ଢେଙ୍କାନାଳ ଅଫିସ, ୧୯।୭-ଚଞ୍ଚକତା କରି ୮୮ ଲକ୍ଷ ଟଙ୍କା ହଡ଼ପ କରିଥିବା ଅଭିଯୋଗରେ ଢେଙ୍କାନାଳ ଜିଲା ସଦର ଥାନା ମୂଳିସିଂହସ୍ଥିତ ସ୍ବେଚ୍ଛାସେବୀ ସଂସ୍ଥା ‘ଜନଜାଗରଣ କେନ୍ଦ୍ର’ର ନିର୍ଦ୍ଦେଶକ ରତିକାନ୍ତ ନାୟକ ଏବଂ କୋରିଅଁା ଅଞ୍ଚଳର କୋଷାଧ୍ୟକ୍ଷ ଉପେନ୍ଦ୍ର ନାୟକଙ୍କୁ ରବିବାର ଟାଉନ ଥାନା ପୋଲିସ ଗିରଫ କରିଛି। ଅଭିଯୋଗରୁ ଜଣାପଡିଛି, ୫୫ନଂ. ଜାତୀୟ ରାଜପଥ ସମ୍ପ୍ରସାରଣ ପାଇଁ ମୂଳିସିଂହସ୍ଥିତ ଉକ୍ତ ସ୍ବେଚ୍ଛାସେବୀ ସଂସ୍ଥାର ଘର ଏବଂ ଜମି ଅଧିଗ୍ରହଣ ହୋଇଥିଲା। ଏଥିଲାଗି ଜାତୀୟ ରାଜପଥ ପ୍ରାଧିକରଣ (ଏନ୍ଏଚ୍ଏଆଇ) ପକ୍ଷରୁ ଢେଙ୍କାନାଳ ସହରରେ ଥିବା ସଂସ୍ଥାର ଏକ ବ୍ୟାଙ୍କ ଆକାଉଣ୍ଟକୁ ୮୮ଲକ୍ଷ ୧୬ହଜାର ଟଙ୍କା ପ୍ରଦାନ କରାଯାଇଥିଲା। ତେବେ ସଂସ୍ଥାର ନିର୍ଦ୍ଦେଶକ ଏବଂ କୋଷାଧ୍ୟକ୍ଷ ଏହାକୁ ହଡ଼ପ କରି ନେଇଥିବା ପୂର୍ବତନ କୋଷାଧ୍ୟକ୍ଷ ନିଗମାନନ୍ଦ ନନ୍ଦ ଅଭିଯୋଗ କରିଥିଲେ। ଏ ନେଇ ନଂ. ୬୬/୨୦, ଦଫା ୪୨୦, ୪୦୯, ୪୭୧, ୪୬୭ ଓ ୧୨୦ (ବି)ରେ ଏକ ମାମଲା ରୁଜୁ କରାଯାଇଥିବା ଏସ୍ଡିପିଓ ଶ୍ରୀହର୍ଷ ମିଶ୍ର ସୂଚନା ଦେଇଛନ୍ତି। ଟାଉନ ଥାନା ଏସ୍ଆଇ ସାବିତ୍ରୀ ପଣ୍ଡା ଘଟଣାର ତଦନ୍ତ କରୁଛନ୍ତି। ରତିକାନ୍ତ ଷ୍ଟେଶନରୋଡରେ ରହୁଥିବାବେଳେ ଉପେନ୍ଦ୍ରଙ୍କ ଘର କୋରିଅଁା ଅଞ୍ଚଳରେ ବୋଲି ଜଣାପଡ଼ିଛି।
