କେନ୍ଦ୍ରାପଡ଼ା ଅଫିସ,୨୭ା୧୨: ହାଲକା ଖାଦ୍ୟ ଭାବେ ପାଉଁରୁଟି ଜଣାଶୁଣା। ସ୍ବାସ୍ଥ୍ୟ ପାଇଁ ଆବଶ୍ୟକ କାର୍ବୋହାଇଡ୍ରେଟ୍ ଓ ଅନ୍ୟାନ୍ୟ ଉପାଦାନ ମିଳିଥାଏ। ତେବେ ଏହି ପାଉଁରୁଟି ଏବେ ସୁରକ୍ଷିତ ନୁହେଁ। ବାସି ପାଉଁରୁଟି ଖାଇ କେନ୍ଦ୍ରାପଡ଼ା ବ୍ଲକ କଂସାର ପଞ୍ଚାୟତର ଦୁଇ ଛୋଟ ବାଳକ ଫୁଡ୍ ପଏଜନିଂ ପାଇଁ ଜିଲା ମୁଖ୍ୟ ଚିକିତ୍ସାଳୟରେ ରବିବାର ଭର୍ତ୍ତି ହୋଇଛନ୍ତି। ଯାହା ଏବେ ସ୍ଥାନୀୟ ବୁଦ୍ଧିଜୀବୀଙ୍କ ପାଇଁ ଆଲୋଚନାର ବିଷୟ ହୋଇଛି। କେନ୍ଦ୍ରାପଡ଼ା ଜିଲାର ପ୍ରତି ବ୍ଲକ ଅଞ୍ଚଳ ଓ ସହରରେ ଏହି କାରଖାନା ଗଢ଼ି ଉଠିଥିବା ବେଳେ ଏହାର ଉପତ୍ାଦ ମାନ ପରୀକ୍ଷଣ ହେଉନାହିଁ। ପ୍ୟାକିଂରେ ମାନୁଫାକଚରିଂ ଓ ଏକ୍ସପାଏରି ଡେଟ୍ ନ ଥିବାରୁ ଖାଦ୍ୟର ମାନ ଉପରେ ସର୍ବଦା ସନ୍ଦେହ ରହୁଛି। ଜିଲା ପ୍ରଶାସନ ପକ୍ଷରୁ ଏନେଇ ତନଖିର ଆବଶ୍ୟକତା ଥିବା ବୁଦ୍ଧିଜୀବୀମାନେ ପ୍ରକାଶ କରିଛନ୍ତି। କଂସାର ଗ୍ରାମର ନିରଞ୍ଜନ ପରିଡ଼ା କହିଛନ୍ତି, ଦୁଇବାଳକ ପାଉଁରୁଟି ଖାଇବାର କିଛି ସମୟ ପରେ ବାନ୍ତି ଆରମ୍ଭ ହୋଇଥିଲା। ପରେ ମୁଣ୍ଡ ବୁଲାଇବା ଆରମ୍ଭ ହେବାରୁ ଡାକ୍ତରଖାନାକୁ ଅଣାଯାଇଥିଲା। ଚିକିତ୍ସା ପରେ ସେମାନେ ଘରକୁ ଫେରିଥିଲେ ମଧ୍ୟ ଫୁଡ୍ ପଏଜନିଂ ଏହାର କାରଣ ବୋଲି ଜଣାପଡ଼ିଛି। ଏବେ ଜିଲାର ପ୍ରତି ଗଳି କନ୍ଦିରେ ସ୍ଥାନୀୟ ଅଞ୍ଚଳରେ ନିର୍ମିତ ପାଉଁରୁଟି କାରଖାନା ଗଢ଼ିଉଠିଛି। ଖାଦ୍ୟର ମାନକୁ ନେଇ ଜିଲା ପ୍ରଶାସନ କେବେ ଚଢ଼ାଉ କରିନାହାନ୍ତି ବୋଲି ସେ କ୍ଷୋଭ ପ୍ରକାଶ କରିଛନ୍ତି।
ସାମାଜିକ କର୍ମୀ ଅମରବର ବିଶ୍ୱାଳ କହିଛନ୍ତି, ସହର ଓ ଗ୍ରାମାଞ୍ଚଳରେ ବେକେରି ଫାକ୍ଟ୍ରି ଉପରେ ସରକାରୀ ନଜର ନାହିଁ। ବାସି ସାମଗ୍ରୀ ବିକ୍ରି ସହ ଫାକ୍ଟ୍ରିରେ ଏଥିନେଇ ସାବଧାନତା ନାହିଁ। ଅପମିଶ୍ରିତ ଅଟା ଓ ଦୂଷିତ ପାଣି ପ୍ରତି