ନୂଆଦିଲ୍ଲୀ/ନ୍ୟୁୟର୍କ,୨୮।୪: ସାରା ଦେଶରେ କରୋନାର ଦ୍ୱିତୀୟ ଲହର ଭୟଙ୍କର ପରିସ୍ଥିତି ସୃଷ୍ଟି କରିଛି। ତେବେ ପ୍ରଥମ ଲହର ଅପେକ୍ଷା ଦ୍ୱିତୀୟ ଲହର ବେଶୀ ମାରାତ୍ମକ ଜଣାପଡୁଛି। ଏଥିରେ ଅଧିକ ଲୋକ ସଂକ୍ରମିତ ହେଉଥିବାବେଳେ ମୃତ୍ୟୁବରଣ ମଧ୍ୟ କରୁଛନ୍ତି। ତେବେ ଭାରତରେ କାହିଁକି ମହାମାରୀ ଉଗ୍ର ରୂପ ଧାରଣ କରିଛି ତାହାକୁ ନେଇ ଅନେକ ପ୍ରଶ୍ନ ଉଠିଛି। ବିଶ୍ୱ ସ୍ବାସ୍ଥ୍ୟ ସଂଗଠନ (ଡବ୍ଲୁଏଚ୍ଓ) ଦେଶରେ ଅନିୟନ୍ତ୍ରିତ କରୋନା ସଂକ୍ରମଣ କାରଣ ଖୋଜି ବାହାର କରିଛି। ଡବ୍ଲୁଏଚ୍ଓ କହିଛି ଯେ ଜନଗହଳିପୂର୍ଣ୍ଣ ସମାବେଶ, ଡାକ୍ତରଖାନାକୁ ରୋଗୀ ବାରମ୍ବାର ଦୌଡିବା ଏବଂ କମ ବେଗରେ କରୋନା ଟିକାକରଣ କାର୍ଯ୍ୟକ୍ରମ ଯୋଗୁ ଭାରତରେ କରୋନା ସଂକ୍ରମଣ ବଢୁଛି। ଏହାସହ ସବୁଠୁ ଅଧିକ ମାରାତ୍ମକ କରୋନା ରୂପ ମଧ୍ୟ ଏଥିପାଇଁ ଦାୟୀ ବୋଲି ଡବ୍ଲୁଏଚ୍ଓ ପ୍ରବକ୍ତା ତାରିକ ଜସାରେଭିକ୍ କହିଛନ୍ତି। ଜସାରେଭିକ କହିଛନ୍ତି, ଏ ସମୟରେ ସମସ୍ୟା ହେଉଛି ଯେ ଲୋକମାନେ ନିଜ ପ୍ରିୟଜନଙ୍କ ପାଇଁ ବାରମ୍ବାର ଡାକ୍ତରଖାନାକୁ ଦୌଡୁଛନ୍ତି, କାରଣ ସେମାନେ ସଠିକ ସୂଚନା ପାଇ ନାହାଁନ୍ତି। ଘରେ କରୋନା ସଂକ୍ରମଣ ସଫଳତାର ସହ ଚିକିତ୍ସା ହୋଇପାରିବ। ସେ କହିଛନ୍ତି ଯେ ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ର ରୋଗୀଙ୍କୁ ସ୍କ୍ରିନ କରିବା ଉଚିତ ଏବଂ ନିରାପଦ ଘରର ଯତ୍ନ ବିଷୟରେ ସୂଚନା ଦେବା ଉଚିତ। ଏହା ସହିତ ଲୋକଙ୍କୁ ସଠିକ ସୂଚନା ଦିଆଯାଇପାରିବ। ଭାରତରେ ଯେପରି ଘଟୁଛି, ଏହା ଯେକୌଣସି ଦେଶରେ ହୋଇପାରେ। ଏଥିପାଇଁ ସତର୍କ ରହିବା ଆବଶ୍ୟକ ବୋଲି ସେ କହିଛନ୍ତି।
ବୁଧବାର ପ୍ରଥମ ଥର ପାଇଁ ଦେଶରେ ମୃତକଙ୍କ ସଂଖ୍ୟା ୩ ହଜାର ଅତିକ୍ରମ କରିଛି। ଏହାସହ କ୍ରମାଗତ ସପ୍ତମ ଦିନ ଭାରତରେ ୩ ଲକ୍ଷରୁ ଅଧିକ କରୋନା ଆକ୍ରାନ୍ତ ଚିହ୍ନଟ ହୋଇଛନ୍ତି। ସୂଚନା ଅନୁଯାୟୀ, ଗତ ୨୪ ଘଣ୍ଟା ମଧ୍ୟରେ ୩,୨୮୬ ଜଣଙ୍କର ମୃତ୍ୟୁ ଘଟିଛି। ଏହା ପରେ ସମୁଦାୟ ମୃତକଙ୍କ ସଂଖ୍ୟା ୨,୦୧,୧୮୦କୁ ବୃଦ୍ଧି ପାଇଛି। ଦେଶରେ କରୋନା ସଂକ୍ରମଣ ଏବଂ ମୃକ୍ର୍ୟୁ ସଂଖ୍ୟା ଦ୍ରୁତ ଗତିରେ ବୃଦ୍ଧି ପାଉଛି। ମହାମାରୀ ଆରମ୍ଭରୁ ପ୍ରଥମ ଥର ପାଇଁ ଭାରତରେ ଗୋଟିଏ ଦିନରେ ୩୦୦୦ରୁ ଅଧିକ ମୃତ୍ୟୁ ଘଟିଛି।
