ରାୟପୁର: ନିଯୁକ୍ତିରେ ସ୍କାମ୍ର ଅନେକ ଘଟଣା ସାମ୍ନାକୁ ଆସିଥାଏ। ହେଲେ ବିଗତ କିଛି ବର୍ଷ ଧରି ନକଲି ନାମରେ ଆବେଦନ କରିବା ଦେଖିବାକୁ ମିଳୁଛି। କେହି ଅଭିନେତାଙ୍କ ନାମରେ ତ କେହି ଅଭିନେତ୍ରୀଙ୍କ ନାମରେ ଆବେଦନ କରୁଛନ୍ତି। ଏବେ ଛତିଶଗଡ଼ରେ ଏଭଳି ଏକ ଅଜବ ମାମଲା ସାମ୍ନାକୁ ଆସିଛି। ଏଥିରେ ପୂର୍ବତନ ଭାରତୀୟ ଅଧିନାୟକ ତଥା କିମ୍ବଦନ୍ତୀ ଉଇକେଟକିପର ବ୍ୟାଟ୍ସମ୍ୟାନ୍ ମହେନ୍ଦ୍ର ସିଂହ ଧୋନୀ ଜଣେ ଶିକ୍ଷକ ଚାକିରି ପାଇଁ ଆବେଦନ କରିଛନ୍ତି। କେବଳ ଏତିକି ନୁହେଁ, ଆବେଦନକାରୀ ଧୋନୀଙ୍କ ପିତାଙ୍କ ନାମ ସଚିନ ତେନ୍ଦୁଲକର ରହିଛି। ତେବେ ତାଙ୍କୁ ସାକ୍ଷାତକାର ପାଇଁ ସର୍ଟଲିଷ୍ଟ କରାଯାଇଥିବା ଦେଖିବାକୁ ମିଳିଛି।
ଘଟଣାଟି ଏପରି। ଛତିଶଗଡ଼ରେ ଶିକ୍ଷକ ନିଯୁକ୍ତି ପାଇଁ ଆବେଦନ କରାଯାଇଥିଲା। ଏଥିରେ ମହେନ୍ଦ୍ର ସିଂହ ଧୋନୀଙ୍କ ନାମରେ ଆବେଦନ ହୋଇଥିଲା। ଗତ ଶୁକ୍ରବାର ୧୫ଜଣ ଆବେଦନକାରୀଙ୍କୁ ସାକ୍ଷାତକାର ପାଇଁ ଡକାଯାଇଥିଲା। ଏହି ତାଲିକାରେ ଧୋନୀଙ୍କ ନାମ ଥିଲା। ହେଲେ ସେ ସେଠାରେ ନ ପହଞ୍ଚିବା ଯୋଗୁ ମାମଲା ଜଣାପଡ଼ିଥିଲା। ଅଧିକାରୀମାନେ ସନ୍ଦେହ କରି ଆବେଦନ ବେଳେ ଦିଆଯାଇଥିବା ନମ୍ବରରେ ଫୋନ୍ କରିଥିଲେ। ଏଥିସହ ଯୋଗାଯୋଗ ହୋଇପାରି ନ ଥିଲା। ଏବେ ଉକ୍ତ ଆବେଦନକାରୀଙ୍କ ବିରୋଧରେ ପୋଲିସ ନିକଟରେ ଅଭିଯୋଗ କରାଯିବା ନେଇ ଆଲୋଚନା କରାଯାଉଛି।
ଉକ୍ତ ଆବେଦନ ଅନୁଯାୟୀ, ଧୋନୀ ଦୁର୍ଗ ସିଏସ୍ବିଟିୟୁ ବିଶ୍ୱବିଦ୍ୟାଳୟରୁ ଇଞ୍ଜିନିୟରିଂ ଡିଗ୍ରୀ ହାସଲ କରିଛନ୍ତି। ଚୟନ ପ୍ରକ୍ରିୟା ପାଇଁ ଦାୟୀ ଅଧିକାରୀମାନେ ନକଲି ଆବେଦନ ନେଇ ସ୍ପଷ୍ଟ କରିଛନ୍ତି। ହେଲେ ସାକ୍ଷାତକାର ପାଇଁ କିଭଳି ତାଙ୍କୁ ସର୍ଟଲିଷ୍ଟ କରାଗଲା ତାହା ଚର୍ଚ୍ଚାର ବିଷୟ ପାଲଟିଛି। ଏବେ ଏହି ଘଟଣା ସୋସିଆଲ ମିଡିଆରେ ଭାଇରାଲ ହେଉଛି।
