କାବୁଲ,୧୦ ।୧୧: ଆଫଗାନିସ୍ତାନରେ ମହିଳାଙ୍କ ଉପରେ ପ୍ରତିବନ୍ଧକ ବେଳକୁ ବେଳ ବଢିବାରେ ଲାଗିଛି । ଏବେ ଆଫଗାନିସ୍ତାନର ରାଜଧାନୀ କାବୁଲରୁ ଏକ ବଡ ଖବର ଆସିଛି । ଏଠାରେ ସାର୍ବଜନିକ ସ୍ଥାନ ଅର୍ଥାତ୍ ପାର୍କ ଓ ମେଳାରେ ମହିଳାଙ୍କ ପ୍ରବେଶ ଉପରେ ପ୍ରତିବନ୍ଧକ ଲଗାଇ ଦିଆଯାଇଛି । ଏହି ନୂଆ ନିୟମ ଚଳିତ ସପ୍ତାହରେ ଲାଗୁ କରାଯାଇଛିଇ । ଏହାଦ୍ୱାରା ମହିଳାମାନଙ୍କ ଏବେ ଆଉ ସାର୍ବଜନିକ ସ୍ଥାନରେ ପ୍ରବେଶ ଅନୁମତି ମିଳିବ ନାହିଁ । ଏଠାରେ ପୂର୍ବରୁ ବି ମହିଳାଙ୍କ ଉପରେ ବିଭିନ୍ନ ପ୍ରକାର ପ୍ରତିବନ୍ଧକ ଲାଗିଛି । ଏହା ପୂର୍ବରୁ ତାଲିବାନ ସରକାର ଆଫଗାନ ମହିଳାଙ୍କୁ ଘରୁ ବାହାରକୁ ବାହାରିବାକୁ ମନା କରିବା ସହ ଘର ବାହାରେ କାମ କରିବା ଉପରେ ବି ପ୍ରତିବନ୍ଧକ ଲଗାଇଛନ୍ତି ।
ଏହା ବ୍ୟତୀତ ଏଠାକାର ସ୍କୁଲରେ ବି ଛାତ୍ରୀ ଛାତ୍ରଙ୍କ ମଧ୍ୟରେ ଭେଦଭାବ ଦେଖିବାକୁ ମିଳିଛି । ଛାତ୍ରୀମାନଙ୍କୁ ୬ଷ୍ଠ ଶ୍ରେଣୀ ପରେ ପଢିବାକୁ ଅନୁମତି ଦେଇ ନାହାନ୍ତି ଆଫଗାନ ସରକାର । ଜଣେ ମହିଳା କହିଛନ୍ତି, ଏଠାକାର ମହିଳାଙ୍କ ପାଖରେ ନା ସ୍କୁଲ ଅଛି ନା କାମ । ଆମ ନିକଟରେ ଗୋଟିଏ ସ୍ଥାନ ଥିଲା । ଏବେ ସେଠାରେ ବି ଏଣ୍ଟ୍ରିକୁ ମନା କରି ଦିଆଗଲା । ସେ କହିଛନ୍ତି ମହିଳାମାନେ ଏଭଳି ଅତ୍ୟାଚାରରେ ଅତିଷ୍ଠ ହୋଇ ପଡିଲେଣି ।
ଆଫଗାନିସ୍ତାନରେ ମହିଳାଙ୍କ ଉପରେ ଅତ୍ୟାଚାର ବଢି ଚାଲିଥିବା ବେଳେ ତାଲିବାନ ସରକାର ସମସ୍ତ ମହିଳାଙ୍କୁ ସାର୍ବଜନିକ ଭାବେ ନିଜ ଚେହେରା ପରଦା ତଳେ ରଖିବାକୁ ପୂର୍ବରୁ ନିର୍ଦ୍ଦେଶ ଦେଇଛନ୍ତି । ସେହିପରି ମହିଳାମାନଙ୍କ ମନୋରଞ୍ଜନ କାର୍ଯ୍ୟକ୍ରମରେ ଭାଗ ନେବା ଓ ପୁରୁଷଙ୍କ ସହ ପାର୍କ ଯିବାକୁ ସରକାର ଅନୁମତି ଦେଇ ନାହାନ୍ତି ।
ସୂଚନାଯୋଗ୍ୟ, ୨୦୨୧ରେ ଆଫଗାନିସ୍ତାନରେ ତାଲିବାନ ଶାସନ କରିବା ପରଠାରୁ ମହିଳାଙ୍କ ଉପରେ ଅତ୍ୟାଚାର ବଢିବାରେ ଲାଗିଛି ।
