ରାୟଗଡ଼ା ଅଫିସ,୧୪ା୮: ପ୍ରବଳ ବର୍ଷା ଯୋଗୁ ରାୟଗଡ଼ା ଜିଲା କଲ୍ୟାଣସିଂହପୁର ବ୍ଲକ ଶିକରପାଇ ରେଳଷ୍ଟେଶନ ନିକଟ ୩୪ ନଂ. ଟନେଲ ପାଖରେ ରବିବାର ପଥର ଓ ମାଟି ଅତଡ଼ା ଧସି ରାୟଗଡ଼ା-କୋରାପୁଟ ରେଲ୍ଓ୍ବେ ଲାଇନ୍ରେ ଟ୍ରେନ୍ ଚଳାଚଳ ବାଧାପ୍ରାପ୍ତ ହୋଇଥିଲା। କେଉଟଗୁଡ଼ା ଓ ଶିକରପାଇ ଷ୍ଟେଶନ ମଝି ଆନନ୍ଦପାଡ଼ୁ ଗାଁ ନିକଟରେ ପ୍ରଥମେ ମାଟି ଅତଡ଼ା ଧସିବା ଯୋଗୁ ମାଟି ଏବଂ ଗଛ ରେଳଧାରଣା ଉପରେ ପଡ଼ିଥିଲା। ଫଳରେ ଉକ୍ତ ରୁଟ୍ରେ ଜଗଦଲପୁରରୁ ହାଓ୍ବାଡ଼ା ଯାଉଥିବା ସମଲେଶ୍ୱରୀ ଏକ୍ସପ୍ରେସ ଦୀର୍ଘ ୩ ଘଣ୍ଟା ଅଟକି ରହିଥିଲା। ରେଲ୍ଓ୍ବେ କର୍ମଚାରୀ ଏବଂ ରାୟଗଡ଼ାରୁ ଇଞ୍ଜିନିୟରିଂ ଟିମ୍ ଯାଇ ଲାଇନ୍ କ୍ଲିୟର କରିବା ପରେ ଟ୍ରେନ୍ ରାୟଗଡ଼ା ଅଭିମୁଖେ ବାହାରିଥିଲା। ୪ କି.ମି. ଦୂର ଯିବାପରେ ଶିକରପାଇ-ଭାଲୁମାସ୍କା ରାସ୍ତାରେ ପୁଣି ପାହାଡ଼ରୁ ବଡ଼ ପଥର ଖସି ରେଳଧାରଣା ଉପରେ ପଡ଼ିଥିଲା। ରେଲ୍ଓ୍ବେ କର୍ମଚାରୀ ପହଞ୍ଚି ରାସ୍ତାରୁ ପଥର ହଟାଇବା ପରେ ଟ୍ରେନ୍ଟି ସାଢ଼େ ୭ ଘଣ୍ଟା ବିଳମ୍ବରେ ରାତି ୭ଟାରେ ରାୟଗଡ଼ା ଷ୍ଟେଶନରେ ପହଞ୍ଚିଥିଲା। ଏଠାରୁ ଟ୍ରେନ୍ ଗନ୍ତବ୍ୟ ସ୍ଥଳ ହାଓ୍ବାଡ଼ା ଅଭିମୁଖେ ବାହାରିଥିଲା। ଏହା ବ୍ୟତୀତ ଏହି ରୁଟ୍ରେ ଅନ୍ୟ ୨ଟି ଟ୍ରେନ୍ ଚଳାଚଳ ପ୍ରଭାବିତ ହୋଇଛି। ରବିବାର ବିଶାଖାପାଟଣାରୁ କୋରାପୁଟ ଯାଉଥିବା ଟ୍ରେନ୍କୁ ରାୟଗଡ଼ାଠାରେ ଯାତ୍ରା ସମାପ୍ତ କରାଯାଇଛି। ଏହା ରାୟଗଡ଼ାରୁ ପୁଣି ବିଶାଖାପାଟଣା ଫେରିବ। ସେହିପରି କୋରାପୁଟ-ବିଶାଖାପାଟଣା ଟ୍ରେନ୍କୁ ଶିକରପାଇ ଠାରେ ଯାତ୍ରା ସମାପ୍ତ କରାଯାଇଥିଲା। ଏହା ଶିକରପାଇରୁ ପୁଣି କୋରାପୁଟ ଫେରିଥିବା ରେଲ୍ଓ୍ବେର ସିନିୟର ଡିଭିଜନାଲ ମ୍ୟାନେଜର ଏ.କେ. ତ୍ରିପାଠୀ ଏହି ସୂଚନା ଦେଇଛନ୍ତି।
