ନୂଆଦିଲ୍ଲୀ,୧୭।୪: ସମାଜବାଦୀ ପାର୍ଟି(ଏସ୍ପି)ର ବରିଷ୍ଠ ନେତା ତଥା ପୂର୍ବତନ ରାଜ୍ୟ ମନ୍ତ୍ରୀ ଆଜମ୍ ଖାନ୍ଙ୍କୁ ସୋମବାର ଦିଲ୍ଲୀସ୍ଥିତ ସାର୍ ଗଙ୍ଗାରାମ ହସ୍ପିଟାଲରେ ଭର୍ତ୍ତି କରାଯାଇଛି। ଚିକିତ୍ସା ପରେ ତାଙ୍କ ସ୍ବାସ୍ଥାବସ୍ଥା ସ୍ଥିର ଥିବା ହସ୍ପିଟାଲ ପକ୍ଷରୁ କୁହାଯାଇଛି। ଏକ ଡାକ୍ତରୀ ଦଳ ଆଜମ୍ଙ୍କ ସ୍ବାସ୍ଥ୍ୟ ପ୍ରତି ନଜର ରଖିଛନ୍ତି।
ମିଳିଥିବା ସୂଚନା ମୁତାବକ, ହଠାତ୍ ଆଜମ୍ଙ୍କ ସ୍ବାସ୍ଥ୍ୟାବସ୍ଥା ବିଗିଡ଼ିଯାଇଥିଲା। ଫଳରେ ତାଙ୍କୁ ଗଙ୍ଗାରାମ ହସ୍ପିଟାଲରେ ଭର୍ତ୍ତି କରାଯାଇଛି। ସୂଚନାଯୋଗ୍ୟ, ଆଜମ୍ ରାମପୁର ବିଧାନସଭା ନିର୍ବାଚନମଣ୍ଡଳୀରୁ ଏମ୍ପି ଏବଂ ୧୦ଥର ବିଧାୟକ ହୋଇଛନ୍ତି। ଉତ୍ତେଜିତ ଭାଷଣ ଦେବା ମାମଲାରେ ସ୍ଥାନୀୟ କୋର୍ଟ ତାଙ୍କୁ ଦଣ୍ଡିତ କରିବା ପରେ ତାଙ୍କ ବିଧାନସଭା ସଦସ୍ୟତା ବାତିଲ କରାଯାଇଥିଲା।
