କ୍ୱିଭ/ମସ୍କୋ/ ନାଇରୋବି,୭ ।୬: ରୁଷିଆ-ୟୁକ୍ରେନ ମଧ୍ୟରେ ଚାଲିଥିବା ଯୁଦ୍ଧ ୨ ମାସରୁ ଅଧିକ ସମୟ ହୋଇ ଗଲାଣି । ହେଲେ ଏବେବି ସେଠାରେ ଉତ୍ତେଜନା ପରିସ୍ଥିତି ଲାଗି ରହିଛି । ଯୁଦ୍ଧ ପରେ ବୋମାମାଡ କରି ଓ ଅନ୍ୟ ଉପାୟରେ ରୁଷିଆ ୟୁକ୍ରେନର ଗହମକୁ ବାହାରକୁ ଯିବାକୁ ଦେଇ ନ ଥିଲା । ଏବେ ରୁଷିଆ ୟୁକ୍ରେନର ୫ ଲକ୍ଷ ଟନ ଗହମକୁ ଚୋରି କରି ଟ୍ରକରେ ଲଦି ନିଜ କବଜାକୁ ନେବା ସହ କ୍ରିମିୟା ପଠାଇ ଦେଇଛି । ଏବେ ଏହାକୁ ରୁଷିଆ ଖାଦ୍ୟାଭାବ ଦେଖାଦେଇଥିବା ଆଫ୍ରିକା ଦେଶକୁ ବିକ୍ରି କରୁଛି ବୋଲି ଜଣାପଡିଛି । ଆମେରିକା ମେ’ ମଧ୍ୟଭାଗରେ ୧୪ ଦେଶକୁ ଯୁଦ୍ଧ ଅପରାଧର ଲାଭ ଉଠାଇବାକୁ ନେଇ ଚେତାବନୀ ଦେଇଥିଲା । ହେଲେ ଏହାର କୌଣସି ପ୍ରଭାବ ଦେଖାଯାଇଥିବା ଲକ୍ଷ୍ୟ କରାଯାଉ ନାହିଁ ।
ଆମେରିକା ଚେତାବନୀ ସହ ୩ ରୁଷିଆ ମାଲବାହକଙ୍କ ନାମ ଜାରି କରିଛି । ହେଲେ ନିଜେ ଆମେରିକା କହିଛି, ୟୁକ୍ରେନ-ରୁଷିଆ ଯୁଦ୍ଧ ମାମଲାରେ ଶକ୍ତିଶାଳୀ ପାଶ୍ଚାତଦେଶ ରୁଷିଆ ମଧ୍ୟରେ ସେ ଫସି ଗଲାଭଳି ମନେହେଉଛି । ତେଣୁ ଆଫ୍ରିକୀୟ ଦେଶ ଉଚିତ ପ୍ରତିରୋଧ କରିପାରିବ ନାହିଁ । ଏଥି ମଧ୍ୟରେ କେତେକ ଦେଶ ରୁଷିଆ ଅସ୍ତ୍ରଶସ୍ତ୍ର ଉପରେ ନିର୍ଭର କରୁଛନ୍ତି । ଆମେରିକାର ଏହି ଚେତାବନୀ ପରେ ୟୁକ୍ରେନର ଅଧିକାରୀମାନେ ରୁଷିଆ ତାଙ୍କ ଦେଶରୁ ଗହମ ଚୋରାଇଥିବା ଅଭିଯୋଗକୁ ଦୋହରାଇଛନ୍ତି । ସୋମବାର ଆଫ୍ରିକି ୟୁନିୟନର ମୁଖ୍ୟ ସେନେଗଲ କେ ମୈକି ସାଲ ମସ୍କୋରେ ରାଷ୍ଟ୍ରପତି ପୁଟିନଙ୍କୁ ସାକ୍ଷାତ୍ କରି ଖାଦ୍ୟଶସ୍ୟ ଉପଲବ୍ଧ କରିବାକୁ କହିଥିଲେ ।
ସୂଚନାଯୋଗ୍ୟ, ଆଫ୍ରିକା ପାଇଁ ଆବଶ୍ୟକ ହେଉଥିବା ଗହମରୁ ୪୦ ପ୍ରତିଶତ ରୁଷିଆ ଓ ୟୁକ୍ରେନରୁ ନେଇଥାଏ । ଚଳିତବର୍ଷ ଗହମର ଦାମରେ ୨୩ ପ୍ରତିଶତ ବୃଦ୍ଧି ହୋଇଛି । ଜାତିସଂଘ କହିଛି ଗତବର୍ଷ ମରୁଡି ଯୋଗୁ ଆଫ୍ରିକାରେ ୧.୭ କୋଟି ଲୋକ ଭୋକିଲା ରହିଛନ୍ତି ।
