କେସିଙ୍ଗା,୩।୪(ତୁମେଶ୍ୱର ସାହୁ): କଳାହାଣ୍ଡି ଜିଲା କେସିଙ୍ଗା ଜାତୀୟ ରାଜପଥ ୨୬ସ୍ଥିତ ରେଲୱେ ଫାଟକ ନିକଟରେ ରାୟପୁର-ବିଶାଖାପାଟଣାକୁ ସଂଯୋଗ ହୋଇଥିବା ୩ ଲାଇନ ବିଶିଷ୍ଟ ରେଳ ଲାଇନରେ ବିଭିନ୍ନ ଦ୍ରୁତଗାମୀ ଟ୍ରେନ, କୋଇଲା ବୋଝେଇ ଟ୍ରେନ ଆଦି ଗମନାଗମନବେଳେ ବସ, ଟ୍ରକ, ଯାନବାହନ, ଆମ୍ବୁଲାନ୍ସ ଆଦି ଘଣ୍ଟା ଘଣ୍ଟା ଧରି ଛିଡା ରହୁଥିଲା। ଯାହାଫଳରେ ବସ ଯାତ୍ରୀ ଓ ଆମ୍ବୁଲାନ୍ସରେ ଯାଉଥିବା ଗର୍ଭବତୀ ମହିଳା, ରୋଗୀଙ୍କ ପାଇଁ ଟ୍ରାଫିକ ଜାମ ଯୋଗୁ ହଇରାଣ ହରକତ ହେଉଥିଲେ। ଏହି ସବୁ ସମସ୍ୟାକୁ ଦୃଷ୍ଟିରେ ରଖି ସହରବାସୀ ବହୁବାର କେନ୍ଦ୍ର ଓ ରାଜ୍ୟ ସରକାରଙ୍କୁ ଲିଖିତ ଦାବି କରିଥିଲେ।
ଅଞ୍ଚଳବାସୀଙ୍କ ସମସ୍ୟାକୁ ଦୂର କରିବା ପାଇଁ ଗତ ୨୦୧୬ରେ କେନ୍ଦ୍ର ସରକାରଙ୍କ ପକ୍ଷରୁ ରୋଡ଼ ଓଭର ବ୍ରିଜ ନିର୍ମାଣ ପାଇଁ ୨୧୬ କୋଟି ଅର୍ଥ ମଞ୍ଜୁରୀ ହୋଇଥିଲା। କିନ୍ତୁ ସହର ମଧ୍ୟରେ ରାସ୍ତା ଉଚ୍ଛେଦ କରାଯାଇ ଏହି ରୋଡ଼ ଓଭର ବ୍ରିଜ ନିର୍ମାଣ ହେଲେ ବ୍ୟବସାୟିକ କ୍ଷେତ୍ରରେ ଘୋର ସମସ୍ୟା ଦେଖାଯିବ ବୋଲି ସହରବାସୀ ବିରୋଧ କରି କେନ୍ଦ୍ର ଓ ରାଜ୍ୟ ସରକାରଙ୍କୁ ଅଭିଯୋଗ କରିଥିବାରୁ ଏହି ରୋଡ଼ ଓଭର ବ୍ରିଜ ରାସ୍ତା ନିର୍ମାଣରେ ଦୀର୍ଘ ୯ବର୍ଷ ଧରି କାମ ନ ହୋଇ କେନ୍ଦ୍ରକୁ ଟଙ୍କା ଫେରିଗଲା। କିନ୍ତୁ ରେଲୱେ ଫାଟକରେ ଘଣ୍ଟା ଘଣ୍ଟା ଧରି ଟ୍ରାଫିକ ଜାମ ହେବାର ଦେଖି ଲୋକଙ୍କ ସମସ୍ୟା ଦେଖା ଦେବାରୁ ତତ୍କାଳୀନ ରାଜ୍ୟ ସରକାରଙ୍କ ମିଳିତ ଉଦ୍ୟମରେ କେନ୍ଦ୍ର ସରକାର ପୁଣି ରୋଡ଼ ଓଭର ବ୍ରିଜ ନିର୍ମାଣ ପାଇଁ M.O.R.T.and high way fundରୁ କେନ୍ଦ୍ର ସରକାର ଗତ ୩ବର୍ଷ ହେଲା ଅର୍ଥ ମଞ୍ଜୁରୀ କରିବାରୁ ଜମି ଅଧିଗ୍ରହଣ ପାଇଁ ଚାଷୀଙ୍କୁ ୧୬୮କୋଟି ରାଜସ ବିଭାଗ ପକ୍ଷରୁ ଜମି ଅଧିଗ୍ରହଣ କରାଗଲା ଏବଂ ୧୫୮ କୋଟି ଟଙ୍କା ବ୍ୟୟ ଅଟକଳ ରେ ୩.୫୫୭ କିମି ରାସ୍ତା ର ବର୍ତ୍ତମାନ ରୋଡ଼ ଓଭର ବ୍ରିଜ ନିର୍ମାଣାଧୀନ ରହିଛି।
ଏ ସଂକ୍ରାନ୍ତରେ ଜାତୀୟ ରାଜପଥ କେସିଙ୍ଗାର ସୁପରିଟେଣ୍ଡିଙ୍ଗ ଇଞ୍ଜିନିୟର ଇ.ତପନ କୁମାର ମୋହାଳିକଙ୍କୁ ପଚାରିବାରୁ ୨୫-୨୬ ଆର୍ଥିକ ବର୍ଷରେ କେନ୍ଦ୍ର ରୁ ଚାରି ଲାଇନ ବିଶିଷ୍ଟ ବାଇପାସ ରୋଡ଼ ନିର୍ମାଣ ପାଇଁ କେନ୍ଦ୍ର ରୁ ଇଞ୍ଜିନିୟର ଓ ବିଶିଷ୍ଟ ପଦାଧିକାରୀ ଗଣ ପରିଦର୍ଶନ କରି ସର୍ଭେ କରିବେ,କେସିଙ୍ଗାର କେଉଁ ଦିଗରେ ନିର୍ମାଣ ହେବ,ତାହା ସର୍ଭେ ହେଲା ପରେ ଜଣାପଡ଼ିବ ଏବଂ ଏହି ରୋଡ଼ ଓଭର ବ୍ରିଜ ସମ୍ପୂର୍ଣ ନିର୍ମାଣ ହେଲେ ଟ୍ରାଫିକ ସମସ୍ୟା ଦୂର ହେବା ସହ ଲୋକେ ଉପକୃତ ହେବେ ଏବଂ ରେଲୱେ ଅଣ୍ଡର ବ୍ରିଜରେ ଭିଡ଼ ଜମିବ ନାହିଁ ବୋଲି ପ୍ରକାଶ କରିଥିଲେ।
