ନୂଆଦିଲ୍ଲୀ,୨।୧୨: ଦିଲ୍ଲୀ ଏମସିଡି ନିର୍ବାଚନ ଉପରେ ରୋକ ଲଗାଇବାକୁ ହୋଇଥିବା ଆବେଦନକୁ ସୁପ୍ରିମକୋର୍ଟ ଖାରଜ କରିଦେଇଛନ୍ତି। କୋର୍ଟ କହିଛନ୍ତି, ସମୟ ଗଡିବା ସହିତ ଏହି ଆବେଦନ ଭିତ୍ତିହୀନ ହୋଇଛି। ତେଣୁ ଏହା ଉପରେ ରୋକ ଲଗାଯିବ ନାହିଁ।
ନ୍ୟାଶ୍ନାଲ୍ ୟୁଥ୍ ପାର୍ଟି ଦ୍ୱାରା ଦାଖଲ ହୋଇଥିବା ଏକ ଆବେଦନ ଉପରେ ସୁପ୍ରିମକୋର୍ଟ ଶୁଣାଣି କରିଥିଲେ। ଏଥିରେ ନିର୍ବଚନ ପାଇଁ ୱାର୍ଡର ସୀମା ନିର୍ଦ୍ଧାରଣ କରାଯିବା ସହିତ ଏମସିଡି ନିର୍ବାଚନକୁ ରୋକ କରିବାକୁ ଦାବି କରାଯାଇଥିଲା। ଜଷ୍ଟିସ ସଞ୍ଜୟ କିଶାନ କୌଲ ଏବଂ ଅଭୟ ଏସ ଓକାଙ୍କ ଏକ ଖଣ୍ଡପୀଠ ଏହି ମାମଲାର ଶୁଣାଣି କରି କହିଛନ୍ତି, ରବିବାର ମତଦାନ ହେବ, ତେଣୁ ସେମାନେ ଏହି ସମୟରେ ନିର୍ବାଚନରେ ହସ୍ତକ୍ଷେପ କରିପାରିବେ ନାହିଁ। ଆବେଦନକାରୀ ନଭେମ୍ବର ୯ରେ ଦିଲ୍ଲୀ ହାଇକୋର୍ଟଙ୍କ ଆଦେଶକୁ ଚ୍ୟାଲେଞ୍ଜ କରିଥିଲେ, ଯେଉଁଥିରେ କୋର୍ଟ ମ୍ୟୁନିସିପାଲିଟି ନିର୍ବାଚନରେ ହସ୍ତକ୍ଷେପ କରିବାକୁ ମନା କରିଦେଇଥିଲେ।
ସୂଚନାଯୋଗ୍ୟ, ଦିଲ୍ଲୀ ଏମସିଡି ନିର୍ବାଚନ ପାଇଁ ଭୋଟ ଡିସେମ୍ବର ୪ରେ ଅନୁଷ୍ଠିତ ହେବ। ଏବଂ ଭୋଟ ଗଣନା ଡିସେମ୍ବର ୭ରେ ହେବ।
