ରିଷିଡ଼ା, ୧୯।୯ (ସୁଶାନ୍ତ ମଲ୍ଲିକ): କଳାହାଣ୍ଡି ଜିଲା କର୍ଲାମୁଣ୍ଡା ବ୍ଲକ ରିଷିଡ଼ା ଗ୍ରାମର ସୀମନ୍ତିନୀ ସେଠ ସଂସ୍କୃତ ବିଷୟରେ ଗବେଷଣା କରି ପିଏଚ୍ଡି (PhD) ଡିଗ୍ରୀ ହାସଲ କରିଛନ୍ତି। ଏହାସହ ସେ କର୍ଲାମୁଣ୍ଡା ବ୍ଲକର ପ୍ରଥମ ମହିଳା ପିଏଚ୍ଡି ଡିଗ୍ରୀଧାରୀ ହେବାର ଗୌରବ ଅର୍ଜନ କରିଛନ୍ତି। ତାଙ୍କର ଏହି ପ୍ରଶଂସନୀୟ ସଫଳତା ପାଇଁ ସମଗ୍ର ଅଞ୍ଚଳରେ ଖୁସିର ମାହୋଲ ଦେଖାଯାଇଛି।
ସୀମନ୍ତିନୀ ହେଉଛନ୍ତି ରିଷିଡ଼ା ଗ୍ରାମର ଅବସରପ୍ରାପ୍ତ ଶିକ୍ଷକ ସ୍ୱର୍ଗତ ଦୁର୍ବାଦଳ ସେଠ ଓ ମଦନାବତୀ ସେଠଙ୍କ ନାତୁଣୀ ତଥା ବିଶିଷ୍ଟ କଳାକାର ଲକ୍ଷ୍ମୀପ୍ରସାଦ ସେଠ ଓ କିଶୋରୀ ସେଠଙ୍କ କନିଷ୍ଠା କନ୍ୟା। ସେ ଅହମ୍ମଦାବାଦସ୍ଥିତ ଗୁଜୁରାଟ ବିଶ୍ୱବିଦ୍ୟାଳୟରୁ ସଂସ୍କୃତ ବିଭାଗରେ ନିଜର ଗବେଷଣା କାର୍ଯ୍ୟ ସମ୍ପୂର୍ଣ୍ଣ କରିଛନ୍ତି। ମହାକବି କାଳିଦାସଙ୍କ ରଚିତ ‘ରଘୁବଂଶ’ ଉପରେ ଦିନକର ମିଶ୍ରଙ୍କ ସୁବୋଧିନୀ ଟୀକାର ପୁରାତନ ତଥା ଅପ୍ରକାଶିତ ପାଣ୍ଡୁଲିପିକୁ ଆଧାର କରି ଷଷ୍ଠରୁ ନବମ ସର୍ଗ ପର୍ଯ୍ୟନ୍ତ ପାଠର ସମ୍ପାଦନ ଓ ସମୀକ୍ଷାତ୍ମକ ଅଧ୍ୟୟନ କରିଥିଲେ। ତାଙ୍କ ଥେସିସ୍ର ଶୀର୍ଷକ ଥିଲା “An Edition and Critical Study of the Subodhini Commentary on the Raghuvamsa (Sixth to Ninth Cantos) by Dinakara Misra”।
ଡ. ମଞ୍ଜୁଲା ଜେ. ବିରାତିୟାଙ୍କ ମାର୍ଗଦର୍ଶନରେ ସୀମନ୍ତିନୀ ଏହି ଗବେଷଣା ସମ୍ପୂର୍ଣ୍ଣ କରିଛନ୍ତି। ଗତ ସେପ୍ଟେମ୍ବର ୧୭ ତାରିଖରେ ଆୟୋଜିତ ସ୍ୱତନ୍ତ୍ର କାର୍ଯ୍ୟକ୍ରମରେ ବିଭାଗ ମୁଖ୍ୟ ପ୍ରଫେସର ହେତଲ ପାଣ୍ଡ୍ୟା, ବାହ୍ୟ ପରୀକ୍ଷକ ଡ. ଶ୍ୱେତା କେଜୁରେକର ଏବଂ ପ୍ରଫେସର ମୟୁରୀ ଭାଟିଆଙ୍କ ଉପସ୍ଥିତିରେ ତାଙ୍କୁ ଏହି ଡିଗ୍ରୀ ପ୍ରମାଣପତ୍ର ପ୍ରଦାନ କରାଯାଇଥିଲା। ତାଙ୍କର ଏହି ଅତୁଳନୀୟ ସଫଳତା ପାଇଁ ପରିବାରବର୍ଗ, ବୁଦ୍ଧିଜୀବୀ, ଗ୍ରାମବାସୀ ଓ ସମ୍ପର୍କୀୟମାନେ ଗଭୀର ଶୁଭେଚ୍ଛା ଓ ଅଭିନନ୍ଦନ ଜଣାଇଛନ୍ତି।
