ବେଗୁନିଆ,୨୩।୭ (ଡି.ଏନ୍.ଏ.): ସରକାର ଗ୍ରାମାଞ୍ଚଳରେ ଗମନାଗମନ ସୁବିଧା ପାଇଁ ବିଭିନ୍ନ ଯୋଜନାରେ କୋଟି କୋଟି ଟଙ୍କା ଖର୍ଚ୍ଚ କରୁଛନ୍ତି। ହେଲେ ଏବେ ବି ଅନେକ ଗ୍ରାମରେ ଭଲ ରାସ୍ତା ନ ଥିବାରୁ ଲୋକେ ଯାତାୟାତରେ ହଇରାଣ ହେଉଛନ୍ତି। କେଉଁଠି ଠିକାଦାରଙ୍କ ମନମାନି ତ’ଆଉ କେଉଁଠି ବିଭାଗୀୟ ଅଧିକାରୀଙ୍କ ପରିଚାଳନାରେ ତ୍ରୁଟି ଯୋଗୁ ଅନେକ ପ୍ରକଳ୍ପ ବ୍ୟର୍ଥ ଯାଉଛି। ଖୋର୍ଦ୍ଧା ଜିଲା ବେଗୁନିଆ ବ୍ଲକ ଅନ୍ତର୍ଗତ ଗୋବିନ୍ଦପୁର-ନରସିଂହପୁର ରାସ୍ତା କାର୍ଯ୍ୟରେ ଏପରି ଦେଖିବାକୁ ମିଳିଛି। ରାସ୍ତା କାର୍ଯ୍ୟ ସମ୍ପୂର୍ଣ୍ଣ ହୋଇ ନ ଥିବା ବେଳେ ଠିକାଦାରଙ୍କ ନାମରେ ବିଲ୍ ମଞ୍ଜୁର କରାଯାଇଛି। ବିଦ୍ୟୁତ୍ ଖୁଣ୍ଟ ବାଧକ ସାଜୁଛି ବୋଲି ଆଳ ଦେଖାଇ ଆର୍ ଆଣ୍ଡ ଡି ବିଭାଗୀୟ ଉଚ୍ଚ କର୍ତ୍ତୃପକ୍ଷ ଠିକାଦାରଙ୍କୁ ଅନୁକମ୍ପା ଦେଖାଇଥିବା ସାଧାରଣରେ ଅଭିଯୋଗ ହୋଇଛି। ଫଳରେ ୧୫୦ମିଟର ଅସମ୍ପୂର୍ଣ୍ଣ ରାସ୍ତା ମରଣଯନ୍ତା ପାଲଟିଛି।
ସୂଚନାଥାଉ କି, ବେଗୁନିଆ ବ୍ଲକ କୋଲୁହାପାଟଣା ଗ୍ରାମବାସୀଙ୍କ ପକ୍ଷରୁ ଭଲ ରାସ୍ତା ପାଇଁ ସରକାରଙ୍କ ଦୃଷ୍ଟି ଆକର୍ଷଣ କରାଯାଇଥିଲା। ୨୦୧୪ ନଭେମ୍ବର ୨୨ରେ ଜଣେ ଠିକାଦାରଙ୍କ ନଁାରେ ଗୋବିନ୍ଦପୁରଠାରୁ ନରସିଂହପୁର ପର୍ଯ୍ୟନ୍ତ ୪କି.