ନୂଆଦିଲ୍ଲୀ, ୫।୫: ମହାମାରୀ ଯୋଗୁ ବର୍ଷେରୁ ଊର୍ଦ୍ଧ୍ୱ ସମୟ ହେଲା କେବଳ ଅନ୍ଲାଇନରେ ପାଠପଢ଼ା ଚାଲିଛି। ଏହାକୁ ନେଇ ସୁପ୍ରିମକୋର୍ଟ କେତେକ ଉଲ୍ଲେଖନୀୟ ମତାମତ ଦେଇଛନ୍ତି, ଯାହା ସ୍କୁଲ୍ କଲେଜ ଓ ଅନ୍ୟାନ୍ୟ ଶିକ୍ଷାନୁଷ୍ଠାନ ପାଇଁ ପ୍ରଯୁଜ୍ୟ। ଜଷ୍ଟିସ୍ ଏ.ଏମ୍. ଖନଓ୍ବିଲକରଙ୍କ ନେତୃତ୍ୱରେ ଗଠିତ ସୁପ୍ରିମକୋର୍ଟ ଖଣ୍ଡପୀଠ ଏକ ରାୟରେ କହିଛନ୍ତି, ସ୍କୁଲ୍ ଓ ଶିକ୍ଷାନୁଷ୍ଠାନଗୁଡ଼ିରେ ବର୍ଷେରୁ ଊର୍ଦ୍ଧ୍ୱ ସମୟ ହେଲା ପ୍ରତ୍ୟକ୍ଷ କ୍ଲାସ୍ ହେଉନାହିଁ। କ୍ୟାମ୍ପସ୍ ବନ୍ଦ ରହିଥିବାରୁ ସ୍କୁଲଗୁଡ଼ିକ ପରିଚାଳନା, ବିଦ୍ୟୁତ, ଜେନେରେଟର ଚଳାଇବା ପାଇଁ ପେଟ୍ରୋଲ/ଡିଜେଲ୍, ପାଣି ଖର୍ଚ୍ଚ, ପରିମଳ ଖର୍ଚ୍ଚ କମାଇବା ପାଇଁ ବାଧ୍ୟ। ପିଲାମାନଙ୍କୁ ଯେଉଁ ସୁବିଧା ମିଳୁନାହିଁ, ସେଥିପାଇଁ ଦେୟ ନେବା ଅର୍ଥ ଲାଭଖୋରି ଏବଂ ବ୍ୟବସାୟୀକରଣ ବୋଲି ଖଣ୍ଡପୀଠ କହିଛନ୍ତି। ଉପରୋକ୍ତ ମତାମତ ଦେବା ସହ ସର୍ବୋଚ୍ଚ ଅଦାଲତ ରାଜସ୍ଥାନର ଘରୋଇ ସ୍କୁଲଗୁଡ଼ିକୁ ୨୦୨୦-୨୧ ବର୍ଷ ପାଇଁ ବାର୍ଷିକ ସ୍କୁଲ ଦେୟ ୧୫ ପ୍ରତିଶତ ହ୍ରାସ କରିବା ନିମନ୍ତେ ନିର୍ଦ୍ଦେଶ ଦେଇଛନ୍ତି।
ସୂଚନାଯୋଗ୍ୟ ରାଜସ୍ଥାନର ଘରେଇ ସ୍କୁଲ୍ଗୁଡ଼ିକ ୩୦ ପ୍ରତିଶତ ଦେୟ ହ୍ରାସ କରିବା ଲାଗି ରାଜ୍ୟ ସରକାର ନିର୍ଦ୍ଦେଶ ଦେଇଥିଲେ। ହାଇକୋର୍ଟ ମଧ୍ୟ ଉକ୍ତ ନିର୍ଦ୍ଦେଶକୁ କାଏମ ରଖିଥିଲେ। ଏହା ବିରୋଧରେ କେତେକ ଘରୋଇ ସ୍କୁଲ୍ ସୁପ୍ରିମକୋର୍ଟଙ୍କ ଦ୍ୱାରସ୍ଥ ହୋଇଥିଲେ। ସର୍ବୋଚ୍ଚ ଅଦାଲତ ମାମଲାର ଶୁଣାଣି କରି ଉପରୋକ୍ତ ନିର୍ଦ୍ଦେଶ ଦେଇଛନ୍ତି।
