ରାୟଗଡ଼ା ଅଫିସ,୯ା୪: କୋଭିଡ୍ ଗାଇଡ୍ଲାଇନ ଅନୁଯାୟୀ ସିନେମା ହଲ୍ ପରିସରରେ ଦର୍ଶକଙ୍କ ପ୍ରବଳ ଭିଡ଼ ଯୋଗୁ ରାୟଗଡ଼ାସ୍ଥିତ ଅଶୋକ ସିନେମା ହଲ୍ ଏବଂ ଉଦୟ ପ୍ଲାଜାକୁ ପ୍ରଶାସନ ପକ୍ଷରୁ ଶୁକ୍ରବାର ସିଲ୍ କରାଯାଇଛି। ଜିଲାରୁ ଲଗାତର ୧୦ରୁ ଊର୍ଦ୍ଧ୍ୱ କରୋନା ସଂକ୍ରମିତ ଚିହ୍ନଟ ହେଉଥିବା ବେଳେ ଶୁକ୍ରବାର ୧୫ ପଜିିଟିଭ ଚିହ୍ନଟ ହୋଇଛନ୍ତି। ଏହାକୁ ନେଇ ପ୍ରଶାସନର ଚିନ୍ତା ବଢ଼ିଛି। ଏଭଳି ପରିସ୍ଥିତିରେ ଏକ ତେଲୁଗୁ ଚଳଚ୍ଚିତ୍ର ରିଲିଜ୍ ଯୋଗୁ ଶୁକ୍ରବାର ଦୁଇ ସିନେମା ହଲ୍ ପରିସରରେ ଦର୍ଶକଙ୍କ ଭିଡ଼ ଦେଖିବାକୁ ମିଳିଥିଲା। ଏପରି କି ମାସ୍କ ଓ ସାମାଜିକ ଦୂରତା ମଧ୍ୟ ରହି ନ ଥିଲା। ଏ ବିଷୟରେ ସୂଚନା ପାଇ ଜିଲାପାଳ ସରୋଜ କୁମାର ମିଶ୍ର ଏବଂ ଏସ୍ପି ବିବେକାନନ୍ଦ ଶର୍ମା ସେଠାରେ ପହଞ୍ଚିଥିଲେ। କୋଭିଡ୍ ଗାଇଡ୍ଲାଇନ ଖିଲାପ ହେଉଥିବା ଦେଖି ଦୁଇ ସିନେମା ହଲ୍କୁ ଅନିର୍ଦ୍ଦିଷ୍ଟ କାଳ ପାଇଁ ସିଲ୍ କରିଥିଲେ। ରାଜ୍ୟ ସରକାର ହଲ୍ରେ ୫୦ ପ୍ରତିଶତ ଦର୍ଶକଙ୍କ ପାଇଁ ଅନୁମତି ଦେବା ସହ ନିୟମକୁ କଡ଼ାକଡ଼ି ପାଳନ କରିବାକୁ ନିର୍ଦ୍ଦେଶ ଦେଇଛନ୍ତି। କିନ୍ତୁ ରାୟଗଡ଼ାଠାରେ ସମସ୍ତ ନିୟମ ଉଲ୍ଲଂଘନ କରାଯାଇଥିଲା। ତେଣୁ ପ୍ରଶାସନ ପକ୍ଷରୁ ଏଭଳି ପଦକ୍ଷେପ ନିଆଯାଇଥିବା ସୂଚନା ଦିଆଯାଇଛି।
