ଅନୁଗୋଳ ଅଫିସ୍, ୩।୭: ଅନୁଗୋଳ ଜିଲାରେ ଶୁକ୍ରବାର ୨୪ ନୂଆ କରୋନା ପଜିଟିଭ୍ ଚିହ୍ନଟ ପରେ କଠୋର ହୋଇଛି ପ୍ରଶାସନ। କରୋନା ସଂକ୍ରମଣ ବୃଦ୍ଧି ରୋକିବାକୁ ଏଣିକି ପ୍ରତି ସପ୍ତାହର ଶନିବାର ଓ ରବିବାର ଜିଲାକୁ ଶଟ୍ଡାଉନ୍ ରଖାଯିବ। ୩୧ ତାରିଖ ପର୍ଯ୍ୟନ୍ତ ଏହି କଟକଣା ଜାରି ରହିବ ବୋଲି ଶୁକ୍ରବାର ପ୍ରଶାସନ ପକ୍ଷରୁ ଘୋଷଣା କରାଯାଇଛି। ତେବେ ଏଟିଏମ୍, ଓମଫେଡ୍ ଓ ଔଷଧ ଦୋକାନ ପରି ଅତ୍ୟାବଶ୍ୟକ ସେବାକୁ ଏଥିରୁ ବାଦ୍ ଦିଆଯାଇଥିବା ଜିଲାପାଳ ମନୋଜ କୁମାର ମହାନ୍ତି ସୂଚନା ଦେଇଛନ୍ତି।
ଏହି ନୂଆ ୨୪ ଆକ୍ରାନ୍ତଙ୍କୁ ମିଶାଇ ଅନୁଗୋଳ ଜିଲାରେ ମୋଟ୍ ପଜିଟିଭ ସଂଖ୍ୟା ୯୬ରେ ପହଞ୍ଚିଛି। ଇତିମଧ୍ୟରେ ଅନୁଗୋଳ ଜିଲାରେ ଜଣେ କରୋନା ସଂକ୍ରମିତଙ୍କ ମୃତ୍ୟୁ ମଧ୍ୟ ହୋଇସାରିଛି। ତେଣୁ ପରିସ୍ଥିତି ଅଧିକ ବିଗିଡ଼ିଯିବା ପୂର୍ବରୁ ଜିଲା ପ୍ରଶାସନ ପକ୍ଷରୁ ଏଭଳି କଠୋର ନିଷ୍ପତ୍ତି ନିଆଯାଇଛି। ଏହି ଶଟ୍ଡାଉନ୍ ଯୋଗୁ ଅନୁଗୋଳରେ ଗୋଷ୍ଠୀ ସଂକ୍ରମଣ ଆଶଙ୍କାକୁ କମ୍ କରାଯାଇପାରିବ। ତେବେ ସପ୍ତାହର ଅନ୍ୟ ୫ ଦିନ ଜିଲାର ସମସ୍ତ ବ୍ୟବସାୟୀକ ଅନୁଷ୍ଠାନ ସକାଳ ୭ଟାରୁ ଅପରାହ୍ନ ୨ଟା ପର୍ଯ୍ୟନ୍ତ ଖୋଲା ରହିବ ବୋଲି ଜିଲାପାଳ ନିର୍ଦ୍ଦେଶ ଦେଇଛନ୍ତି। ଏଥିସହ ଶଟ୍ଡାଉନ୍ ୨ ଦିନ ସମସ୍ତ ଔଷଧ ଦୋକାନ, ମେଡିକାଲ ସେବା, ସରକାରୀ ଅଫିସ, ଗଣମାଧ୍ୟମ, ଜଳ ଯୋଗାଣ, ପରିମଳ, ବିଦ୍ୟୁତ୍ ଯୋଗାଣ, ଶିଳ୍ପସଂସ୍ଥା, ନିର୍ମାଣ କାର୍ଯ୍ୟ, ମାଲ୍ ପରିବହନ, ହୋଟେଲ, ରେଳ ଯାତାୟତ, ପେଟ୍ରୋଲ ପମ୍ପ ଆଦି ଚାଲୁ ରହିବ ବୋଲି ଜିଲା ପ୍ରଶାସନ ପକ୍ଷରୁ ସୂଚନା ପ୍ରଦାନ କରାଯାଇଛି। ଖବରକାଗଜ ବିକ୍ରେତା ସକାଳ ୬ରୁ ୯ଟା ପର୍ଯ୍ୟନ୍ତ ବିତରଣ କରିପାରିବେ। ବିବାହ ଓ ଅନ୍ତ୍ୟେଷ୍ଟିକ୍ରିୟା ଲାଗି ପ୍ରଶାସନର ଅନୁମତି ନେବା ବାଧ୍ୟତାମୂଳକ କରାଯାଇଛି। ଏହି ନିୟମ ଉଲ୍ଲଂଘନ କଲେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ଜିଲାପାଳ କହିଛନ୍ତି।
