍ୟାରେଜରେ ଥିବା ବିଭିନ୍ନ ଗାଡ଼ି ଓ ସାଇକେଲ ପୋଡ଼ି ପାଉଁଶ ହୋଇଯାଇଛି। ଖବର ପାଇ ପୋଲିସ ଓ ଅଗ୍ନିଶମ ବିଭାଗ କର୍ମଚାରୀ ପହଞ୍ଚି ନିଆଁକୁ ଆତ୍ତୟ କରିଥିଲେ। ଗ୍ୟାରେଜ ଭିତରେ ଥିବା ସମସ୍ତ ଗାଡ଼ି ଜଳିପୋଡ଼ି ପାଉଁଶ ହୋଇଯାଇଛି ବୋଲି ବ୍ରହ୍ମପୁର ସହକାରୀ ଅଗ୍ନିଶମ ଅଧିକାରୀ ସନ୍ତୋଷ ପାଣିଗ୍ରାହୀ ସୂଚନା ଦେଇଛନ୍ତି। ଅନ୍ୟପଟେ ଏନେଇ ସଦର ଥାନାରେ ଅଭିଯୋଗ ପରେ ପୋଲିସ ଏ ସଂକ୍ରାନ୍ତରେ ୮୪/୨୨ରେ ୧୦ରୁ ଊର୍ଦ୍ଧ୍ୱ ବ୍ୟକ୍ତିଙ୍କ ନାମରେ ଏକ ମାମଲା ରୁଜୁ କରି ଘଟଣାର ତଦନ୍ତ ଜାରି ରଖିଛି ବୋଲି ଥାନାଧିକାରୀ ମହେନ୍ଦ୍ର କୁମାର ସାହୁ ସୂଚନା ଦେଇଛନ୍ତି।
ଗ୍ୟାରେଜ ମାଲିକ ରବିନ୍ଦ୍ର ନାଥ ଜେନା ଅଭିଯୋଗ କରିଛନ୍ତି ଯେ, ସେ ଏକ ନିର୍ଦ୍ଦିଷ୍ଟ ରାଜନୈତିକ ଦଳର ସରପଞ୍ଚ ପ୍ରାର୍ଥୀଙ୍କ ସମର୍ଥକ ଥିବା ବେଳେ ବୁଧବାର ପୂର୍ବାହ୍ନରେ କେତେକ ବ୍ୟକ୍ତି ତାଙ୍କୁ ଧମକ ଦେଇଥିଲେ। ବୁଧବାର ରାତିରେ ସେ ଘରେ ଥିବା ବେଳେ କିଛି ଯୁବକ ତାଙ୍କ ଦାଣ୍ଡକୁ ଆସି ଗ୍ରୀଲ ବାଡ଼େଇବା ସହ ଘର ବାହାରକୁ ଆସିବାକୁ ତାଙ୍କୁ ଧମକ ଦେଇଥିଲେ। ସେ ଘର ଭିତରେ ଭୟଭୀତ ହୋଇ ରହିଥିବା ବେଳେ ରାତି ପ୍ରାୟ ସାଢ଼େ ୧୧ଟା ବେଳେ ସମ୍ପୃକ୍ତ ଯୁବକମାନେ ତାଙ୍କ ଗ୍ୟାରେଜ ନିଆଁ ଲଗାଇ ଦେଇଥିଲେ। ଫଳରେ ଗ୍ୟାରେଜ ଭିତରେ ଥିବା ସମସ୍ତ ଗାଡ଼ି ଓ ସାଇକେଲ ପୋଡ଼ି ଯାଇଥିବା ନେଇ ସେ ଅଭିଯୋଗ କରିଛନ୍ତି। ଘଟଣା ପରେ ସେଠାକାର ପରିସ୍ଥିତି ଉତ୍ତେଜନା ରହିଥିବା ବେଳେ ରାତିସାରା ପୋଲିସ ଫୋର୍ସ ଉକ୍ତ ଗ୍ରାମରେ ପଇଁତରା ମାରିଥିବା ଜଣାପଡ଼ିଛି। ଗ୍ୟାରେଜ ଥିବା ବିଭିନ୍ନ ଗାଡ଼ି ଓ ସାଇକେଲ ଏପରି ୨ ଲକ୍ଷରୁ ଊର୍ଦ୍ଧ୍ୱ ଟଙ୍କାର ସାମଗ୍ରୀ ପୋଡ଼ି ନଷ୍ଟ ହୋଇଯାଇଥିବା ଗ୍ୟାରେଜ ମାଲିକ ଅଭିଯୋଗ କରିଛନ୍ତି।
