ନୂଆଦିଲ୍ଲୀ,୧୨ ।୧: ସୁପ୍ରିମକୋର୍ଟ ଗୁରୁବାର କହିଛନ୍ତି, ଭାରତୀୟ ଜନତା ପାର୍ଟି(ଭାଜପା) ନେତା ସୁବ୍ରମଣ୍ୟମ ସ୍ୱାମୀ ରାମ ସେତୁକୁ ନେଇ ଦାଖଲ କରିଥିବା ପିଆଇଏଲର ଶୁଣାଣି ଫେବୃୟାରୀରେ କରାଯିବ । ସୁବ୍ରମଣ୍ୟମ ସ୍ୱାମୀ ରାମ ସେତୁକୁ ଜାତୀୟ ଐତିହ୍ୟ ଘୋଷଣା କରିବାକୁ ଦାବି କରିଛନ୍ତି । କୋର୍ଟ କହିଛନ୍ତି ଏହି ମାମଲାର ଶୁଣାଣି ଫେବୃୟାରୀ ଦ୍ୱିତୀୟ ସପ୍ତାହରେ କରାଯିବ ।
ସୁପ୍ରିମକୋର୍ଟର ମୁଖ୍ୟ ବିଚାରପତି ଡିୱାଇ ଚନ୍ଦ୍ରଚୁଡ ଓ ଜଷ୍ଟିଶ ପିଏସ ନିରସିଂହାଙ୍କ ବେଞ୍ଚ କହିଛନ୍ତି, ଏହି ମାମଲାର ଶୁଣାଣି ତୁରନ୍ତ କରାଯାଇ ପାରିବ ନାହିଁ । କାରଣ ଏବେ ସମ୍ବିଧାନ ପୀଠରେ ଶୁଣାଣି ଜାରି ରହିଛି ।
ଭାରତୀୟ ଜନତା ପାର୍ଟି(ଭାଜପା) ନେତା ସ୍ୱାମୀ କହିଛନ୍ତି, ସଲିସିଟର ଜେନରାଲ ଏହି ପ୍ରସଙ୍ଗରେ ଉତ୍ତର ଦେବାକୁ ପ୍ରତିଶ୍ରୁତି ଦେଇଛନ୍ତି ଏବଂ କ୍ୟାବିନେଟ ସଚିବଙ୍କୁ ଏ ନେଇ ସମନ ଜାରି କରାଯିବା ଉଚିତ । ସେ କହିଛନ୍ତି, ଯେ ଡିସେମ୍ବର ୧୨ ସୁଦ୍ଧା ଏସଜି ତୁଷାର ମେହେଟ୍ଟା ଏକ କାଉଣ୍ଟର ଆଫିଡେଭିଟ୍ ଦାଖଲ କରିବାକୁ କହିଛନ୍ତି । ହେଲେ ଏହାର ଉତ୍ତର ଏବେ ପର୍ଯ୍ୟନ୍ତ ଦାଖଲ କରାଯାଇନାହିଁ । ଏହା ପୂର୍ବରୁ ସରକାରଙ୍କ ଉତ୍ତର ପ୍ରସ୍ତୁତ ବୋଲି କୁହାଯାଇଥିଲା ।
ସ୍ୱାମୀଙ୍କ ଏହି ଯୁକ୍ତି ଉପରେ ମେହେଟ୍ଟା କହିଛନ୍ତି ଯେ, ଏହି ଦାବି ଉପରେ ଆଲୋଚନା ଚାଲିଛି ଏବଂ ସରକାର ଏହାକୁ ବିଚାର କରୁଛନ୍ତି । ଫେବୃୟାରୀ ପ୍ରଥମ ସପ୍ତାହରେ ଏହାର ଶୁଣାଣି ପାଇଁ ସେ କୋର୍ଟଙ୍କୁ କହିଛନ୍ତି ।
