ନୂଆଦିଲ୍ଲୀ,୧୬।୯: ଆଫଗାନିସ୍ତାନ ବିପକ୍ଷରେ ଦ୍ୱିତୀୟ ଟି-୨୦ ମ୍ୟାଚରେ ବ୍ୟାଟରେ ଜବରଦସ୍ତ ଜବାବ ଦେଇଛନ୍ତି ସଞ୍ଜୁ ସାମସନ। ପ୍ରଥମ ମ୍ୟାଚରେ ମାତ୍ର ୧୦ ରନ କରି ଆଉଟ ହୋଇଥିବା ସଞ୍ଜୁ ଦିଲ୍ଲୀର ଅରୁଣ ଜେଟଲୀ ଷ୍ଟାଡିୟମରେ ଦ୍ୱିତୀୟ ମୁକାବିଲାରେ ନିଜ ଆକ୍ରମଣାତ୍ମକ ଅନ୍ଦାଜ ଦେଖାଇଛନ୍ତି। ମାତ୍ର ୨୨ଟି ବଲେରେ ୫୭ ରନର ବିସ୍ଫୋରକ ଇନିଂସ ଖେଳିଛନ୍ତି ସେ। ଏହି ପାରିରେ ତାଙ୍କ ଷ୍ଟ୍ରାଇକ ରେଟ୍ ୨୫୯.୦୯ ରହିଥିଲା।
ଦ୍ୱିତୀୟ ଟି-୨୦ରେ ମଧ୍ୟ ବୈଭବ ସୂର୍ଯ୍ୟବଂଶୀଙ୍କୁ ପ୍ଲେଇଂ ଇଲେଭେନରେ ସ୍ଥାନ ମିଳିନଥିବା ବେଳେ ସଞ୍ଜୁ ସାମସନଙ୍କୁ ଦଳରେ ବଜାୟ ରଖାଯାଇଥିଲା। ସଞ୍ଜୁ ଅଭିଷେକ ଶର୍ମାଙ୍କ ସହ ଭାରତର ଇନିଂସ ଆରମ୍ଭ କରିଥିଲେ। ଉଭୟ ଓପନର ଆରମ୍ଭରୁ ହିଁ ଆଫଗାନିସ୍ତାନ ବୋଲରଙ୍କ ଉପରେ ଚାପ ସୃଷ୍ଟି କରିଥିଲେ। ପାୱାରପ୍ଲେରେ ଭାରତ ୮୨ ରନ ସଂଗ୍ରହ କରିଥିବା ବେଳେ ପ୍ରଥମ ଉଇକେଟ୍ ପାଇଁ ସଞ୍ଜୁ ଓ ଅଭିଷେକଙ୍କ ମଧ୍ୟରେ ୮୮ ରନର ଭାଗୀଦାରି ହୋଇଥିଲା।
ସଞ୍ଜୁ ଇନିଂସର ଆରମ୍ଭରୁ ହିଁ ଆକ୍ରମଣାତ୍ମକ ବ୍ୟାଟିଂ କରିଥିଲେ। ମାତ୍ର ୨୦ଟି ବଲରେ ସେ ଅର୍ଦ୍ଧଶତକ ପୂରଣ କରିଥିଲେ। ଅର୍ଦ୍ଧଶତକ ପରେ ମଧ୍ୟ ତାଙ୍କ ବ୍ୟାଟରଗତି କମିନଥିଲା। ଶେଷରେ ୨୨ ବଲରେ ୫୭ ରନ କରି ସେ ଆଉଟ ହୋଇଥିଲେ। ତାଙ୍କ ଏହି ଧୂଆଁଧାର ପାରିର ଷ୍ଟ୍ରାଇକ ରେଟ ୨୫୯.୦୯ ଥିଲା। ଏହି ଇନିଂସ ସହ ସଞ୍ଜୁ ସାମସନ ଟି-୨୦ ଇଣ୍ଟରନ୍ୟାସନାଲରେ ଭାରତ ପାଇଁ ଓପନର ଭାବେ ୧୦୦୦ ରନ ପୂରଣ କରିଛନ୍ତି। ଏହି ଉପଲବ୍ଧି ହାସଲ କରିଥିବା ଭାରତର ପଞ୍ଚମ ଓପନର ହୋଇଛନ୍ତି ସଞ୍ଜୁ।
ଭାରତ ପାଇଁ ଟି-୨୦ ଇଣ୍ଟରନ୍ୟାସନାଲରେ ଓପନର ଭାବେ ସର୍ବାଧିକ ରନ କରିଥିବା ଖେଳାଳିଙ୍କ ତାଲିକାରେ ରୋହିତ ଶର୍ମା ୩୭୫୦ ରନ ସହ ଶୀର୍ଷରେ ଅଛନ୍ତି। ଏହାପରେ କେଏଲ ରାହୁଲ ୧୮୨୬, ଶିଖର ଧାୱନ ୧୭୫୯, ଅଭିଷେକ ଶର୍ମା ୧୭୨୬ ଏବଂ ସଞ୍ଜୁ ସାମସନ ୧୦୨୬ ରନ କରିଛନ୍ତି। ଓପନର ଭାବେ ସଞ୍ଜୁଙ୍କ ଷ୍ଟ୍ରାଇକ ରେଟ ୧୮୧.୫୯ ରହିଛି।
