ଭୁବନେଶ୍ୱର, ୨୧।୨(କ୍ରୀଡ଼ା ପ୍ରତିନିଧି): ସନ୍ତୋଷ ଟ୍ରଫି ଫୁଟ୍ବଲ ଟୁର୍ନାମେଣ୍ଟର ଅନ୍ତିମ ରାଉଣ୍ଡ ଏଠାରେ ଶେଷ ହୋଇଛି। ସୋମବାର ଅନୁଷ୍ଠିତ ଗ୍ରୁପ୍ ବି’ର ୩ଟି ମ୍ୟାଚ୍ରେ ସର୍ଭିସେସ୍, ମେଘାଳୟ ଓ ଦିଲ୍ଲୀ ଦଳ ବିଜୟ ହାସଲ କରିଛନ୍ତି। ଏଥିସହ ପ୍ରତିଯୋଗିତାର ସେମିଫାଇନାଲ ଲାଇନ୍ଅପ୍ ହୋଇଯାଇଛି। ଗ୍ରୁପ୍ ଏ’ର ଶୀର୍ଷ ଦଳ ପଞ୍ଜାବ ପ୍ରଥମ ସେମିଫାଇନାଲରେ ଗ୍ରୁପ୍ ବି’ର ଦ୍ୱିତୀୟ ଦଳ ମେଘାଳୟକୁ ଭେଟିବ। ସେହିପରି ଗ୍ରୁପ୍ ବି’ର ଶୀର୍ଷ ଦଳ ସର୍ଭିସେସ୍ ଦ୍ୱିତୀୟ ସେମିଫାଇନାଲରେ ଗ୍ରୁପ୍ ଏ’ର ଦ୍ୱିତୀୟ ସ୍ଥାନୀୟ ଦଳ କର୍ନାଟକ ସହିତ ମୁକାବିଲା କରିବ। ୨ଟି ଯାକ ସେମିଫାଇନାଲ ମାର୍ଚ୍ଚ ୧ରେ ସାଉଦି ଆରବର କିଙ୍ଗ୍ ଫହଦ ଇଣ୍ଟରନ୍ୟାଶନାଲ ଷ୍ଟାଡିୟମରେ ଅନୁଷ୍ଠିତ ହେବ। ପ୍ରତିଯୋଗିତାର ଫାଇନାଲ ଏହି ଭେନ୍ୟୁରେ ୪ ତାରିଖରେ ଖେଳାଯିବ। ସୂଚନାଯୋଗ୍ୟ, ମେଘାଳୟ ପ୍ରଥମଥର ପାଇଁ ସନ୍ତୋଷ ଟ୍ରଫିର ସେମିଫାଇନାଲରେ ପ୍ରବେଶ କରି ଇତିହାସ ରଚିଛି।
କ୍ୟାପିଟାଲ ଫୁଟ୍ବଲ ଆରେନାରେ ସୋମବାର ଅନୁଷ୍ଠିତ ମ୍ୟାଚ୍ରେ ସର୍ଭିସେସ୍ ୪-୦ ଗୋଲରେ ରେଲ୍ଓ୍ବେକୁ ପରାସ୍ତ କରିଛି। ଏଥିରେ ପରାଜୟ ଫଳରେ ରେଲ୍ଓ୍ବେର ସେମିଫାଇନାଲ ଆଶା ଧୂଳିସାତ୍ ହୋଇଛି। ପ୍ରଥମ ଅଧଘଣ୍ଟା ତୀବ୍ର ସଂଘର୍ଷ ପରେ ବିଜୟୀ ଦଳ ପକ୍ଷରୁ ଓନିଅମ ଗୌତମ ସିଂ ୩୨ ଓ ୪୯ ଏବଂ ଆଦର୍ଶ ମତ୍ତୁମଲ ୩୪ ଓ ୬୫ତମ ମିନିଟରେ ୨ଟି ଲେଖାଏ ଗୋଲ ଦେଇଥିଲେ। ଉତ୍ତମ ପ୍ରଦର୍ଶନ ପାଇଁ ଆଦର୍ଶ ମତ୍ତୁମଲ ପ୍ଲେୟର ଅଫ୍ ଦି ମ୍ୟାଚ୍ ବିବେଚିତ ହୋଇଥିଲେ। ସପ୍ତମ ବାଟାଲିୟନ ଗ୍ରାଉଣ୍ଡରେ ଆୟୋଜିତ ଅନ୍ୟ ଏକ ମ୍ୟାଚ୍ରେ ମେଘାଳୟ ୨-୧ ଗୋଲରେ ପଶ୍ଚିମବଙ୍ଗକୁ ହରାଇ ଦେଇଛି। ପଶ୍ଚିମବଙ୍ଗ ପକ୍ଷରୁ ସୌଗତ ହାଂସ୍ଦା ୩୬ତମ ମିନିଟ୍ରେ ପ୍ରଥମ ଗୋଲ ଦେଇ ଦଳକୁ ଅଗ୍ରଣୀ କରାଇଥିଲେ। ମେଘାଳୟ ପକ୍ଷରୁ ଆଲେନ କାମ୍ପର ଲିଙ୍ଗ୍ଡୋ ନୋଙ୍ଗବ୍ରି ୪୪ତମ ମିନିଟ୍ରେ ଗୋଲଟି ପରିଶୋଧ କରିଦେଇଥିଲେ। ଏହି ଦଳର ନିକେଲସନ ବିନା ପ୍ରଥମାର୍ଦ୍ଧର ଇଞ୍ଜୁରି ଟାଇମ୍ ୪୫+୩ ମିନିଟ୍ରେ ଦେଇଥିବା ଗୋଲ୍ଟି ନିର୍ଣ୍ଣାୟକ ହୋଇଥିଲା। ଦ୍ୱିତୀୟାର୍ଦ୍ଧରେ ଖେଳ ଖୁବ୍ ରୋମାଞ୍ଚକ ହୋଇଥିଲେ ହେଁ କେହି ଗୋଲ ଦେଇପାରି ନ ଥିଲେ। ମେଘାଳୟର ନିକେଲସନ ବିନା ପ୍ଲେୟର ଅଫ୍ ଦି ମ୍ୟାଚ୍ ପୁରସ୍କାର ପାଇଥିଲେ। କ୍ୟାପିଟାଲ ଫୁଟ୍ବଲ ଆରେନାରେ ଅନୁଷ୍ଠିତ ଅନ୍ୟ ଏକ ମ୍ୟାଚ୍ରେ ଦିଲ୍ଲୀ ୨-୦ ଗୋଲରେ ମଣିପୁରକୁ ହରାଇ ଦେଇଛି। ଦିଲ୍ଲୀ ଦଳର ଅଜୟ ସିଂ ୧୮ ଓ ୪୫+୧ ମିନିଟ୍ରେ ୨ଟି ଯାକ ଗୋଲ ଦେଇଥିଲେ। ଫଳରେ ତାଙ୍କୁ ପ୍ଲେୟର ଅଫ୍ ଦି ମ୍ୟାଚ୍ ପୁରସ୍କାର ପ୍ରଦାନ କରାଯାଇଥିଲା। ଟୁର୍ନାମେଣ୍ଟର ଅନ୍ତିମ ରାଉଣ୍ଡରେ ଦିଲ୍ଲୀର ଏହା ଥିଲା ପ୍ରଥମ ବିଜୟ।
