କଟକ ଅଫିସ/ ଭୁବନେଶ୍ୱର(ବ୍ୟୁରୋ),୨୩।୧୦: ନକଲି ସାମଗ୍ରୀ ପ୍ରସ୍ତୁତି ନେଇ କଟକ ପରେ ଏହାର ଚେର ଭୁବନେଶ୍ୱର ପର୍ଯ୍ୟନ୍ତ ଲମ୍ବିଥିବା ଜାଣିବାକୁ ମିଳିଛି। ଶନିବାର ମଲଗୋଦାମ ଥାନା ପୋଲିସ ମାଲ୍ଗୋଦାମରେ ଏକ ସସ୍ ଗୋଦାମରେ ଚଢ଼ାଉ କରିବାପରେ ଏହା ଭୁବନେଶ୍ୱରର ଏକ ଫ୍ୟାକ୍ଟ୍ରିରେ ପ୍ରସ୍ତୁତ ହୋଇଥିବା ଜାଣିବାକୁ ମିଳିଥିଲା। ଏହାପରେ ଉକ୍ତ ଗୋଦାମ ଓ ଫ୍ୟାକ୍ଟ୍ରିକୁ ସିଲ୍ କରାଯିବା ସହ ମାଲଗୋଦାମ ଥାନା ପୋଲିସ ଜଣଙ୍କୁ ଗିରଫ କରିଛି।
ଆଳୁ ଓ କଖାରୁକୁ ବ୍ୟବହାର କରି ଲୁଚାଛପାରେ ଚିଲି ସସ୍, ଟମାଟୋ ସସ୍ ଏବଂ ବିଭିନ୍ନ ପ୍ରକାର ଆଚାର ପ୍ରସ୍ତୁତ କରାଯାଇ ବଜାରକୁ ଛଡ଼ାଯାଉଛି। ଆଉ ଏହି ଅପମିଶ୍ରିତ ସସ୍ ଫ୍ୟାକ୍ଟ୍ରି ଓ ଗୋଦାମରେ ମାଲଗୋଦାମ ପୋଲିସ ପକ୍ଷରୁ ଚଢାଉ କରାଯିବା ପରେ ଏହା ଭୁବନେଶ୍ୱର ପାତ୍ରପଡ଼ା ଭଗବାନପୁର ଶିଳ୍ପାଞ୍ଚଳରେ ଥିବା ଉର୍ମି ଫୁଡ୍ ପ୍ରଡକ୍ଟ ନାମକ ଏକ ଫ୍ୟାକ୍ଟ୍ରିରେ ପ୍ରସ୍ତୁତ ହେଉଥିବା ଜଣାପଡ଼ିଥିଲା। ପରେ ଉକ୍ତ ଫ୍ୟାକ୍ଟ୍ରି ଉପରେ ଚଢ଼ାଉ କରାଯାଇ ବିପୁଳ ପରିମାଣର ସସ୍ ଓ ଅନ୍ୟାନ୍ୟ ସାମଗ୍ରୀ ଜବତ କରାଯିବା ସହ ଫ୍ୟାକ୍ଟ୍ରିକୁ ସିଲ୍ କରାଯାଇଛି। ସିଏମସି ସ୍ବାସ୍ଥ୍ୟ ବିଭାଗ, ଖାଦ୍ୟ ନିରାପତ୍ତା ବିଭାଗ ଓ ପୋଲିସର ମିଳିତ ଭାବରେ ଏହି ଚଢ଼ାଉ କରାଯାଇଥିଲା। ଏଠାରେ ଅପମିଶ୍ରଣ ପାଇଁ ବ୍ୟବହୃତ ଅନେକ ସାମଗ୍ରୀ ମଧ୍ୟ ଜବତ ହୋଇଛି। ଜବତ ସସ୍ ଓ ଅନ୍ୟ ସାମଗ୍ରୀ ଉପରେ ଖାଦ୍ୟ ନିରାପତ୍ତା ବିଭାଗର ବାରକୋଡ୍ ଦେଖିବାକୁ ମିଳି ନ ଥିଲା। ସେହିପରି ମନଇଚ୍ଛା ଦର ମଧ୍ୟ ଲଗାଯାଇଛି। ଖାଦ୍ୟ ସାମଗ୍ରୀ ଏହି ଗୋଦାମରେ ବିକ୍ରି ଉଦ୍ଦେଶ୍ୟରେ ମହଜୁଦ୍ ରଖାଯିବା ସହ ବିଭିନ୍ନ ବଜାରକୁ ଚାଲାଣ ହେଉଥିଲା। ଅପରପକ୍ଷରେ ମାଲଗୋଦାମରେ ହେଉଥିବା ଚଢ଼ାଉରେ ଚିଲି ଓ ଟମାଟୋ ସସ୍ ଜବତ କରାଯିବା ସହ ଭିନେଗାର ଆଚାର ମଧ୍ୟ ରହିଛି। ଉକ୍ତ ଗୋଦାମ ମାଲିକଙ୍କୁ ଅଟକ ରଖି ପୋଲିସ ପଚରାଉଚରା କରିବା ବେଳେ ତାଙ୍କ ଠାରୁ ପାତ୍ରପଡ଼ା ନକଲି ସସ୍ ଫ୍ୟାକ୍ଟ୍ରି ସମ୍ପର୍କରେ ସୂଚନା ପାଇଥିଲା। ରବିବାର ଏହାର ନମୁନା ସଂଗ୍ରହ କରାଯାଇ ପରୀକ୍ଷା ପାଇଁ ପଠାଯିବ। ଯଦି ନକଲି ବା ଖରାପ ମାଲ୍ ଦ୍ବାରା ପ୍ରସ୍ତୁତି କରାଯାଉଥିବା ଜଣାପଡ଼ିବ ତେବେ ଉକ୍ତ ଫ୍ୟାକ୍ଟ୍ରିକୁ ସବୁଦିନ ପାଇଁ ସିଲ୍ କରାଯିବା ସହ ମାଲିକଙ୍କ ବିରୋଧରେ କାର୍ଯ୍ୟାନୁଷ୍ଠାନ ନିଆଯିବ ବୋଲି ମାଲ୍ଗୋଦାମ ଥାନା ଅଧିକାରୀ ରଜନୀକାନ୍ତ ଦାସ ସୂଚନା ଦେଇଛନ୍ତି। ସେ ଆହୁରି ମଧ୍ୟ କହିଛନ୍ତି, ଉକ୍ତ ଗୋଦାମରେ କମ୍ ଦରରେ ସସ୍ ବିକ୍ରି ହେଉଥିବା ଅଭିଯୋଗ ହୋଇଥିଲା। ଏହାପରେ ସେଠାରେ ଚଢ଼ାଉ କରାଯାଇ ସବୁ ଆଚାର, ଚକୋଲେଟ, ବଡ଼ି ଓ ବିସ୍କୁଟ ପ୍ରଭୃତି ଜବତ ସାମଗ୍ରୀକୁ ସିଲ୍ କରାଯାଇଛି। ଗୋଦାମ ମାଲିକଙ୍କୁ ଗିରଫ କରାଯାଇ ଏକ ମାମଲା (ନଂ. ୧୭୧/୨୨) ରୁଜୁ ହୋଇଥିବା ଦାସ କହିଛନ୍ତି।
