ବାରିପଦା ଅଫିସ,୮।୧୨: ମୟୂରଭଞ୍ଜ ଜିଲା କୁଳିଅଣା ବ୍ଲକ କାଠରୁମା (ଦେହୁରୀ ସାହି)ରେ ଏକ ଡଗ୍ୱେଲ ଭିତରେ ଖସି ପଡିଥିବା ଦୁଇଟି ହାତୀ ନିଶ୍ଚିତ ମୃତ୍ୟୁମୁଖରୁ ରକ୍ଷା ପାଇଛନ୍ତି । ଏଥିପାଇଁ ଗ୍ରାମବାସୀ, ବନ ଓ ଅଗ୍ନିଶମ ବିଭାଗଙ୍କ ଉପସ୍ଥିତ ବୁଦ୍ଧିକୁ ସାଧାରଣରେ ପ୍ରଶଂସା କରାଯାଉଛି । ବୁଧବାର ରାତିରେ ଧାନ ଖାଇବାକୁ ଆସିଥିବା ହାତୀପଲ ମଧ୍ୟରୁ ଦୁଇଟି ହାତୀ ଶିମିଳିପାଳ ସନ୍ନିକଟ ବାରିପଦା ରେଞ୍ଜ ଅନ୍ତର୍ଗତ ହଳଦିବଣୀ ଫରେଷ୍ଟ କାର୍ଯ୍ୟାଳୟ ଅଧୀନ କାଠରୁମା (ଦେହୁରୀ ସାହି )ର ସାଧୁ ମୁର୍ମୁଙ୍କ ବିଲରେ ଥିବା ଏକ ପରିତ୍ୟକ୍ତ ଡଗୱେଲ ଭିତରେ ଖସି ପଡ଼ିଥିଲେ । ସକାଳେ ଗ୍ରାମବାସୀ ଜାଣିବା ପରେ ତାଙ୍କର ଉପସ୍ଥିତ ବୁଦ୍ଧି ଦ୍ୱାରା ଉଭୟଙ୍କୁ ଉଦ୍ଧାର କରାଯାଇଛି ।
ବୁଧବାର ରାତି ଦୁଇଟା ସମୟରେ ୩୫ଟିକିଆ ହାତୀ ପଲ ଧାନ ଖାଇବାକୁ ବିଲକୁ ପଶିଥିଲେ । ଅଜାଣତରେ ଡଗ ୱେଲରେ ୬ଟି ହାତୀ ଖସିପଡ଼ିଥିଲେ । ସେଥି ମଧ୍ୟରୁ ୪ ହାତୀ କୌଶଳ କ୍ରମେ ଉଠିଯାଇଥିଲେ । ୨ ହାତୀ ଉଠି ପାରି ନ ଥିଲେ । ଗୋଟିଏ ଦନ୍ତା ଓ ଅନ୍ୟଟି ହାତୀ ଶାବକ ଦୀର୍ଘ ସମୟ ଆପ୍ରାଣ ଉଦ୍ୟମ ପରେ ମଧ୍ୟ କାଦୁଅରେ ପଶି ରହିଥିଲେ । ଖବର ପାଇ ଘଟଣା ସ୍ଥଳରେ ବାରିପଦା ରେଞ୍ଜର ଲକ୍ଷ୍ମୀଧର ବେହେରା ସଦଳ ବଳେ ପହଞ୍ଚିଥିଲେ । ଚନ୍ଦୁଆରୁ ଅଗ୍ନିଶମ ବିଭାଗ ମଧ୍ୟ ସେଠାରେ ପହଞ୍ଚିଥିଲେ । ସେମାନେ ହାତୀଙ୍କୁ ଉଦ୍ଧାର ପାଇଁ ଗ୍ରାମବାସୀଙ୍କ ସହଯୋଗ ନେଇଥିଲେ । ଡଗଓ୍ବେଲ ହିଡ ଧାରକୁ କାଠ ଖଣ୍ଡ ଓ ଡାଳୁଅ ପକାଇବା ପରେ ହାତୀ ୨ଟିକୁ ଉଦ୍ଧାର କରିଥିଲେ । ୩ିଦିନ ହେବ ୩୫ଟି ହାତୀ ଉକ୍ତ ଅଞ୍ଚଳରେ ରହି ଅମଳ ସମୟର ଚାଷ ଜମିରୁ ଧାନ ଖାଇବା ସହିତ ବ୍ୟାପକ କ୍ଷତି ପହଞ୍ଚାଉଥିବା ଅଭିଯୋଗ ହେଉଛି।
