ସୁୁନ୍ଦରଗଡ଼, ୫।୨: ଫୁଟବଲ ଆସୋସିଏଶନ ଅଫ୍ ଓଡ଼ିଶା (ଫାଓ) ପକ୍ଷରୁ ୬ତାରିଖ ଶନିବାରଠାରୁ ସୁନ୍ଦରଗଡ଼ରେ ୬୧ତମ ଆନ୍ତଃ ଜିଲା ଫୁଟବଲ ପ୍ରତିଯୋଗିତା ସାହାଣୀ କପ୍ ୨୦୨୦-୨୧ ଆରମ୍ଭ ହେବ। ଏଥିରେ ରାଜ୍ୟର ୨୯ ଜିଲାର ୩୨ଟି ଦଳ ଭାଗ ନେବେ। ତସଲାଡିହି ଷ୍ଟାଡିୟମ, ବିଜୁ ପଟ୍ଟନାୟକ ମିନି ଷ୍ଟାଡିୟମ, ଗୋପବନ୍ଧୁ ଷ୍ଟାଡିୟମ ଏବଂ ଭବାନୀପୁର ସ୍ପୋଟର୍ସ ହଷ୍ଟେଲ ଷ୍ଟାଡିୟମରେ ମ୍ୟାଚ ଖେଳାଯିବ। ପ୍ରତିଯୋଗିତାରେ ୨୮ଜଣ ରେଫରୀ, ୪ ବ୍ୟାଚ୍ କମିଶନର, ୫ଜଣ ଚୟନକର୍ତ୍ତା ଏବଂ ଜଣେ ପର୍ଯ୍ୟବେକ୍ଷକ ଫାଓ ପକ୍ଷରୁ ନିୟୋଜିତ ହୋଇଛନ୍ତି। ଶନିବାର ଉଦ୍ଘାଟନୀ ସମାରୋହରେ ସୁନ୍ଦରଗଡ଼ ଜିଲାପାଳ ନିଖିଲ ପବନ କଲ୍ୟାଣ ଏବଂ ଫେବୃୟାରୀ ୧୪ ତାରିଖ ଉଦ୍ଯାପନୀ ସମାରୋହରେ ଫାଓ ସମ୍ପାଦକ ଆଶୀର୍ବାଦ ବେହେରା ଯୋଗଦେବାର କାର୍ଯ୍ୟକ୍ରମ ରହିଛି ବୋଲି ଶୁକ୍ରବାର ଆୟୋଜିତ ଖବରଦାତା ସମ୍ମିଳନୀରେ ଜିଲା କ୍ରୀଡ଼ା ସାଧାରଣ ସମ୍ପାଦକ ପ୍ରଭାତ କୁମାର ଭୋଳ ସୂଚନା ଦେଇଛନ୍ତି। ସମ୍ମିଳନୀରେ ଫାଓର ଉପସଭାପତି ରାଜେନ୍ଦ୍ର ମହାନ୍ତି, ଫାଓ ରେଫରୀ ମୁଖ୍ୟ ତଥା ମ୍ୟାଚ୍ କମିଶନର ଦୁର୍ଗାମାଧବ ନାଏକ, ସହ ସମ୍ପାଦକ ଜୟଦେବ ପାତ୍ର, ଉପସଭାପତି ଚିତ୍ତରଞ୍ଜନ ବହିଦାର, ସଂସଦର କାଉନସିଲ ସଦସ୍ୟ ଅଶ୍ୱିନୀ ଭୋଳ, ଶିଶିର ପଟେଲ, ଅଜୟ ବହିଦାର ଓ ବିଶ୍ୱରଞ୍ଜନ ହୋତା ପ୍ରମୁଖ ଉପସ୍ଥିତ ଥିଲେ।
