ଆଗ୍ରା, ୩।୮ : ଉତ୍ତରପ୍ରଦେଶର ଜଣେ ବ୍ୟକ୍ତି ଜୀବିତ ହୋଇ ମଧ୍ୟ ସରକାରୀ କାଗଜ ପତ୍ରରେ ମୃତ ଘୋଷିତ। ନାମ ହେଉଛି ଗଙ୍ଗା ସିଂ। ବୟସ ୮୦ ବର୍ଷ। ଠିକଣା ମୌଜା ଜାଫରପୁର, ମୈନପୁରୀ। ଏହା ହେଉଛି ଏକ ତିକ୍ତ ସତ୍ୟ ଯାହା ସରକାରୀ କାର୍ଯ୍ୟର ବେପରୁଆ ଚେହେରାକୁ ପ୍ରକାଶ କରୁଛି। କିନ୍ତୁ ଉତ୍ତରପ୍ରଦେଶର ସରକାରୀ ବିଭାଗ ଭୁଲକୁ ଗ୍ରହଣ କରିବାକୁ ପ୍ରସ୍ତୁତ ନୁହନ୍ତି।
କାଗଜପତ୍ରରେ ମୃତ ଲିପିବଦ୍ଧ ହୋଇଥିବା ବ୍ୟକ୍ତିମାନେ ନିଜକୁ ଜୀବନ୍ତ କରିବାକୁ ଚିତ୍କାର କରୁଛନ୍ତି। ସରକାରୀ ବିଭାଗର ଦ୍ୱାରରୁ ଦ୍ୱାର ବୁଲିବା ପରେ ପୀଡିତ ନ୍ୟାୟ ପାଇଁ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥଙ୍କୁ ନିବେଦନ କରିଛନ୍ତି। କୃଷକ ଗଙ୍ଗା ସିଂଙ୍କର ଦୁଇ ଜଣ ପୁଅ ଅଛନ୍ତି। ଗଙ୍ଗା ସିଂ ତାଙ୍କ ସ୍ତ୍ରୀ ହୋମଶ୍ରୀ ଏବଂ ପୁଅମାନଙ୍କ ସହିତ ମିଳିମିଶି ରୁହନ୍ତି। ସେ ଚାଷ ଜମି, ବୃଦ୍ଧାବୃଦ୍ଧ ପେନସନ ଏବଂ କିଷାନ ସମ୍ମାନ ନିଧି ଟଙ୍କାରୁ ଜେଣତେଣ ଚଳନ୍ତି। ଜୁଲାଇ ୩ ରେ ଯେତେବେଳେ ଗଙ୍ଗା ସିଂ ପେନସନ ଆଣିବା ପାଇଁ ସହରରେ ଅବସ୍ଥିତ ବ୍ୟାଙ୍କରେ ପହଞ୍ଚିଥିଲେ, ସେତେବେଳେ ବ୍ୟାଙ୍କ କର୍ମଚାରୀ ତାଙ୍କ ଟଙ୍କା ଆସିବା ବନ୍ଦ ହୋଇଥିବା କହିଲେ।
ବିବ୍ରତ ଗଙ୍ଗା ସିଂ ସାମାଜିକ କଲ୍ୟାଣ କାର୍ଯ୍ୟାଳୟକୁ ଗଲେ। ଗଙ୍ଗା ସିଂଙ୍କ ଅନୁଯାୟୀ, ଯେତେବେଳେ କର୍ମଚାରୀ କମ୍ପ୍ୟୁଟରରେ ପାସବୁକ ଏବଂ ଆଧାର କାର୍ଡ ନମ୍ବର ପ୍ରବେଶ କରିଥିଲେ, ସେତେବେଳେ ରେକର୍ଡରେ ତାଙ୍କର ମୃତ୍ୟୁ ଘଟିଥିବା ଜଣାପଡିଥିଲା।
ସାମାଜିକ କଲ୍ୟାଣ ବିଭାଗର କର୍ମଚାରୀମାନେ ଏହି କାର୍ଯ୍ୟ ନଗର ପଞ୍ଚାୟତର ବୋଲି କହି ମାମଲାକୁ ଏଡ଼ାଇ ଯାଇଥିଲେ। ଏହା ପରେ ଗଙ୍ଗା ନଗର ପଞ୍ଚାୟତ କାର୍ଯ୍ୟାଳୟକୁ ଆସିଥିଲେ। ଅନେକ ଥର ଯିବା ପରେ କର୍ମଚାରୀମାନେ କହିଥିଲେ ଯେ ଭୁଲ ହେତୁ ତାଙ୍କ ନାମ ମୃତକଙ୍କ ତାଲିକାରେ ସ୍ଥାନ ପାଇଛି। ଶୀଘ୍ର ଏହା ଟିକ୍ କରାଯିବ। ମାତ୍ର ଏକ ମାସ ପରେ ମଧ୍ୟ ଗଙ୍ଗା ସିଂ ସରକାରୀ କାଗଜପତ୍ରରେ ମୃତ ହୋଇ ରହିଛନ୍ତି।
ଗଙ୍ଗା ସିଂ କହିଛନ୍ତି ଯେ ଏହି ସମୟ ମଧ୍ୟରେ ସେ ଅଭିଯୋଗ ସହିତ ଅନେକ ଅଧିକାରୀଙ୍କ ନିକଟକୁ ଯାଇଥିଲେ, କିନ୍ତୁ କେହି ଶୁଣିଲେ ନାହିଁ। ବର୍ତ୍ତମାନ ସେ ମୁଖ୍ୟମନ୍ତ୍ରୀଯୋଗୀ ଆଦିତ୍ୟନାଥଙ୍କ ନିକଟକୁ ଏକ ଚିଠି ପଠାଇଛନ୍ତି ଯେ ତାଙ୍କୁ ଜୀବନ୍ତ ଘୋଷଣା କରାଯାଉ। କାର୍ଯ୍ୟାନୁଷ୍ଠାନ ନିଆଯାଇଛି ।
ପ୍ରାୟ ଦେଢ଼ମାସ ପୂର୍ବେ ସରକାରୀ ଯୋଜନାର ଯୋଗ୍ୟ ବ୍ୟକ୍ତିଙ୍କ ଉପରେ ଏକ ସର୍ଭେ ହୋଇଥିଲା। ବୃଦ୍ଧାବୃଦ୍ଧ ପେନସନ, ବିଧବା ପେନସନ, ଭିନ୍ନକ୍ଷମ ପେନସନ ଇତ୍ୟାଦି ପାଇଁ ଏହା କରାଯାଇଥିଲା। ଏହି ସର୍ଭେରେ ନାଗର ପଞ୍ଚାୟତ କର୍ମଚାରୀ ଗଙ୍ଗା ସିଂଙ୍କୁ ମୃତ ବୋଲି ଦର୍ଶାଇଥିଲେ। ଗଙ୍ଗା ସିଂ କହିଛନ୍ତି ଯେ ସରକାରୀ ଯୋଜନାରୁ ମିଳୁଥିବା ଟଙ୍କା ଯୋଗୁ ସେ ଏବଂ ତାଙ୍କ ସ୍ତ୍ରୀ ବଞ୍ଚିଛନ୍ତି। ବର୍ତ୍ତମାନ ପେନନନ ବନ୍ଦ ଯୋଗୁ ସେମାନେ ଆର୍ଥିକ ସଙ୍କଟର ସମ୍ମୁଖୀନ ହେଉଛନ୍ତି।
