ନୂଆଦିଲ୍ଲୀ,୨୨।୧୧: ଭାରତର ଦିନିକିଆ ଏବଂ ଟେଷ୍ଟ ଅଧିନାୟକ ରୋହିତ ଶର୍ମା ଆଉ ଅନ୍ତର୍ଜାତୀୟ ଟି୨୦ ମ୍ୟାଚ୍ ଖେଳି ନପାରନ୍ତି। ଏହା ସହିତ ସୀମିତ ଓଭରରେ ନିଜର ଭବିଷ୍ୟତକୁ ନେଇ ମଧ୍ୟ ରୋହିତ ବିସିସିଆଇ ସହିତ ବିଶ୍ୱକପ ପୂର୍ବରୁ ସେ ଆଲୋଚନା କରିଥିବା ସୂଚନା ମିଳିଛି।
ମିଡ଼ିଆ ରିପୋର୍ଟ ଅନୁଯାୟୀ ରୋହିତ ପୂର୍ବରୁ ହିଁ ଚୟନକର୍ତ୍ତାଙ୍କୁ କହିଥିଲେ କି ତାଙ୍କୁ ଟି୨୦ ଫର୍ମାଟରୁ ଦୂରରେ ରଖାଯାଉ। ଏଥିରେ ତାଙ୍କର କୌଣସି ଆପତ୍ତି ନାହିଁ। ଗତ ଏକବର୍ଷ ହେବ ଚୟନକର୍ତ୍ତାମାନେ ମାନଙ୍କୁ ଟି୨୦ ଫର୍ମାଟ ପାଇଁ ସୁଯୋଗ ଦେଉଛନ୍ତି। ଆସନ୍ତା ବର୍ଷ ଜୁନ ମାସରେ ଟି୨୦ ବିଶ୍ୱକପ ଆୟୋଜିତ ହେବ।
୨୦୨୨ ଟି୨୦ ବିଶ୍ୱକପ ସେମିଫାଇନାଲରୁ ଭାରତ ବିଦାୟ ନେବା ପରେ ରୋହିତ କୌଣସି ଛୋଟ ଫାର୍ମଟ ମ୍ୟାଚ୍ ଖେଳି ନାହାନ୍ତି। ଏହା ପରଠୁ ହାର୍ଦିକ ଟି୨୦ ମୁକାବିଲାରେ ଭାରତର ନେତୃତ୍ୱ ନେଉଛନ୍ତି। ରୋହିତ ଭାରତ ପାଇଁ ୧୪୮ ଟି୨୦ ମ୍ୟାଚ୍ ଖେଳିଥିବା ବେଳେ ୧୪୦ ଷ୍ଟ୍ରାଇକ ରେଟରେ ୩୮୫୩ ରନ୍ ସ୍କୋର କରିଛନ୍ତି।
ରୋହିତ ଶର୍ମା ତାଙ୍କ ଅଧିନାୟକତ୍ୱରେ ଏପର୍ଯ୍ୟନ୍ତ ମୋଟ ତିନିଟି ଆଇସିସି ଟୁର୍ନାମେଣ୍ଟ ହାରି ସାରିଛନ୍ତି। ଯଦିଓ ସେ ୨୦୨୩ ଏସିଆ କପ୍ ଟାଇଟଲ୍ ଜିତିଥିଲେ। କିନ୍ତୁ ଅଧିନାୟକ ଭାବରେ ରୋହିତ ଟି -୨୦ ବିଶ୍ୱକପ ୨୦୨୨, ବିଶ୍ୱ ଟେଷ୍ଟ ଚାମ୍ପିଅନସିପ ଫାଇନାଲ ୨୦୨୩ ଏବଂ ଦିନିକିଆ ବିଶ୍ୱକପ ୨୦୨୩ ରେ ପରାଜୟର ସମ୍ମୁଖୀନ ହୋଇଥିଲେ।