ସତର୍କତା ନାହିଁ। ନିକଟରେ ଫାକ୍ଟ୍ରିରେ କାମ କରୁଥିବା କର୍ମଚାରୀ ପାଉଁରୁଟି ଉପରେ ଗୋଡ଼ ଥୋଇ ପାକିଂ କରୁଥିବା ଭିଡିଓ ଭାଇରାଲ ହୋଇଥିଲା। ଖାଦ୍ୟ ସାମଗ୍ରୀ ନିରାପତ୍ତା ନେଇ ଆଇନ ଓ ତଦାରଖ ପାଇଁ କର୍ମଚାରୀ ନିଯୁକ୍ତ ଥିଲେ ମଧ୍ୟ ଏ ନେଇ କାର୍ଯ୍ୟାନୁଷ୍ଠାନ ନ ହେବା ଚିନ୍ତାର ବିଷୟ। ବର୍ଷକୁ ଥରେ ଖାଦ୍ୟ ନିରାପତ୍ତା ନେଇ ଫ୍ୟାକ୍ଟ୍ରି ମାଲିକଙ୍କୁ ସାର୍ଟିଫିକେଟ ଦେବା ପରେ ଜିଲା ପ୍ରଶାସନ ଚୁପ୍ ହୋଇ ବସି ରହୁଛନ୍ତି। ଆଇନଜୀବୀ ସରୋଜରାଜ ସିଂହ କୁହନ୍ତି, ୨୦୦୬ ମସିହାରେ ଖାଦ୍ୟ ନିରାପତ୍ତା ଓ ଗୁଣବତ୍ତା ଆଇନ ଅନୁଯାୟୀ ଦି ଫୁଡ୍ ସେଫ୍ଟି ଷ୍ଟାଣ୍ଡାର୍ଡ ଅଥରିଟି ଅଫ୍ ଇଣ୍ଡିଆ (ଏଫଏସ୍ଏସ୍ଏଆଇ) ପ୍ରତିଷ୍ଠା ହୋଇଛି। ଖାଦ୍ୟ ପ୍ରସ୍ତୁତି, ସଂରକ୍ଷଣ, ବିକ୍ରି ଆଦିକୁ ଏହା ମାଧ୍ୟମରେ ନିରୀକ୍ଷଣ କରାଯାଉଛି। ଖାଦ୍ୟର ଉତ୍ତମ ମାନ ଓ ଗୁଣବତ୍ତା ରକ୍ଷା ପାଇଁ ବହୁ ନିୟମ ରହିଛି। ତେବେ ସ୍ଥାନୀୟ ଅଞ୍ଚଳର କେତେଗୋଟି ଫ୍ୟାକ୍ଟ୍ରି ମାଲିକ ଏହାକୁ ମାନିବାକୁ ପ୍ରସ୍ତୁତ ନାହାନ୍ତି। ପ୍ୟାକିଂ ଖାଦ୍ୟ ସାମଗ୍ରୀରେ ଅନୂ୍ୟନ ମାନୁଫାକ୍ଚରିଂ ଓ ଏକ୍ସପାଏରି ଡେଟ୍ ରହିବା କଥା। ଏହାଦ୍ୱାରା ଖାଦ୍ୟର ମାନ, ସମୟ ନିର୍ଦ୍ଧାରିତ ହୋଇପାରିବ। ଏଥିସହ ଖାଦ୍ୟ ମାନ ପରୀକ୍ଷା କେନ୍ଦ୍ର ଜିଲାରେ ନ ଥିବାରୁ ନକଲି ଓ ବାସି ଖାଦ୍ୟ ଉପଭୋକ୍ତାଙ୍କୁ ମିଳୁଛି। ହେଲେ ଆଇନର ଆଶ୍ରୟ ନିଆଯାଇ ପାରୁନାହିଁ। ଏ ସମ୍ପର୍କରେ ଉପଜିଲାପାଳ ନିରଞ୍ଜନ ବେହେରାଙ୍କୁ ପଚାରିବାରେ ବାସି ପାଉଁରୁଟି ଖାଇବା ନେଇ କୌଣସି ଅଭିଯୋଗ ଜିଲା ପ୍ରଶାସନ ନିକଟରେ ପହଞ୍ଚତ୍ ନାହିଁ। ନିକଟରେ ବିଭିନ୍ନ ହୋଟେଲ ଉପରେ ବାସି ଖାଦ୍ୟ ପରିବେଷଣ ନ କରିବା ପାଇଁ ଚଢ଼ାଉ ହୋଇଛି। ପାଉଁରୁଟି ଫ୍ୟାକ୍ଟ୍ରି ସମ୍ପର୍କରେ ତନଖି କରାଯିବ ବୋଲି ସେ କହିଛନ୍ତି।
