ନୂଆଦିଲ୍ଲୀ, ୧।୭- ଏକଦିବସୀୟ କ୍ରିକେଟ୍ରେ ବଡ଼ ଶତକୀୟ ଇନିଂସ ଖେଳିବାର ଦକ୍ଷତା ରଖୁଥିବା ରୋହିତ୍ ଶର୍ମାଙ୍କୁ ଏହି ଫର୍ମାଟ୍ର ଶ୍ରେଷ୍ଠ ଓପନର୍ ମାନ୍ୟତା ଦେଇଛି ବୋଲି ପୂର୍ବତନ କ୍ରିକେଟର୍ କ୍ରିଷ୍ଣାମାଚାରୀ ଶ୍ରୀକାନ୍ତ କହିଛନ୍ତି। ରୋହିତ୍ ବର୍ତ୍ତମାନ ସୁଦ୍ଧା ଦିନିକିଆରେ ୨୯ ଶତକ ହାସଲ କରିସାରିଛନ୍ତି। ଯେଉଁଥିରେ ସେ ୧୧ ଥର ୧୪୦ରୁ ଊର୍ଦ୍ଧ୍ୱ ରନ୍ ସଂଗ୍ରହ କରିଛନ୍ତି। ୧୯୮୦ ଦଶକରେ ଭାରତର ଦୁର୍ଦ୍ଦର୍ଷ ଓପନର୍ ରହିଥିବା ଶ୍ରୀକାନ୍ତ କହିଛନ୍ତି, ବିଶ୍ୱ ଦିନିକିଆ କ୍ରିକେଟ୍ରେ ମହାନ ଓପନର୍ ତାଲିକାରେ ରୋହିତ୍ ଶ୍ରେଷ୍ଠ ୩ ମଧ୍ୟରେ ରହିବେ। ‘ରୋହିତ୍ଙ୍କୁ ମୁଁ ବିଶ୍ୱର ସର୍ବକାଳୀନ ମହାନ ଓପନର୍ ଭାବେ ଗଣିବି। ସେ ଅତି ସହଜରେ ବଡ଼ ଶତକୀୟ ଇନିଂସ ଖେଳିପାରନ୍ତି କିମ୍ବା ଦ୍ୱିଶତକ ହାସଲ କରନ୍ତି। ଯାହାକି ଆଶ୍ଚର୍ଯ୍ୟଜନକ। ଯଦି ଏକଦିବସୀୟ କ୍ରିକେଟ୍ରେ ଜଣେ ବ୍ୟାଟ୍ସମ୍ୟାନ ଏକାକୀ ୧୫୦, ୧୮୦ କିମ୍ବା ୨୦୦ ରନ୍ ସଂଗ୍ରହ କରୁଛନ୍ତି ତାହାଲେ ଟିମ୍ର ସ୍କୋର କେତେ ହେବ ଚିନ୍ତା କରନ୍ତୁ। ରୋହିତ୍ଙ୍କ ନିକଟରେ ଏହି ଦକ୍ଷତା ରହିଛି’ ବୋଲି ଭାରତ ପକ୍ଷରୁ ୧୪୬ଟି ଏକଦିବସୀୟ ମ୍ୟାଚ୍ ଖେଳିଥିବା ୬୦ ବର୍ଷୀୟ ଶ୍ରୀକାନ୍ତ ଏକ ସାକ୍ଷାତ୍କାର ଅବସରରେ କହିଛନ୍ତି। ଏଠାରେ ଉଲ୍ଲେଖ୍ୟଯୋଗ୍ୟ, ରୋହିତ୍ ବର୍ତ୍ତମାନ ସୁଦ୍ଧା ୨୨୪ ଏକଦିବସୀୟ ମ୍ୟାଚ୍ରୁ ୪୯.୨୭ ଆଭରେଜରେ ୯ ହଜାର ୧୧୫ ରନ ସଂଗ୍ରହ କରିଛନ୍ତି। ଯେଉଁଥିରେ ୨୯ ଶତକ ଓ ୪୩ ଅର୍ଦ୍ଧଶତକ ସାମିଲ ରହିଛି। ୨୬୪ ରନ ତାଙ୍କର ବ୍ୟକ୍ତିଗତ ସର୍ବାଧିକ ସ୍କୋର, ଯାହାକି ଏକ ବିଶ୍ୱରେକର୍ଡ।
