ଚେନ୍ନାଇ, ୨୪।୪: ରୋହିତ ଶର୍ମାଙ୍କ ମୁମ୍ବାଇ ଇଣ୍ଡିଆନ୍ସ ପଞ୍ଜାବ କିଙ୍ଗ୍ସ ଠାରୁ ୯ ଉଇକେଟରେ ପରାଜିତ ହୋଇଛି। କ୍ରମାଗତ ୩ଟି ପରାଜୟ ପରେ ବିଜୟପଥକୁ ଫେରିଥିବା ଯୋଗୁ ପଞ୍ଜାବ ଟିମ୍ ବେଶ ଉତ୍ସାହିତ ନଜର ଆସିଥିଲେ। ଅପରପକ୍ଷେ ରୋହିତ ପ୍ରତିକ୍ରିୟା ରଖି ଦଳ ପୁଣିଥରେ ବଡ଼ ସ୍କୋର କରିବାରେ ବିଫଳ ହୋଇଥିବା ଏବଂ ବ୍ୟାଟିଂ ପାଇଁ ପିଚ୍ କଷ୍ଟସାଧ୍ୟ ନ ଥିବା କହିଛନ୍ତି।
ଯଦି ଗୋଟିଏ ଦଳ ଟି୨୦ରେ ୧୫୦-୧୬୦ ସ୍କୋର କରିଥାଏ, ସେତେବେଳେ ମ୍ୟାଚ୍ ଜିତିବାର ଆଶା ଥାଏ। ହେଲେ ଦଳ ଗତ ଦୁଇଟି ମ୍ୟାଚ୍ରେ ଆମେ ଏହା କରିବାରେ ବିଫଳ ହୋଇଛୁ। ପଞ୍ଜାବ ବୋଲରମାନେ ପାଓ୍ବାର ପ୍ଲେ ସମୟରେ ଭଲ ବୋଲିଂ କରିଥିଲେ। ଈଶାନ କିଷନଙ୍କ ସହ ମିଶି ବଡ଼ ଶଟ୍ ଲଗାଇବାକୁ ଚେଷ୍ଟା କରିଥିଲୁ। ହେଲେ ସଫଳ ହେଲୁନାହିଁ। ଆମକୁ କଠିନ ପରିସ୍ଥିତିରେ ଭଲ ବ୍ୟାଟିଂ ଓ ବୋଲିଂ ବିଷୟକୁ ନେଇ ବୁଝିବାକୁ ହେବ ବୋଲି ସେ କହିଛନ୍ତି।
ପ୍ରକାଶ ଯେ, ଶୁକ୍ରବାର ଅନୁଷ୍ଠିତ ମ୍ୟାଚ୍ରେ ରୋହିତଙ୍କ ଟିମ୍ ୧୩୧ ରନ୍ ସଂଗ୍ରହ କରିଥିଲା। ଜବାବରେ ପଞ୍ଜାବ ୧୭.୪ ଓଭରରେ ବିଜୟ ଲକ୍ଷ୍ୟ ହାସଲ କରିନେଇଥିଲା। ଏଥିସହ ଦଳ ପଏଣ୍ଟ ଟେବୁଲର ୫ମ ସ୍ଥାନକୁ ଉଠିଛି। ସେହିଭଳି ମୁମ୍ବାଇ ୪ର୍ଥ ସ୍ଥାନରେ ରହିଛି।
