ପୁଡୁଚେରୀ,୧୦।୧- ଗଭର୍ନର କିରନ ବେଦୀଙ୍କୁ ହଟାଇବା ଦାବିରେ ପୁଡୁଚେରୀ ମୁଖ୍ୟମନ୍ତ୍ରୀ ଭି. ନାରାୟଣସ୍ବାମୀଙ୍କ ଆନ୍ଦୋଳନ ତୃତୀୟ ଦିନରେ ପହଞ୍ଚତ୍ଛି। ପୁଡୁଚେରୀର ଉନ୍ନତି ଦିଗରେ କାର୍ଯ୍ୟ କରୁଥିବା ନିର୍ବାଚିତ ସରକାରଙ୍କ କାର୍ଯ୍ୟରେ ସେ ବାଧା ଦେଉଛନ୍ତି। କୋଭିଡ୍-୧୯ କଟକଣା ଯୋଗୁ ଆମକୁ ରାଜଭବନ ସମ୍ମୁଖରେ ଆନ୍ଦୋଳନ କରିବାକୁ ଅନୁମତି ଦିଆଯାଇ ନାହିଁ। ଆମେ ୨୦୧୯ ଡିସେମ୍ବରରେ ମଧ୍ୟ ସମାନ ଦାଦି ନେଇ ଧାରଣାରେ ବସିଥିଲୁ। ବର୍ତ୍ତମାନ ସେ ସବୁ ସୀମା ଟପି ଗଲେଣି। ଫାଇଲ ଫେରାଇ ଦେଉଛନ୍ତି। କ୍ୟାବିନେଟ୍ ନିଷ୍ପତ୍ତିକୁ ସେ ଖାତିର କରୁ ନାହାନ୍ତି। ଏହା ଜଣେ ଗଭର୍ନରଙ୍କ କାର୍ଯ୍ୟ ନୁହେଁ। ସେ ଦେଶର ସମ୍ବିଧାନ ଓ ଆଇନକୁ ସମ୍ମାନ ଦେଉ ନାହାନ୍ତି ବୋଲି ମୁଖ୍ୟମନ୍ତ୍ରୀ ନାରାୟଣସ୍ବାମୀ କହିଛନ୍ତି।
ମୁଖ୍ୟମନ୍ତ୍ରୀଙ୍କ ଆହ୍ବାନରେ ଶୁକ୍ରବାର ଆରମ୍ଭ ହୋଇଥିବା ଆନ୍ଦୋଳନରେ କ୍ୟାବିନେଟ୍ ସଦସ୍ୟ, ପୁଡୁଚେରୀ କଂଗ୍ରେସ ମୁଖ୍ୟ, ସରକାରୀ ଦଳର ବିଧାୟକ ଓ କର୍ମକର୍ତ୍ତାମାନେ ରାଜ ଭବନଠାରୁ ୧ କିମି ଦୂରରେ ଧାରଣାରେ ବସିଛନ୍ତି। ଏଣେ ରାଜଭବନର ସୁରକ୍ଷା ବଢ଼ାଇ ଦିଆଯାଇଛି।
