ରାଜକୋଟ,୧୬।୨: ଷ୍ଟାର ଯୁବ ବ୍ୟାଟ୍ସମ୍ୟାନ ସରଫରାଜ ଖାନ ରାଜକୋଟରେ ଇଂଲଣ୍ଡ ବିପକ୍ଷରେ ଚମତ୍କାର ଡେବ୍ୟୁ କରିଥିଲେ। ତାଙ୍କର ପ୍ରଥମ ମ୍ୟାଚ୍ର ପ୍ରଥମ ଇନିଂସରେ ସରଫରାଜ ଖାନ ୬୨ ରନ୍ର ଦ୍ରୁତ ଅର୍ଦ୍ଧଶତକ କରିଥିଲେ। ଡେବ୍ୟୁ ମ୍ୟାଚରେ ଏହି ଯୁବ ବ୍ୟାଟ୍ସମ୍ୟାନ ଜବରଦସ୍ତ ବ୍ୟାଟିଂ କରୁଥିଲେ, ରବିନ୍ଦ୍ର ଜାଡେଜାଙ୍କ ଭୁଲ କଲ ଯୋଗୁ ଶେଷରେ ସେ ଆଉଟ ହୋଇଥିଲେ। ରାଜକୋଟରେ ଡେବ୍ୟୁ ମ୍ୟାଚରେ ଆଉଟ ହେବା ପରେ ମଧ୍ୟ ସରଫରାଜ ଖାନ ଭାରତର ପୂର୍ବତନ କିମ୍ବଦନ୍ତୀ ତଥା ତାଙ୍କୁ ଡେବ୍ୟୁ କ୍ୟାପ ଦେଇଥିବା ଅନିଲ କୁମ୍ବଲେଙ୍କ ରେକର୍ଡ ସହ ସମକକ୍ଷ ହୋଇଥିଲେ।
ସରଫରାଜଙ୍କ ପୂର୍ବରୁ ଅନିଲ କୁମ୍ବଲେ ୯ ଅଗଷ୍ଟ ୧୯୯୦ରେ ମଞ୍ଚେଷ୍ଟରରେ ଇଂଲଣ୍ଡ ବିପକ୍ଷରେ ଟେଷ୍ଟ ଡେବ୍ୟୁ କରିଥିଲେ। ସରଫରାଜଙ୍କ ପରି କୁମ୍ବଲେ ମଧ୍ୟ ତାଙ୍କର ପ୍ରଥମ ଟେଷ୍ଟର ପ୍ରଥମ ଇନିଂସରେ ରନ୍ଆଉଟ ହୋଇଥିଲେ। ତେବେ କୁମ୍ବଲେ ତାଙ୍କର ପ୍ରଥମ ଟେଷ୍ଟ ଇନିଂସରେ ମାତ୍ର ୨ ରନ ସ୍କୋର କରିବାରେ ସକ୍ଷମ ହୋଇଥିଲେ। ଯାହା ସରଫରାଜଙ୍କ ପ୍ରଥମ ଇନିଂସଠାରୁ ୬୦ ରନ କମ ଅଟେ।
ରାଜକୋଟ ଟେଷ୍ଟରେ ପୂର୍ବତନ ଭାରତୀୟ ସ୍ପିନ ବୋଲର ଅନିଲ କୁମ୍ବଲେ ସରଫରାଜ ଖାନଙ୍କୁ ଡେବ୍ୟୁ ଟେଷ୍ଟ କ୍ୟାପ ପ୍ରଦାନ କରିଥିଲେ। ଏଭଳି ପରିସ୍ଥିତିରେ ଇଂଲଣ୍ଡ ବିପକ୍ଷରେ ଡେବ୍ୟୁ ଟେଷ୍ଟ କ୍ୟାପ ନେଇ କୁମ୍ବଲେଙ୍କ ରେକର୍ଡ ସହ ସମକକ୍ଷ କରିବା ଏକ ମଜାଦାର ଘଟଣା।
