ଲକ୍ଷ୍ନୌ,୧ ।୩: କରୋନା ମାହାମାରୀ କାରଣରୁ ପାଖାପାଖି ୧୧ ମାସ ହେବ ଅଧିକାଂଶ ରାଜ୍ୟରେ ଶିକ୍ଷାନୁଷ୍ଠାନ ବନ୍ଦ ରହିଥିଲା । ଦୀର୍ଘଦିନ ପରେ ସ୍କୁଲ ଆସିଥିବା ପିଲାମାନେ ନିଜ ସହପାଠୀଙ୍କୁ ଦେଖି ଆତ୍ମ ବିଭୋର ହୋଇ ପଡିଥିଲେ । ଏହାସହ ପିଲାଙ୍କୁ ସ୍ୱାଗତ କରିବା ଲାଗି ସ୍କୁଲ ମଧ୍ୟ ପ୍ରସ୍ତୁତ ହୋଇ ରହିଥିଲା । କେଉଁଠି ପିଲାଙ୍କୁ କେକ୍ କାଟି ସ୍ୱାଗତ କରାଯାଇଥିଲା ତ ଆଉ କେଉଁଠି ପିଲାଙ୍କ ଉପରେ ପୁଷ୍ପ ବୃଷ୍ଟି କରାଯାଇଥିଲା । ପୁଣି ସ୍କୁଲ ଗୃହକୁ ଓ ପ୍ରବେଶ ପଥକୁ ବେଲୁନ୍ ଲଗାଇ ସଜା ଯାଇଥିଲା । ଏହାସହ କରୋନା ପ୍ରୋଟୋକଲକୁ ବି ପାଳନ କରାଯାଇଥିଲା । ଯେମିତି ସମସ୍ତ ପିଲାଙ୍କ ଥର୍ମାଲ ସ୍କ୍ରିନିଂ ସହ ମାସ୍କ ପିନ୍ଧିବା ବାଧ୍ୟତାମୂଳକ କରାଯାଇଥିଲା । ଏହାସହ ସମସ୍ତ ପିଲାଙ୍କୁ ସାମାଜିକ ଦୂରତା ରକ୍ଷା କରି ବସିବାକୁ ନିର୍ଦ୍ଦେଶ ଦିଆଯାଇଥିଲା । ତେବେ ସରକାରଙ୍କ ନିର୍ଦ୍ଦେଶ କ୍ରମେ କେବଳ ୫୦ ପ୍ରତିଶତ ପିଲା ଗୋଟିଏ ଦିନରେ ଉପସ୍ଥିତ ଥିବା ଦେଖାଯାଇଥିଲା ।
