ରାଉରକେଲା ଅଫିସ,୧୦।୪: ରାଉରକେଲା ସରକାରୀ ହସ୍ପିଟାଲ(ଆର୍ଜିଏଚ୍)ରେ ୨ବର୍ଷ ହେଲା ଅଲଟ୍ରାସାଉଣ୍ଡ ମେଶିନ ଅଚଳ ହୋଇପଡିଛି। ଫଳରେ ଏହି ହସ୍ପିଟାଲ ଉପରେ ନିର୍ଭର କରୁଥିବା ସୁନ୍ଦରଗଡ ସମେତ ପଡୋଶୀ ଜିଲା ଓ ସୀମାନ୍ତ ଝାଡ଼ଖଣ୍ଡର ହଜାର ହଜାର ଗରିବ ରୋଗୀ ଖର୍ଚ୍ଚାନ୍ତ ହେଉଛନ୍ତି।
ଆର୍ଜିଏଚ୍ରେ କିଡ୍ନୀ, ଟ୍ୟୁମର ତଥା ବିଭିନ୍ନ ରୋଗର ପରୀକ୍ଷଣ ବିନା ମୂଲ୍ୟରେ କରିବା ସହ ଗରିବ ରୋଗୀମାନଙ୍କୁ ଅହେତୁକ ଖର୍ଚ୍ଚାନ୍ତରୁ ମୁକୁଳାଇବା ପାଇଁ ୨୦୦୦ ମସିହାରେ ଅଲଟ୍ରାସାଉଣ୍ଡ ମେଶିନ ସ୍ଥାପନ ହୋଇଥିଲା। ଇତିମଧ୍ୟରେ ୨ବର୍ଷ ବିତିଯାଇଥିଲେ ମଧ୍ୟ ଅଲଟ୍ରାସାଉଣ୍ଡ ମେଶିନ ଏପର୍ଯ୍ୟନ୍ତ କାର୍ଯ୍ୟକ୍ଷମ ହୋଇ ପାରିନାହିଁ। ଫଳରେ ଗରିବ ରୋଗୀମାନେ ବେସରକାରୀ କ୍ଲିନିକ୍ରେ ଅଲଟ୍ରାସାଉଣ୍ଡ ପରୀକ୍ଷା କରାଉଛନ୍ତି। ସେହିପରି ଅଲଟ୍ରାସାଉଣ୍ଡ ମେଶିନ ଚଳାଇବା ଲାଗି ରେଡିଓଗ୍ରାଫର ପଦବୀ ମଧ୍ୟ ପୂରଣ ହେଉନାହିଁ। ବର୍ତ୍ତମାନ ଅଲଟ୍ରାସାଉନ୍ କେନ୍ଦ୍ର ଇସିଜି କେନ୍ଦ୍ର ଭାବେ କାର୍ଯ୍ୟ କରୁଛି। ଏ ସମ୍ପର୍କରେ ସାମାଜିକ କର୍ମୀ ମୁକ୍ତିକାନ୍ତ ବିଶ୍ୱାଳ କୁହନ୍ତି, ଜାଣିଶୁଣି ମେଡିକାଲ କର୍ତ୍ତୃପକ୍ଷ ଆର୍ଜିଏଚ୍ରେ ଦୁଇବର୍ଷ ତଳେ ସ୍ଥାପିତ ହୋଇଥିବା ଅଲଟ୍ରାସାଉଣ୍ଡ ମେଶିନକୁ ସଜାଡୁନାହାନ୍ତି। ପ୍ରାଇଭେଟ ଅଲଟ୍ରାସାଉଣ୍ଡ କେନ୍ଦ୍ରମାନଙ୍କ ରୋଜଗାରକୁ ବୃଦ୍ଧି କରିବା ଉଦ୍ଦେଶ୍ୟରେ ମେଶିନ ସଜଡାଯାଉନି। ସେହିପରି ବେସରକାରୀ ମେଡିକାଲକୁ ଆର୍ଥିକ ଲାଭାନ୍ବିତ କରିବା ପାଇଁ ଆର୍ଜିଏଚ୍ରେ ନିଦାନ ଯୋଜନା ମଧ୍ୟ ବନ୍ଦ କରିଦିଆଯାଇଛି। ଆମେ ପ୍ରତିବାଦ କରିବାରୁ ଆରଜିଏଚ୍ କର୍ତ୍ତୃପକ୍ଷ ୧୫ଦିନ ମଧ୍ୟରେ ସମସ୍ୟା ସମାଧାନ ପାଇଁ ପ୍ରତିଶ୍ରୁତି ଦେଇଥିଲେ। ଶୁକ୍ରବାର ପ୍ରତିଶ୍ରୁତି ଅବଧି ଶେଷ ହୋଇଛି। ତେବେ ଦୁଇଦିନ ମଧ୍ୟରେ ଯଦି ପ୍ରତିଶ୍ରୁତି ପୂରଣ ନ ହେଲେ ପୁଣି ଧାରଣାରେ ବସିବି ବୋଲି ବିଶ୍ୱାଳ କହିଥିଲେ। ଏ ନେଇ ଆର୍ଜିଏଚ୍ ନିର୍ଦ୍ଦେଶକ ସନ୍ତୋଷ କୁମାର ସ୍ବାଇଁଙ୍କୁ ପଚାରିବାରୁ ସେ କହିଲେ, ମୁ ଆର୍ଜିଏଚ୍ରେ ଯୋଗଦେବା ପୂର୍ବରୁ ଅଲଟ୍ରାସାଉଣ୍ଡ ମେଶିନ ଅଚଳ ହୋଇପଡିଛି। ମେଶିନ ଅଚଳରେ ସମସ୍ୟା ନାହିଁ। ମେଶିନ ଚଳାଇବା ପାଇଁ ଡାକ୍ତରଙ୍କ ଅଭାବ ହେଉଛି ଗୁରୁତ୍ୱପୂର୍ଣ୍ଣ ସମସ୍ୟା। ଯଥାଶୀଘ୍ର ଆର୍ଜିଏଚ୍ରେ ଚିକିତ୍ସା ସମ୍ପର୍କିତ ଅନେକ ପରିବର୍ତ୍ତନ ହେବା ଚୂଡାନ୍ତ ହୋଇ ସାରିଥିବା ସେ କହିଥିଲେ।
