ଘରୋଇ ଫୁଟ୍ବଲର ମର୍ଯ୍ୟାଦାଜନକ ଟୁର୍ନାମେଣ୍ଟ ସନ୍ତୋଷ ଟ୍ରଫି ୨୦୨୨-୨୩ ସିଜନର ସେମିଫାଇନାଲ ପର୍ଯ୍ୟାୟ ଶେଷ ହୋଇଛି। ଏଥର ପ୍ରତିଯୋଗିତାର ନକ୍ଆଉଟ ମ୍ୟାଚଗୁଡ଼ିକ ସାଉଦି ଆରବର କିଙ୍ଗ୍ ଫହଦ ଇଣ୍ଟରନ୍ୟାଶନାଲ ଷ୍ଟାଡିୟମରେ ଅନୁଷ୍ଠିତ ହେଉଛି। ପ୍ରଥମ ସେମିଫାଇନାଲରେ ପଞ୍ଜାବକୁ ହରାଇ ମେଘାଳୟ ଏବଂ ଦ୍ୱିତୀୟ ସେମିରେ ସର୍ଭିସେସ୍କୁ ପରାସ୍ତ କରି କର୍ନାଟକ ଫାଇନାଲରେ ପ୍ରବେଶ କରିଛି…
ଘରୋଇ ଫୁଟବଲର ମର୍ଯ୍ୟାଦାଜନକ ଟୁର୍ନାମେଣ୍ଟ ସନ୍ତୋଷ ଟ୍ରଫି ୨୦୨୨-୨୩ ସିଜନର ସେମିଫାଇନାଲ ପର୍ଯ୍ୟାୟ ଶେଷ ହୋଇଛି। ଏଥର ପ୍ରତିଯୋଗିତାର ନକ୍ଆଉଟ ମ୍ୟାଚଗୁଡ଼ିକ ସାଉଦି ଆରବର କିଙ୍ଗ୍ ଫହଦ ଇଣ୍ଟରନ୍ୟାଶନାଲ ଷ୍ଟାଡିୟମରେ ଅନୁଷ୍ଠିତ ହେଉଛି। ପ୍ରଥମ ସେମିଫାଇନାଲରେ ପଞ୍ଜାବକୁ ହରାଇ ମେଘାଳୟ ଏବଂ ଦ୍ୱିତୀୟ ସେମିରେ ସର୍ଭିସେସ୍କୁ ପରାସ୍ତ କରି କର୍ନାଟକ ଫାଇନାଲରେ ପ୍ରବେଶ କରିଛି। ଆସନ୍ତା ଶନିବାର ଫାଇନାଲ ଅନୁଷ୍ଠିତ ହେବ। ମେଘାଳୟ ପ୍ରଥମଥରପାଇଁ ଟାଇଟଲ ପର୍ଯ୍ୟାୟରେ ପହଞ୍ଚତ୍ ଇତିହାସ ରଚିଛି।
ପ୍ରତିଯୋଗିତାର ଅନ୍ତିମ ରାଉଣ୍ଡ ପର୍ଯ୍ୟାୟ ଭୁବନେଶ୍ୱରର ୩ଟି ପଡ଼ିଆରେ ଅନୁଷ୍ଠିତ ହୋଇଥିଲା। ରାଜ୍ୟ ସରକାରଙ୍କ କ୍ରୀଡ଼ା ବିଭାଗ ଓ ଫୁଟବଲ ଆସୋସିଏଶନ ଅଫ୍ ଓଡ଼ିଶା (ଫାଓ) ମିଳିତ ଆନୁକୂଲ୍ୟରେ ଏହା ଆୟୋଜିତ ହୋଇଥିଲା। ଫ୍ରାଞ୍ଚାଇଜ୍ଭିତ୍ତିକ ଇଣ୍ଡିଆନ ସୁପର ଲିଗ୍ (ଆଇଏସ୍ଏଲ୍)ରେ ଓଡ଼ିଶା ଏଫ୍ସିର ମ୍ୟାଚଗୁଡ଼ିକ ପରି ଏଥର ସନ୍ତୋଷ ଟ୍ରଫି ମଧ୍ୟ କଳିଙ୍ଗ ଷ୍ଟାଡିୟମରେ ଆୟୋଜନ ହେବା ଏକ ସ୍ବାଗତଯୋଗ୍ୟ ପଦକ୍ଷେପ ଥିଲା। ସନ୍ତୋଷ ଟ୍ରଫି ଭାରତରେ ୧୯୪୧ରୁ ଆରମ୍ଭ ହୋଇଥିଲା। ମହାରାଜା ସାର୍ ମନ୍ମଥ ନାଥ ରାୟ ଚୌଧୁରୀଙ୍କ ନାମ ଅନୁସାରେ ଏହାର ନାମକରଣ ହୋଇଥିଲା। ରନରଅପ୍ ଟ୍ରଫିର ନାମ କମଲା ଗୁପ୍ତା ରଖାଯାଇଛି। ସନ୍ତୋଷ ଟ୍ରଫିରେ ବେଙ୍ଗଲ ୩୧ଥର, ପଞ୍ଜାବ ୮ ଥର, କେରଳ ଓ ଗୋଆ ୫ ଥର ଲେଖାଏ ଚାମ୍ପିୟନ ହୋଇଛନ୍ତି। ଏଥରକୁ ମିଶାଇ ଓଡ଼ିଶାରେ ମୋଟ ୪ର୍ଥ ଥରପାଇଁ ସନ୍ତୋଷ ଟ୍ରଫି ଆୟୋଜିତ ହୋଇଛି। ପୂର୍ବରୁ ୩ ଥର କଟକର ବାରବାଟୀ ଷ୍ଟାଡିୟମରେ ଏହା ୧୯୬୭, ୧୯୮୦ ଓ ୧୯୯୪ରେ ଅନୁଷ୍ଠିତ ହୋଇଥିଲା। ଆଇଏସ୍ଏଲ୍ ଏବଂ ଆଇ-ଲିଗ୍ ଆରମ୍ଭ ହେବାପରେ ସର୍ବଭାରତୀୟ ଫୁଟବଲ ଫେଡେରେଶନ ପକ୍ଷରୁ ସନ୍ତୋଷ ଟ୍ରଫିର ନିୟମରେ ପରିବର୍ତ୍ତନ କରାଯାଇଛି। ପୂର୍ବରୁ ବାରବାଟୀରେ ଅନୁଷ୍ଠିତ ମ୍ୟାଚଗୁଡ଼ିକରେ ଭାରତର ନାମଜାଦା ଖେଳାଳିମାନେ ଅଂଶଗ୍ରହଣ କରୁଥିଲେ। ମାତ୍ର ଆଇଏସ୍ଏଲ୍ ଏବଂ ଆଇ-ଲିଗ୍ର ପ୍ରଚଳନ ପରେ ସନ୍ତୋଷ ଟ୍ରଫିରେ ଆଉ ନାମୀ ଖେଳାଳିଙ୍କ ଅଂଶଗ୍ରହଣ ଦେଖିବାକୁ ମିଳୁନାହିଁ।
ସନ୍ତୋଷ ଟ୍ରଫିକୁ ଅଧିକ ଆକର୍ଷଣୀୟ କରିବାପାଇଁ ଏଆଇଏଫ୍ଏଫ୍ ସଭାପତି ତଥା ପୂର୍ବତନ ଅନ୍ତର୍ଜାତୀୟ ଖେଳାଳି କଲ୍ୟାଣ ଚୌବେ ଏଥର ନକ୍ଆଉଟ୍ ମ୍ୟାଚଗୁଡ଼ିକୁ ବିଦେଶରେ କରାଇବା ପାଇଁ ନିଷ୍ପତ୍ତି ନେଇଥିଲେ। ସେହି ଅନୁସାରେ ଏବେ ସାଉଦି ଆରବରେ ମ୍ୟାଚ ଖେଳାଯାଉଛି। ଖେଳାଳିଙ୍କ ପାଇଁ ଏହା ନିଶ୍ଚିତ ଉତ୍ସାହଜନକ ପଦକ୍ଷେପ। ଓଡ଼ିଶା ଦଳ ଯୋଗ୍ୟତା ହାସଲ ଟୁର୍ନାମେଣ୍ଟ ଏବଂ ଲିଗ୍ର ଅନ୍ତିମ ପର୍ଯ୍ୟାୟରେ ଭଲ ଖେଳିଥିଲା। ମହାରାଷ୍ଟ୍ର ଏବଂ କର୍ନାଟକ ସହିତ ମ୍ୟାଚ ଡ୍ର ରଖି ଗୋଆକୁ ପରାସ୍ତ କରିଥିଲା। ଦୁର୍ଭାଗ୍ୟଜନକଭାବେ କେରଳ ଓ ପଞ୍ଜାବ ନିକଟରୁ ହାରିଯିବାରୁ ସେମିଫାଇନାଲ ଦୌଡ଼ରୁ ବାଦ୍ ପଡ଼ିଥିଲା। ସନ୍ତୋଷ ଟ୍ରଫି ପାଇଁ ପ୍ରଚାର ଓ ପ୍ରସାର କମ୍ ରହିଥିବା ପରି ମନେ ହୋଇଥିଲା। ଫୁଟବଲ ଏକ ଲୋକପ୍ରିୟ ଖେଳ ହୋଇଥିବାରୁ ଷ୍ଟାଡିୟମରେ ଦର୍ଶକ ରହିଥିଲେ ଓଡ଼ିଶା ଦଳ ନିଶ୍ଚିତ ଆହୁରି ଭଲ ପ୍ରଦର୍ଶନ କରି ପାରିଥାନ୍ତା। ଆଇଏସ୍ଏଲ୍ରେ ଓଡ଼ିଶା ଏଫ୍ସିକୁ ଯେପରି ପ୍ରୋତ୍ସାହନ ଦିଆଯାଉଛି ରାଜ୍ୟ ସରକାର ସେପରି ସୁବିଧା ସୁଯୋଗ ଦେଲେ ସନ୍ତୋଷ ଟ୍ରଫି ପାଇଁ ମନୋନୀତ ଓଡ଼ିଶା ଦଳ ନିଶ୍ଚିତ ଆଗାମୀ ଦିନରେ ଆହୁରି ଭଲ ପ୍ରଦର୍ଶନ କରିପାରିବ ଏବଂ ଫାଇନାଲକୁ ଯାଇପାରିବ।
ପ୍ରଫୁଲ୍ଲ କୁମାର ମିଶ୍ର