ମି. ୫୬୦ମିଟର ରାସ୍ତା ଲାଗି ୨କୋଟି ୫୭ଲକ୍ଷ ଟଙ୍କା ମଞ୍ଜୁର କରାଯାଇଥିଲା। ସେହି ବର୍ଷ ଡିସେମ୍ବରରୁ କାର୍ଯ୍ୟ ଆରମ୍ଭ ହୋଇଥିଲା। ତେବେ ନିମ୍ନମାନର କାର୍ଯ୍ୟ ହେଉଥିବା ନେଇ ସ୍ଥାନୀୟ ଲୋକେ ପ୍ରତିବାଦ କରିଥିଲେ। ପରେ କାର୍ଯ୍ୟ ଅବଧିଠାରୁ ବର୍ଷ ବର୍ଷ ଧରି ଗଡି ଚାଲିଲା। ଶେଷରେ ରାଜ୍ୟ ଗୁଣବତ୍ତା ଅଧିକାରୀ(ରାସ୍ତା), ଅଧୀକ୍ଷଣ ଯନ୍ତ୍ରୀ ଏବଂ ନିର୍ବାହୀ ଯନ୍ତ୍ରୀଙ୍କ ଦ୍ୱାରା ରାସ୍ତାର ଗୁଣବତ୍ତା ଯାଞ୍ଚ କରାଯାଇଥିଲା। ନିର୍ଦ୍ଧାରିତ ସମୟ ମଧ୍ୟରେ ଓ ଠିକ୍ କାର୍ଯ୍ୟ ସମ୍ପାଦନ କରିବା ପାଇଁ ନିର୍ଦ୍ଦେଶ ଦେଇଥିଲେ। ଏକ ବର୍ଷ ମଧ୍ୟରେ କାର୍ଯ୍ୟ ଶେଷ ହେବା ପରିବର୍ତ୍ତେ ୩ ବର୍ଷ ୫ମାସ ଲାଗିଥିଲା। କୁଶପଲା ଗ୍ରାମ ନିକଟରେ ପ୍ରାୟ ୧୫୦ମିଟର କାର୍ଯ୍ୟ ନ ହୋଇ ପଡିରହିଛି। ବର୍ଷା ଯୋଗୁ ଏହି ରାସ୍ତାରେ ଖାଲଖମା ସୃଷ୍ଟି ହେବାରେ ଲୋକେ ଯାତାୟାତ କରିବାରେ ଅସୁବିଧାରେ ସମ୍ମୁଖୀନ ହେଉଛନ୍ତି। ଅନ୍ୟପଟେ ଯେଉଁ ପର୍ଯ୍ୟନ୍ତ ରାସ୍ତା କାର୍ଯ୍ୟ ଶେଷ ହୋଇଛି ତା’ର ମରାମତି କାର୍ଯ୍ୟ କରିବା ସମୟ ମଧ୍ୟ ଦୁଇ ବର୍ଷ ହେବ ଶେଷ ହୋଇଛି। ତେବେ ଉକ୍ତ ରାସ୍ତା କାର୍ଯ୍ୟ ସମ୍ପୂର୍ଣ୍ଣ ହୋଇଥିବା ଦର୍ଶାଇ କିଭଳି ବିଲ୍ ମଞ୍ଜୁରୀ କରାଯାଇଛି ସେ ନେଇ ଲୋକଙ୍କ ମଧ୍ୟରେ ଅସନ୍ତୋଷ ଦେଖାଦେଇଛି। ରାଜ୍ୟ ସରକାର ଓ ଜିଲା ପ୍ରଶାସନ ଏଥିପ୍ରତି ଦୃଷ୍ଟି ଦେବାକୁ ଗ୍ରାମର ବଳଭଦ୍ର ପଣ୍ଡା, ବିଭୁଦତ୍ତ ପଣ୍ଡା, ଗୌରାଙ୍ଗ ଚରଣ ସାହୁ ପ୍ରମୁଖ ଦାବି କରିଛନ୍ତି। ଏ ସମ୍ପର୍କରେ ଆର୍ ଆଣ୍ଡ ଡି ବିଭାଗୀୟ ଯନ୍ତ୍ରୀ ରବୀନ୍ଦ୍ର ଜେନା କହିଛନ୍ତି, ଏଠାରେ ନୂତନ ଭାବେ ଯୋଗ ଦେଇଛି। ଉକ୍ତ ରାସ୍ତା ମରାମତି ଓ କାର୍ଯ୍ୟ ପାଇଁ ଉଚ୍ଚ ଅଧିକାରୀଙ୍କୁ ଜଣାଇଛି।
