ଅମରପାଲି, ୧୦।୩(ଡି.ଏନ.ଏ.): ସୁବର୍ଣ୍ଣପୁର ଜିଲା ବୀରମହାରାଜପୁର ଓ ଉଲୁଣ୍ଡା ରେଞ୍ଜ ଅଧୀନରେ ଥିବା ପ୍ରାୟ ସବୁ ଜଙ୍ଗଲରେ ଏବେ ନିଆଁ ଲାଗିଛି। ନିଆଁ ଲାଗି ବ୍ୟାପକ ଜଙ୍ଗଲ କ୍ଷୟକ୍ଷତି ହେଉଥିବା ବେଳେ ଧୂଆଁ ଯୋଗୁ ଅସ୍ତବ୍ୟସ୍ତ ହୋଇପଡ଼ିଛି ଜନଜୀବନ। ମାତ୍ରାଧିକ ଧୂଆଁ ନିର୍ଗତ ହେଉଥିବାରୁ ଦୁଇଦିନ ହେଲା ସମଗ୍ର ବୀରମହାରାଜପୁର ଅଞ୍ଚଳ ଧୂଆଁଳିଆ ଦେଖାଯାଉଛି। ଧୂଆଁ ଯୋଗୁ ରାସ୍ତାରେ ଯାତାୟାତ ବେଳେ ଶ୍ୱାସରୁଦ୍ଧ ପରିସ୍ଥିତି ସୃଷ୍ଟି ହେଉଛି। ଆଖି ପୋଡୁଥିବା ଲୋକେ ଅଭିଯୋଗ କରୁଛନ୍ତି। ପ୍ରକୃତିପ୍ରେମୀ ଏହାକୁ ନେଇ ଉଦ୍ବେଗ ପ୍ରକାଶ କରୁଛନ୍ତି। ବୀରମହାରାଜପୁର ରେଞ୍ଜ ଅନ୍ତର୍ଗତ ପିତାମହୁଲ, ଗରିଆମୁଣ୍ଡା, ସଂଗ୍ରାମପୁର, ସେରଗେଡା, ଟାମକିଆଦାଦର, ସାହାଜଲଥା, ଖଣ୍ଡହତା, ହାତିଲିମୁଣ୍ଡା, କୁନ୍ଦପାଲ, ଭାଲୁଡୁଙ୍ଗୁର, ଗୁଦୁଗୁଦା, ଅମରପାଲି, ଗୌଡ଼ଗାଡ଼, ଦୁର୍ଜନତୈଲା, ସାଗଯୋରୀ, ଠେଙ୍ଗୋଡ୍ୟାମ ଆଦି ଜଙ୍ଗଲରେ ଲାଗିଥିବା ନିଆଁକୁ ଆୟତ୍ତ କରିବା ବନ ବିଭାଗ ପକ୍ଷରେ ସମ୍ଭବ ହେଉନାହିଁ। ଉଲୁଣ୍ଡା ରେଞ୍ଜର ପ୍ରସିଦ୍ଧ ପାତାଳୀ ଶ୍ରୀକ୍ଷେତ୍ରର ତ୍ରିକୁଟ ପାହାଡ଼ ସମେତ ସୀମାବର୍ତ୍ତୀ ବିଭିନ୍ନ ଜଙ୍ଗଲରେ ବି ସମାନ ଅବସ୍ଥା ଦେଖାଦେଇଛି। ବୀରମହାରାଜପୁର ରେଞ୍ଜ ଅଧିକାରୀ ଅବିନାଶ ବରିହାଙ୍କୁ ପଚାରିବାରୁ ବନ ବିଭାଗ ପକ୍ଷରୁ ନିଆଁ ଲିଭାଯାଉଛି। କେନ୍ଦୁପତ୍ର ପାଇଁ ଗୋଛାକଟା ବେଳେ ନିଆଁ ଲଗାଇ ଦିଆଯାଉଥିବାରୁ ଏହା ବ୍ୟାପୁଛି ବୋଲି ସେ କହିଛନ୍ତି।
