ନୂଆଦିଲ୍ଲୀ, ୨୮।୭: ଅଷ୍ଟ୍ରେଲିଆର ପୂର୍ବତନ କ୍ରିକେଟର୍ ତଥା ମହାନ ବ୍ୟାଟ୍ସମ୍ୟାନ ରିକି ପଣ୍ଟିଂଙ୍କୁ କ୍ରିକେଟ୍ ଇତିହାସର ଅନ୍ୟତମ ଶ୍ରେଷ୍ଠ ଅଧିନାୟକ ଭାବେ ବିବେଚନା କରାଯାଏ। ପଡ଼ିଆରେ ଛକା-ଚୌକା ମାରି ବୋଲରଙ୍କୁ ଧରାଶାୟୀ କରିଥିବା ପଣ୍ଟିଂଙ୍କ ପ୍ରେମ କାହାଣୀ ମଧ୍ୟ ବେଶ୍ ନିଆରା। ଏହି ପଡ଼ିଆରୁ ହିଁ ପଣ୍ଟିଂଙ୍କ ପ୍ରେମ କାହାଣୀ ଆରମ୍ଭ ହୋଇଥିଲା। ପ୍ରତିପକ୍ଷ ବୋଲରଙ୍କ ପାଇଁ ଜଣେ ଦୁର୍ଦ୍ଦର୍ଷ ବ୍ୟାଟ୍ସମ୍ୟାନ ପାଲଟିଥିବା ପଣ୍ଟିଂଙ୍କୁ କିନ୍ତୁ ମ୍ୟାଚ୍ ଦେଖିବାକୁ ଆସିଥିବା ଯୁବତୀ କ୍ଲିନ ବୋଲ୍ଡ କରିଦେଇଥିଲେ।
୨୦୦୮ରେ ପଣ୍ଟିଂ ବାନ୍ଧବୀ ରିୟାନା କାଣ୍ଟରଙ୍କୁ ବିବାହ କରିଥିଲେ। ବିବାହ ପୂର୍ବରୁ ପଣ୍ଟିଂ ପ୍ରଥମ ଥର ଲାଗି ରିୟାନାଙ୍କୁ ପଡ଼ିଆରେ ହିଁ ଦେଖିଥିଲେ। ସେତେବେଳେ ୨୦୦୨ରେ ରିୟାନା ତାଙ୍କ ଭାଇଙ୍କ ସହ ମ୍ୟାଚ୍ ଦେଖିବାକୁ ମେଲବୋର୍ନ ଷ୍ଟାଡିୟମକୁ ଆସିଥିଲେ। ଅପରପକ୍ଷରେ ପଣ୍ଟିଂଙ୍କ ପରିବାର ମଧ୍ୟ ସେହି ମ୍ୟାଚ୍ ଦେଖିବା ଲାଗି ଷ୍ଟାଡିୟମରେ ଉପସ୍ଥିତ ଥିଲେ। ମ୍ୟାଚ୍ ମଝିରେ ଯେତେବେଳେ ବ୍ରେକ୍ ହୋଇଥିଲା ପଣ୍ଟିଂ ପରିବାର ଲୋକଙ୍କୁ ଭେଟିବା ଲାଗି ଦର୍ଶକ ଗ୍ୟାଲେରୀକୁ ଆସିଥିଲେ। ସେହିଠାରେ ହିଁ ସେ ପ୍ରଥମେ ରିୟାନାଙ୍କୁ ଦେଖିଥିଲେ। ଆଉ ପ୍ରଥମ ଦେଖାରେ ରିୟାନାଙ୍କୁ ମନ ଦେଇ ବସିଥିଲେ। ଏହାପରେ ପଣ୍ଟିଂ ରିୟାନାଙ୍କ ବିଷୟରେ ସମସ୍ତ ତଥ୍ୟ ସଂଗ୍ରହ କରିଥିଲେ। ଯେତେବେଳେ ଜାଣିଲେ ଯେ ରିୟାନା ଜଣେ ଲ’ର ଛାତ୍ରୀ ତେଣୁ ତାଙ୍କୁ ସାକ୍ଷାତ୍ କରିବାକୁ ବିଶ୍ୱବିଦ୍ୟାଳୟରେ ପହଞ୍ଚତ୍ ଯାଇଥିଲେ। ଏହା ଦେଖି ରିୟାନା ବିଶ୍ୱାସ କରିପାରି ନ ଥିଲେ ଏବଂ ପଣ୍ଟିଂଙ୍କ ପ୍ରପୋଜକୁ ସ୍ବୀକାର କରିନେଇଥିଲେ। ଏହିଠାରୁ ହିଁ ସେମାନଙ୍କ ପ୍ରେମ କାହାଣୀ ଆରମ୍ଭ ହୋଇଥିଲା। ଏହାପରେ ପଣ୍ଟିଂଙ୍କ ସହ ରିୟାନା କେବଳ ଯେ ବିଦେଶ ଭ୍ରମଣ କରି ନ ଥିଲେ, ବରଂ ବିଭିନ୍ନ କ୍ରିକେଟ୍ କାର୍ଯ୍ୟକ୍ରମରେ ଏକାଠି ଦେଖିବାକୁ ମିଳିଥିଲେ। ୨୦୦୮ରେ ବିବାହ ବନ୍ଧନରେ ଆବଦ୍ଧ ହୋଇଥିବା ପଣ୍ଟିଂ ବର୍ତ୍ତମାନ ୩ଟି ସନ୍ତାନର ବାପା ହୋଇଛନ୍ତି।
