ଖଡ଼ିଆଳ, ୧୨।୫(ଡି.ଏନ୍.ଏ.): କଡ୍ନୀ ରୋଗରେ ପୀଡ଼ିତ ହୋଇ ୨୦୨୦ରେ ସ୍ବାମୀ ଜିତେନ୍ଦ୍ର ଆରପାରିକୁ ଚାଲିଗଲେ। ସ୍ବାମୀଙ୍କ ବିୟୋଗକୁ ଭୁଲିବାକୁ ଚେଷ୍ଟା କରୁଥିବା ବେଳେ ଝିଅ ରିୟାନଂସି ଏବେ ସିକଲିନ ରୋଗରେ ପୀଡ଼ିତ। ଆୟର କୌଣସି ପନ୍ଥା ନାହିଁ। ଯାହା ଥିଲା ସ୍ବାମୀଙ୍କ ଚିକିତ୍ସାରେ ସବୁ ଖର୍ଚ୍ଚ କରିଦେଇଛନ୍ତି। ତାଙ୍କୁ କୌଣସି ସରକାରୀ ସହଯୋଗ ମିଳିପାରୁନାହିଁ। ଏଭଳି ସମସ୍ୟା ଦେଇ ଗତି କରୁଛନ୍ତି ନୂଆପଡ଼ା ଜିଲା ଖଡ଼ିଆଳ ବ୍ଲକ ସରଗାଦି ଗ୍ରାମର ସଙ୍ଗୀତା ବାଗ। ୨ବର୍ଷ ତଳେ ଝିଅର ଗୋଡ଼ ହାତ ଦରଜ ହେବା ସହିତ ଜ୍ୱରରେ ପୀଡ଼ିତ ହୋଇଥିଲା। ଚିକିତ୍ସା ପରେ ଝିଅକୁ ସିକଲିନ ହୋଇଥିବା ଜଣା ପଡ଼ିଥିଲା। ସିକଲିନ ରୋଗ ଯୋଗୁ ଦେହରୁ ରକ୍ତ କମି ଯାଉଥିବାରୁ ପ୍ରତିମାସରେ ରକ୍ତ ଭରିବାକୁ ପଡ଼େ। ହେଲେ ଖଡ଼ିଆଳ ଉପଖଣ୍ଡ ଚିକିତ୍ସାଳୟରେ ରକ୍ତ ଦେବାର ବ୍ୟବସ୍ଥା ନ ଥିବାରୁ ସଙ୍ଗୀତା ଝିଅକୁ ପ୍ରତିମାସରେ ନୂଆପଡ଼ା ମୁଖ୍ୟ ଚିକିତ୍ସାଳୟକୁ ନିଅନ୍ତି। ପ୍ରତିଥର ଦୁଇ ପ୍ୟାକେଟ (ଦୁଇ ପଏଣ୍ଟ) ରକ୍ତ ଦେବାକୁ ପଡ଼ିଥାଏ। ପ୍ରତି ପ୍ୟାକେଟକୁ ୨ ହଜାର ଟଙ୍କା ଓ ଔଷଧପତ୍ର ସହ ଯିବାଆସିବା ଖର୍ଚ୍ଚ ମିଶାଇଲେ ପ୍ରତି ମାସରେ ୫ ହଜାର ଟଙ୍କା ଖର୍ଚ୍ଚ ହେଉଥିବା ସେ କହିଛନ୍ତି। ଏପରିକି ପ୍ରଥମ ଥର ପାଇଁ ୪ଟି ଇଞ୍ଜେକ୍ସନ ଦେବାକୁ ପଡ଼ିଥିଲା। ସେଥିପାଇଁ ୨୦ ହଜାର ଖର୍ଚ୍ଚ ହୋଇଥିଲା। ପ୍ରତି ମାସରେ ରିୟାନସି ଜ୍ବରରେ ପଡ଼ିବା ସହ କଥାବାର୍ତ୍ତା କରିପାରେ ନାହିଁ ଓ ତାର ଦେହ ଦରଜ ହୁଏ। ରକ୍ତ ଦେଲାପରେ ସ୍ବାଭାବିକ ଅବସ୍ଥାକୁ ଫେରିଆସେ। ତାଙ୍କ ପରିବାରରେ କୌଣସି ପୁରୁଷ ଲୋକ ନ ଥିବାରୁ ସବୁଥର ମା’ ଝିଅ ହିଁ ଡାକ୍ତରଖାନା ଯାଆନ୍ତି। ବିଧବା ସଙ୍ଗୀତାଙ୍କ କୌଣସି ଆୟର ପନ୍ଥା ନ ଥିବାରୁ ଏତେ ଟଙ୍କା ଖର୍ଚ୍ଚ କରିବା ସମ୍ଭବ ହେଉନାହିଁ । ଧାର କରଜ କରି କେତେ ଦିନ ଝିଅର ଚିକିତ୍ସା କରିବେ ବୋଲି ସେ କହିଛନ୍ତି। ତେଣୁ ସରକାରୀ ସହାୟତା ପାଇଁ ସେ ଦାବି କରିଛନ୍ତି।
