ରାଓ୍ବଲପିଣ୍ଡି,୬।୨(ଏପି): ପାକିସ୍ତାନ ବିପକ୍ଷ ଦ୍ୱିତୀୟ ଟେଷ୍ଟ ମ୍ୟାଚ୍ରେ ଦକ୍ଷିଣ ଆଫ୍ରିକା ଟପ୍ ଅର୍ଡର ବ୍ୟାଟ୍ସମ୍ୟାନମାନେ ପୁଣି ଫେଲ ମାରିଛନ୍ତି। ଫଳରେ ଘରୋଇ ଦଳ ସୁବିଧାଜନକ ସ୍ଥିତିରେ ରହିଛି। ସ୍ଥାନୀୟ ରାଓ୍ବଲପିଣ୍ଡି କ୍ରିକେଟ ଷ୍ଟାଡିୟମରେ ଚାଲିଥିବା ଅନ୍ତିମ ମ୍ୟାଚ୍ରେ ଟସ୍ ଜିତି ପାକିସ୍ତାନ ପ୍ରଥମେ ଇନିଂସରେ ୧୧୪.୩ ଓଭରରେ ୨୭୨ ରନକରି ଅଲଆଉଟ ହୋଇଛି। ଜବାବରେ ଦକ୍ଷିଣ ଆଫ୍ରିକା ପ୍ରଥମ ଇନିଂସ ଆରମ୍ଭ କରି ଶୁକ୍ରବାର ଦ୍ୱିତୀୟ ଦିବସ ଖେଳ ଶେଷ ସୁଦ୍ଧା ୨୮ ଓଭରରେ ୪ ଉଇକେଟ ହରାଇ ୧୦୬ ରନ ସଂଗ୍ରହ କରିଛି। ଏଥିସହ ୬ ଉଇକେଟ ହାତରେ ରଖି ଦକ୍ଷିଣ ଆଫ୍ରିକା ୧୬୬ ରନ ପଛରେ ପଡିଛି। ଷ୍ଟମ୍ପ ଅପସାରଣ ବେଳକୁ ଟେମ୍ବା ବଭୁମା ୧୫ ଓ ଅଧିନାୟକ ତଥା ଉଇକେଟକିପର ବ୍ୟାଟ୍ସମ୍ୟାନ କ୍ୱିଣ୍ଟନ ଡି କକ୍ ୨୪ ରନକରି ଅପରଜିତ ରହିଛନ୍ତି। ଦୁଇ ଓପନର ଡିନ୍ ଏଲଗାର ଓ ଏଡେନ ମାରକ୍ରମ ଯଥାକ୍ରମେ ୧୫ ଓ ୩୨ ରନକରି ଆଉଟ ହୋଇଛନ୍ତି। ରାସି ଭାନ ଡେର ଡୁସେନ ଖାତା ଖେଳିପାରି ନ ଥିବା ବେଳେ ଅଭିଜ୍ଞ ଫାଫା ଡୁପ୍ଲେସି ୧୭ ରନକରି ପ୍ୟାଭିଲିୟନ ଫେରିଛନ୍ତି। ପାକିସ୍ତାନ ତରଫରୁ ହାସନ ଅଲି ୨, ଫହିମ ଆଶ୍ରଫ ଓ ନୌମାନ ଅଲି ଗୋଟିଏ ଲେଖାଏ ଉଇକେଟ ଅକ୍ତିଆର କରିଥିଲେ।
ଅସମାପ୍ତ ପ୍ରଥମ ଇନିଂସ ସ୍କୋର ୧୦୬/୪ରୁ ଖେଳ ଆରମ୍ଭ କରି ପାକିସ୍ତାନ ଶୁକ୍ରବାର ଅଲଆଉଟ ହୋଇଥିଲା। ଓଭରନାଇଟ୍ ବ୍ୟାଟ୍ସମ୍ୟାନ ବାବର ଆଜମ ୭୭ ରନରୁ ଖେଳ ଆରମ୍ଭ କରି ଅଧିକ ରନ ସଂଗ୍ରହ କରି ନ ପାରି ସମାନ ସ୍କୋରରେ ଆଉଟ ହୋଇଥିଲେ। ସେହିପରି ୪୨ ରନରୁ ଖେଳ ଆରମ୍ଭ କରି ଫଓ୍ବାଦ ଆଲମ ୪୫ ରନକରି ରନ୍ ଆଉଟ୍ ହୋଇଥିଲେ। ଉଇକେଟକିପର ବ୍ୟାଟ୍ସମ୍ୟାନ ମହମ୍ମଦ ରିଜଓ୍ବାନ ୧୮ ରନ କରି ଆଉଟ ହୋଇଥିବା ବେଳେ ଫହିମ ଆଶ୍ରଫ୍ ୭୮ ରନକରି ଶେଷ ପର୍ଯ୍ୟନ୍ତ ଅପରାଜିତ ରହିଥିଲେ। ଅନ୍ତିମ ୪ ବ୍ୟାଟ୍ସମ୍ୟାନ ଦୁଇଅଙ୍କ ଛୁଇଁ ପାରି ନ ଥିଲେ। ଏହି କ୍ରମରେ ହାସନ ଅଲି, ୟାସିର ଶାହା ଓ ନୌମାନ ଅଲି ୮ ଲେଖାଏ ରନ ସଂଗ୍ରହ କରିଥିଲେ। ଶାହିନ ଶାହା ଆଫ୍ରିଦି ଖାତା ଖୋଲିପାରି ନ ଥିଲେ। ବୋଲିଂରେ ଦକ୍ଷିଣ ଆଫ୍ରିକା ତରଫରୁ ଅନରିଚ ନୋର୍ଜ ସର୍ବାଧିକ ୫, କେଶବ ମହାରାଜ ୩, ଓ୍ବିଆନ ମୁଲ୍ଡର ଗୋଟିଏ ଉଇକେଟ ଅକ୍ତିଆର କରିଥିଲେ। ଦୁଇ ମ୍ୟାଚ୍ ବିଶିଷ୍ଟ ଏହି ସିରିଜରେ ପ୍ରଥମ ମ୍ୟାଚ୍ ଜିତି ପାକିସ୍ତାନ ୧-୦ରେ ଅଗ୍ରଣୀ ହାସଲ କରିଛି।
ସଂକ୍ଷିପ୍ତ ସ୍କୋର:
ପାକିସ୍ତାନ ପ୍ରଥମ ଇନିଂସ- ୧୧୪.୩ ଓଭରରେ ୨୭୨ ଆଲଆଉଟ
(ବାବାର ଆଜମ- ୭୭, ଆଶ୍ରଫ୍- ୭୮*,ଫଓ୍ବାଦ- ୪୫, ନୋର୍ଜ- ୫/୫୬, ମହାରାଜ- ୩/୯୦, ମୁଲ୍ଡର- ୧/୪୦)।
