ପାରାଦୀପ,୨୮।୧(ସ୍ବ.ପ୍ର.): ପାରାଦୀପ ବନ୍ଦର ଭିତରୁ ଏକ ଟ୍ରକ (ଓଡି-୨୭ଜେ-୩୭୪୭)ରେ ୩୧ ଟନ କୋକିଂ କୋଇଲା ବିନା କାଗଜପତ୍ରରେ ଯାଉଥିବା ବେଳେ ଶୁକ୍ରବାର ଲକଥାନା ପୋଲିସ ଜବତ କରିଛି। ଏଥିସହ ଟ୍ରକ ଚାଳକ ସର୍ବେଶ୍ୱର ସେଠୀଙ୍କୁ ଗିରଫ କରିଛି। ଏ ନେଇ (ନଂ. ୩୩/୨୩)ରେ ମାମଲା ରୁଜୁ ହୋଇଛି। ଏନେଇ ପୋଲିସ ପାରାଦୀପ ବନ୍ଦର ଭିତରେ ପଶି ଯାଞ୍ଚ କରିବା ପରେ ସେଠାରେ ଥିବା ସୁରକ୍ଷାବଳ ସିଆଇଏସ୍ଏଫ୍ର ଭୂମିକାକୁ ପ୍ରତି ପ୍ରଶ୍ନବାଚୀ ସୃଷ୍ଟି ହୋଇଛି। ସିଆଇଏସ୍ଏଫ୍ର ଜଣ ଜବାନଙ୍କ ସମ୍ପୃକ୍ତି ନେଇ ସାରରେ ତାଙ୍କୁ ନିଲମ୍ବିତ (ସସପେଣ୍ଡ) କରାଯାଇଥିବା ସୂଚନା ମିଳିଛି। ଲକ୍ ଥାନାଧିକାରୀ ଭାବଗ୍ରାହୀ ରାଉତଙ୍କ ସୂଚନା ଅନୁଯାୟୀ, ଉକ୍ତ ଟ୍ରକ୍ରେ ବେଆଇନ୍ ଭାବେ କୋଇଲା ନିଆଯାଉଥିବା ସୂଚନା ପାଇ ଦୋଛକି ପାଖରେ ଯାଞ୍ଚ କରାଯାଇଥିଲା। ଏହି ସମୟରେ ଗାଡ଼ି ଚାଳକ କିଛି କାଗଜପତ୍ର ଦେଖାଇ ପାରିଲେ ନାହିଁ। ବିନା କାଗଜ ପତ୍ରରେ ଗାଡ଼ି କିପରି ବନ୍ଦର ଭିତରେ ପ୍ରବେଶ କଲା ଏବଂ କୋଇଲା ବୋଝେଇ କରି ବାହାରକୁ ଆସିଲା ତାର ଯାଞ୍ଚ କଲାବେଳେ ସିଆଇଏସଏଫ ଜବାନଙ୍କ ସମ୍ପୃକ୍ତ ଥିବା ଜଣାପଡିଛି। ଏହି ଘଟଣାରେ ୫ ଜଣଙ୍କ ଭୂମିକା ଥିବା ଏପର୍ଯ୍ୟନ୍ତ ଜଣାପଡ଼ିଛି। ତେବେ ଅଧିକ ଲୋକଙ୍କ ସମ୍ପୃକ୍ତି ଆଶଙ୍କାରେ ତଦନ୍ତ ଜାରି ରହିଛି ବୋଲି ରାଉତ କହିଛନ୍ତି।
ସୂଚନାଯୋଗ୍ୟ, ବନ୍ଦର ମଧ୍ୟରୁ କୋଇଲା ଚୋରି ଘଟଣାକୁ ନେଇ ଦୁଇବର୍ଷ ହେଲା ବିବାଦ ଲାଗି ରହିଛି। ଏନେଇ ୨୦୨୧ ଅକ୍ଟୋବରରେ ୨୮ ଟ୍ରକ୍ ପାରାଦୀପ ଆଦର୍ଶଥାନା ପୋଲିସ ଜବତ କରିଥିଲା। ସେହିପରି ୨୦୨୨ ଜୁଲାଇରେ ୯ ଟି ଟ୍ରକ ଜବତ କରାଯାଇଥିଲା। ଏନେଇ ଅଧିକ ଚର୍ଚ୍ଚା ହେବାପରେ ବନ୍ଦର କର୍ତ୍ତୃପକ୍ଷ ଦୁଇଟି ଷ୍ଟିଭେଡର୍ସ ସଂସ୍ଥାକୁ କଳା ତାଲିକାଭୁକ୍ତ କରିଥିଲେ ଏବଂ ଆଉ ଗୋଟିଏ ସଂସ୍ଥାକୁ ନୋଟିସ ଜାରି କରିଥିଲେ।
