ବ୍ରହ୍ମବରଦା,୧୬ା୧(ଡି.ଏନ.ଏ.):ରସୁଲପୁର ବ୍ଲକ୍ ଅନ୍ତର୍ଗତ ବ୍ରହ୍ମବରଦା ଓ ମହେଶ୍ୱପୁର ପଞ୍ଚାୟତରେ ଲଘୁଖଣିଜ୍ୟ ପରିବହନ ସମୟରେ ମହେଶ୍ୱରପୁର ପଞ୍ଚାୟତସ୍ଥିତ ବ୍ରାହ୍ମଣୀ ସେତୁ ଉପରେ ଚାଖଣ୍ଡେ ମୋଟ ବହଳର ବାଲି ଜମି ହୋଇ ରହିଛି। ଫଳରେ ସେତୁ ଉପରେ ବାଇକ୍ ଓ ସାଇକେଲ ଚାଳକ ଯାତାୟାତ କରୁଥିବା ସମୟରେ ବାଲି ଉଡ଼ି ଆଖିରେ ପଡ଼ିବାରୁ ଦୁର୍ଘଟଣା ଘଟୁଛି। ବ୍ରହ୍ମବରଦା, ମହେଶ୍ୱରପୁର ଓ ବନ୍ଧଡ଼ିହ ଅଞ୍ଚଳ ଦେଇ ଯାଇଥିବା ବ୍ରାହ୍ମଣୀ ନଦୀରେ ବେଆଇନ ବାଲିଘାଟରୁ ବାଲି ଉତ୍ତୋଳନ କରାଯାଇ ଜିଲା ବାହାରକୁ ଚାଲାଣ କରାଯାଉଛି। ଫଳରେ ସରକାର ଏଠାରୁ ବିପୁଳ ଟଙ୍କାର ରାଜସ୍ବ ହରାଉଛନ୍ତି। ଏଥିସହିତ ଭାରିଯାନ ଯାତାୟାତ ଫଳରେ ରାସ୍ତା ଫାଟି ଆଁ କଲାଣି। ଭାରିଯାନରେ ଆବଶ୍ୟକତାଠାରୁ ଅତ୍ୟଧିକ ପରିମାଣ ବାଲି ପରିବହନ ହେବା ଫଳରେ ରାସ୍ତା ଉପରେ ବାଲି ଗଦା ହେଉଛି। ରାସ୍ତାକଡ଼ରେ ଥିବା ଜଳଖିଆ ଦୋକାନଗୁଡ଼ିକରେ ବାଲି ଉଡ଼ି ପଡୁଛି। ଦିନରେ ଭାରିଯାନ ଯାତାୟାତ ଫଳରେ ରାସ୍ତା ଜାମ ହେବାର ମଧ୍ୟ ଦେଖିବାକୁ ମିଳୁଛି। ବାଲି ପରିବହନ କରୁଥିବା ଭାରିଯାନର ଚାଳକଙ୍କ ଖାମଖିଆଲ ମନୋଭାବ ଯୋଗୁ ରାସ୍ତା ଉପରେ ହେଉ କି ସେତୁ ଉପରେ ହେଉ ବାଲି ପଡୁଛି। ସେତୁ ଉପରେ ପଡ଼ିଥିବା ବାଲିକୁ ପ୍ରଶାସନ ପକ୍ଷରୁ ସଫା କରାଯାଉନାହିଁ। ଯଦ୍ଦ୍ବାରା ବାଇକ୍ ଓ ସାଇକେଲ ଆରୋହୀ ଅଧିକ ଦୁର୍ଘଟଣାଗ୍ରସ୍ତ ହେଉଛନ୍ତିି।
ଏଣୁ ବାଲି ପରିବହନ କରୁଥିବା ଯାନବାହନ ବାଲିକୁ ଘୋଡ଼ାଇ ନେବା ଏବଂ ଓଭର ଲୋଡିଂ ପରିବହନ ବନ୍ଦ କରିବାକୁ ଦାବି ହୋଇଛି। ଏହା ନ ହେଲେ ଆଗକୁ ଦୁର୍ଘଟଣା ବଢିବା ଆଶଙ୍କାକୁ ଆଡ଼େଇ ଦିଆଯାଇ ନ ପାରେ। ତତ୍ସହିତ ଦିନ ସମୟରେ ବାଲି ପରିବହନ ବନ୍ଦ କରିବାକୁ ଅଞ୍ଚଳବାସୀ ଦାବି କରିଛନ୍ତି। ଏ ଦିଗରେ ରସୁଲପୁର ତହସିଲଦାର ଦୃଷ୍ଟିଦେବାକୁ ସେମାନେ ଅନୁରୋଧ କରିଛନ୍ତି।
